sabr par dil ko to āmāda kiyā hai lekin

hosh uḌ jaate haiñ ab bhī tirī āvāz ke saath

sabr par dil ko to aamada kiya hai lekin

hosh uD jate hain ab bhi teri aawaz ke sath

jahāñ apnā qissa sunānā paḌā

vahīñ ham ko ronā rulānā paḌā

jahan apna qissa sunana paDa

wahin hum ko rona rulana paDa

apnī hālat kā ḳhud ehsās nahīñ hai mujh ko

maiñ ne auroñ se sunā hai ki pareshān huuñ maiñ

apni haalat ka KHud ehsas nahin hai mujh ko

main ne auron se suna hai ki pareshan hun main

murattab kar gayā ik ishq kā qānūn duniyā meñ

vo dīvāne haiñ jo majnūñ ko dīvāna batāte haiñ

murattab kar gaya ek ishq ka qanun duniya mein

wo diwane hain jo majnun ko diwana batate hain

kahte haiñ ki ummīd pe jiitā hai zamāna

vo kyā kare jis ko koī ummīd nahīñ ho

kahte hain ki ummid pe jita hai zamana

wo kya kare jis ko koi ummid nahin ho

ishq pāband-e-vafā hai na ki pāband-e-rusūm

sar jhukāne ko nahīñ kahte haiñ sajda karnā

ishq paband-e-wafa hai na ki paband-e-rusum

sar jhukane ko nahin kahte hain sajda karna

betāb sā phirtā hai ka.ī roz se 'āsī'

bechāre ne phir tum ko kahīñ dekh liyā hai

betab sa phirta hai kai roz se 'asi'

bechaare ne phir tum ko kahin dekh liya hai