tum aise achchhe ki achchhe nahīñ kisī ke saath

maiñ vo burā ki kisī kā burā nahīñ kartā

tum aise achchhe ki achchhe nahin kisi ke sath

main wo bura ki kisi ka bura nahin karta

kyā irāde haiñ vahshat-e-dil ke

kis se milnā hai ḳhaak meñ mil ke

kya irade hain wahshat-e-dil ke

kis se milna hai KHak mein mil ke

kis ko mehrbāñ kahiye kaun mehrbāñ apnā

vaqt kī ye bāteñ haiñ vaqt ab kahāñ apnā

kis ko mehrban kahiye kaun mehrban apna

waqt ki ye baaten hain waqt ab kahan apna

zāhir na thā nahīñ sahī lekin zuhūr thā

kuchh kyuuñ na thā jahān meñ kuchh to zarūr thā

zahir na tha nahin sahi lekin zuhur tha

kuchh kyun na tha jahan mein kuchh to zarur tha

hamāre aib meñ jis se madad mile ham ko

hameñ hai aaj kal aise kisī hunar kī talāsh

hamare aib mein jis se madad mile hum ko

hamein hai aaj kal aise kisi hunar ki talash

hichkiyoñ par ho rahā hai zindagī kā raag ḳhatm

jhaTke de kar taar toḌe jā rahe haiñ saaz ke

hichkiyon par ho raha hai zindagi ka rag KHatm

jhaTke de kar tar toDe ja rahe hain saz ke

aa.ī hogī to maut aa.egī

tum to jaao mirā ḳhudā hāfiz

aai hogi to maut aaegi

tum to jao mera KHuda hafiz

ab kahāñ guftugū mohabbat kī

aisī bāteñ hue zamāna huā

ab kahan guftugu mohabbat ki

aisi baaten hue zamana hua

tumhārī baat kā itnā hai e'tibār hameñ

ki ek baat nahīñ e'tibār ke qābil

tumhaari baat ka itna hai e'tibar hamein

ki ek baat nahin e'tibar ke qabil

hameñ kam-baḳht ehsās-e-ḳhudī us dar pe le baiThā

ham uTh jaate to vo parda bhī uTh jaatā jo haa.il thā

hamein kam-baKHt ehsas-e-KHudi us dar pe le baiTha

hum uTh jate to wo parda bhi uTh jata jo hail tha

kuchh nahīñ achchhā to duniyā meñ burā bhī kuchh nahīñ

kījiye sab kuchh magar apnī zarūrat dekh kar

kuchh nahin achchha to duniya mein bura bhi kuchh nahin

kijiye sab kuchh magar apni zarurat dekh kar

ai zindagī junūñ na sahī be-ḳhudī sahī

tū kuchh bhī apnī aql se pāgal uThā to lā

ai zindagi junun na sahi be-KHudi sahi

tu kuchh bhi apni aql se pagal uTha to la

hameñ jo yaad hai ham to usī se kaam lete haiñ

kisī kā naam lenā ho usī kā naam lete haiñ

hamein jo yaad hai hum to usi se kaam lete hain

kisi ka nam lena ho usi ka nam lete hain

DhūñDhtī hai iztirāb-e-shauq kī duniyā mujhe

aap ne mahfil se uThvā kar kahāñ rakkhā mujhe

DhunDhti hai iztirab-e-shauq ki duniya mujhe

aap ne mahfil se uThwa kar kahan rakkha mujhe

mai ko mire surūr se hāsil surūr thā

maiñ thā nashe meñ chuur nasha mujh meñ chuur thā

mai ko mere surur se hasil surur tha

main tha nashe mein chur nasha mujh mein chur tha

umr bhar kā saath miTTī meñ milā

ham chale ai jism-e-be-jāñ al-vidā.a

umr bhar ka sath miTTi mein mila

hum chale ai jism-e-be-jaan al-widaa

sab kuchh mujhe mushkil hai na pūchho mirī mushkil

āsān bhī ho kaam to āsāñ nahīñ hotā

sab kuchh mujhe mushkil hai na puchho meri mushkil

aasan bhi ho kaam to aasan nahin hota

ham to masjid se bhī māyūs hī aa.e 'nātiq'

koī allāh kā banda to musalmāñ hotā

hum to masjid se bhi mayus hi aae 'natiq'

koi allah ka banda to musalman hota

rah ke achchhā bhī kuchh bhalā na huā

maiñ burā ho gayā burā na huā

rah ke achchha bhi kuchh bhala na hua

main bura ho gaya bura na hua

haañ jaan to deñge magar ai maut abhī dam le

aisā na kaheñ vo ki ham aa.e to chale aap

han jaan to denge magar ai maut abhi dam le

aisa na kahen wo ki hum aae to chale aap

vafā par naaz ham ko un ko apnī bevafā.ī par

koī muñh aa.ine meñ dekhtā hai koī paanī meñ

wafa par naz hum ko un ko apni bewafai par

koi munh aaine mein dekhta hai koi pani mein

ab maiñ kyā tum se apnā haal kahūñ

ba-ḳhudā yaad bhī nahīñ mujh ko

ab main kya tum se apna haal kahun

ba-KHuda yaad bhi nahin mujh ko

be-ḳhud-e-shauq huuñ aatā hai ḳhudā yaad mujhe

rāsta bhuul ke baiThā huuñ sanam-ḳhāne kā

be-KHud-e-shauq hun aata hai KHuda yaad mujhe

rasta bhul ke baiTha hun sanam-KHane ka

ab jahāñ meñ baaqī hai aah se nishāñ apnā

uḌ ga.e dhueñ apne rah gayā dhuāñ apnā

ab jahan mein baqi hai aah se nishan apna

uD gae dhuen apne rah gaya dhuan apna

mujh se nārāz haiñ jo log vo ḳhush haiñ un se

maiñ judā chiiz huuñ 'nātiq' mire ash.ār judā

mujh se naraaz hain jo log wo KHush hain un se

main juda chiz hun 'natiq' mere ashaar juda

ik harf-e-shikāyat par kyuuñ ruuTh ke jaate ho

jaane do ga.e shikve aa jaao maiñ baaz aayā

ek harf-e-shikayat par kyun ruTh ke jate ho

jaane do gae shikwe aa jao main baz aaya

kyā karūñ ai dil-e-māyūs zarā ye to batā

kyā kiyā karte haiñ sadmoñ se hirāsāñ ho kar

kya karun ai dil-e-mayus zara ye to bata

kya kiya karte hain sadmon se hirasan ho kar

dūsroñ ko kyā kahiye dūsrī hai duniyā hī

ek ek apne ko ham ne dūsrā paayā

dusron ko kya kahiye dusri hai duniya hi

ek ek apne ko hum ne dusra paya

ghar banāne kī baḌī fikr hai duniyā meñ hameñ

sāhab-e-ḳhāna bane jaate haiñ mehmāñ ho kar

ghar banane ki baDi fikr hai duniya mein hamein

sahab-e-KHana bane jate hain mehman ho kar

ham paañv bhī paḌte haiñ to allāh-re naḳhvat

hotā hai ye irshād ki paḌte haiñ gale aap

hum panw bhi paDte hain to allah-re naKHwat

hota hai ye irshad ki paDte hain gale aap

pahlī bāteñ haiñ na pahle kī mulāqāteñ haiñ

ab dinoñ meñ vo rahā lutf na rātoñ meñ rahā

pahli baaten hain na pahle ki mulaqaten hain

ab dinon mein wo raha lutf na raaton mein raha

mile murād hamārī magar mile bhī kahīñ

ḳhudā kare magar aisā ḳhudā nahīñ kartā

mile murad hamari magar mile bhi kahin

KHuda kare magar aisa KHuda nahin karta

nazar aatā nahīñ ab ghar meñ vo bhī uf re tanhā.ī

ik ā.īne meñ pahle aadmī thā merī sūrat kā

nazar aata nahin ab ghar mein wo bhi uf re tanhai

ek aaine mein pahle aadmi tha meri surat ka

majnūñ se jo nafrat hai dīvānī hai tū lailā

vo ḳhaak uḌātā hai lekin nahīñ dil mailā

majnun se jo nafrat hai diwani hai tu laila

wo KHak uData hai lekin nahin dil maila

dūsrā aisā kahāñ ai dasht ḳhalvat kā maqām

apnī vīrānī ko le kar mere vīrāne meñ aa

dusra aisa kahan ai dasht KHalwat ka maqam

apni virani ko le kar mere virane mein aa

rahtī hai shams-o-qamar ko tire saa.e kī talāsh

raushnī DhūñDhtī phirtī hai añdherā terā

rahti hai shams-o-qamar ko tere sae ki talash

raushni DhunDhti phirti hai andhera tera

aatī hai yaad sub.h-e-masarrat kī baar baar

ḳhurshīd aate aate use kal uThā to lā

aati hai yaad subh-e-masarrat ki bar bar

KHurshid aate aate use kal uTha to la

chaal aur hai duniyā kī hamārā hai chalan aur

vo sāḳht hai kuchh aur ye be-sāḳhta-pan aur

chaal aur hai duniya ki hamara hai chalan aur

wo saKHt hai kuchh aur ye be-saKHta-pan aur

charāġh le ke phirā DhūñDhtā huā ghar ghar

shab-e-firāq jo mujh ko rahī sahar kī talāsh

charagh le ke phira DhunDhta hua ghar ghar

shab-e-firaq jo mujh ko rahi sahar ki talash

aise bohtān lagā.e ki ḳhudā yaad aayā

but ne ghabrā ke kahā mujh se ki qur.ān uThā

aise bohtan lagae ki KHuda yaad aaya

but ne ghabra ke kaha mujh se ki quran uTha

dostī kis kī rahī yaad vo kis par bhūlā

dūsrā biich meñ kaun aa ke marā mere ba.ad

dosti kis ki rahi yaad wo kis par bhula

dusra bich mein kaun aa ke mara mere baad

avval avval ḳhuub dauḌī kashtī-e-ahl-e-havas

āḳhir āḳhir Duub marne kā maqām aa hī gayā

awwal awwal KHub dauDi kashti-e-ahl-e-hawas

aaKHir aaKHir Dub marne ka maqam aa hi gaya

na mai-kashī na ibādat hamārī aadat hai

ki sāmne koī kaam aa gayā to kar lenā

na mai-kashi na ibaadat hamari aadat hai

ki samne koi kaam aa gaya to kar lena

sab ko ye shikāyat hai ki hañstā nahīñ 'nātiq'

ham ko ye ta.ajjub ki vo giryāñ nahīñ hotā

sab ko ye shikayat hai ki hansta nahin 'natiq'

hum ko ye tajjub ki wo giryan nahin hota

vahāñ se le ga.ī nākām badbaḳhtoñ ko ḳhud-kāmī

jahāñ chashm-e-karam se ḳhud-ba-ḳhud kuchh kaam honā thā

wahan se le gai nakaam badbaKHton ko KHud-kaami

jahan chashm-e-karam se KHud-ba-KHud kuchh kaam hona tha

hañgāma-e-hayāt se lenā to kuchh nahīñ

haañ dekhte chalo ki tamāshā hai raah kā

hangama-e-hayat se lena to kuchh nahin

han dekhte chalo ki tamasha hai rah ka

āḳhir ko rāhbar ne Thikāne lagā diyā

ḳhud apnī raah lī mujhe rasta batā diyā

aaKHir ko rahbar ne Thikane laga diya

KHud apni rah li mujhe rasta bata diya

pahuñchā.egā nahīñ tū Thikāne lagā.egā

ab us galī meñ ġhair ko rahbar banā.eñge

pahunchaega nahin tu Thikane lagaega

ab us gali mein ghair ko rahbar banaenge

mil ga.e tum haath uThā kar mujh ko sab kuchh mil gayā

aaj to ghar luuT laa.ī hai duā tāsīr kī

mil gae tum hath uTha kar mujh ko sab kuchh mil gaya

aaj to ghar luT lai hai dua tasir ki

guzartī hai maze se vā.izoñ kī zindagī ab to

sahārā ho gayā hai diin duniyā-dār logoñ kā

guzarti hai maze se waizon ki zindagi ab to

sahaara ho gaya hai din duniya-dar logon ka