Sher on Wafa

vo kahte haiñ har choT par muskurāo

vafā yaad rakkho sitam bhuul jaao

wo kahte hain har choT par muskurao

wafa yaad rakkho sitam bhul jao

dushmanoñ kī jafā kā ḳhauf nahīñ

dostoñ kī vafā se Darte haiñ

dushmanon ki jafa ka KHauf nahin

doston ki wafa se Darte hain

jaao bhī kyā karoge mehr-o-vafā

bār-hā aazmā ke dekh liyā

jao bhi kya karoge mehr-o-wafa

bar-ha aazma ke dekh liya

ye kyā ki tum ne jafā se bhī haath khīñch liyā

mirī vafāoñ kā kuchh to sila diyā hotā

ye kya ki tum ne jafa se bhi hath khinch liya

meri wafaon ka kuchh to sila diya hota

bas ek baar hī toḌā jahāñ ne ahd-e-vafā

kisī se ham ne phir ahd-e-vafā kiyā hī nahīñ

bas ek bar hi toDa jahan ne ahd-e-wafa

kisi se hum ne phir ahd-e-wafa kiya hi nahin

vafā par daġhā sulh meñ dushmanī hai

bhalā.ī kā hargiz zamāna nahīñ hai

wafa par dagha sulh mein dushmani hai

bhalai ka hargiz zamana nahin hai

tum jafā par bhī to nahīñ qaa.em

ham vafā umr bhar kareñ kyūñ-kar

tum jafa par bhi to nahin qaem

hum wafa umr bhar karen kyun-kar

jo talab pe ahd-e-vafā kiyā to vo ābrū-e-vafā ga.ī

sar-e-ām jab hue mudda.ī to savāb-e-sidq-o-vafā gayā

jo talab pe ahd-e-wafa kiya to wo aabru-e-wafa gai

sar-e-am jab hue muddai to sawab-e-sidq-o-wafa gaya

mirī vafā hai mire muñh pe haath rakkhe hue

tū sochtā hai ki kuchh bhī nahīñ samajhtā maiñ

meri wafa hai mere munh pe hath rakkhe hue

tu sochta hai ki kuchh bhi nahin samajhta main

kisī tarah jo na us but ne e'tibār kiyā

mirī vafā ne mujhe ḳhuub sharmsār kiyā

kisi tarah jo na us but ne e'tibar kiya

meri wafa ne mujhe KHub sharmsar kiya

vafā kareñge nibāheñge baat māneñge

tumheñ bhī yaad hai kuchh ye kalām kis kā thā

wafa karenge nibahenge baat manenge

tumhein bhi yaad hai kuchh ye kalam kis ka tha

kam-sinī meñ to hasīñ ahd-e-vafā karte haiñ

bhuul jaate haiñ magar sab jo shabāb aatā hai

kam-sini mein to hasin ahd-e-wafa karte hain

bhul jate hain magar sab jo shabab aata hai

āgahī karb vafā sabr tamannā ehsās

mere hī siine meñ utre haiñ ye ḳhanjar saare

aagahi karb wafa sabr tamanna ehsas

mere hi sine mein utre hain ye KHanjar sare

dasht-e-vafā meñ jal ke na rah jaa.eñ apne dil

vo dhuup hai ki rañg haiñ kaale paḌe hue

dasht-e-wafa mein jal ke na rah jaen apne dil

wo dhup hai ki rang hain kale paDe hue

tū jafāoñ se jo badnām kiye jaatā hai

yaad aa.egī tujhe merī vafā mere baad

tu jafaon se jo badnam kiye jata hai

yaad aaegi tujhe meri wafa mere baad

ḳhuuñ huā dil ki pashīmān-e-sadāqat hai vafā

ḳhush huā jī ki chalo aaj tumhāre hue log

KHun hua dil ki pashiman-e-sadaqat hai wafa

KHush hua ji ki chalo aaj tumhaare hue log

ishq hai be-gudāz kyuuñ husn hai be-niyāz kyuuñ

merī vafā kahāñ ga.ī un kī jafā ko kyā huā

ishq hai be-gudaz kyun husn hai be-niyaz kyun

meri wafa kahan gai un ki jafa ko kya hua

vafā kā ahd thā dil ko sambhālne ke liye

vo hañs paḌe mujhe mushkil meñ Dālne ke liye

wafa ka ahd tha dil ko sambhaalne ke liye

wo hans paDe mujhe mushkil mein Dalne ke liye

bahut mushkil zamānoñ meñ bhī ham ahl-e-mohabbat

vafā par ishq kī buniyād rakhnā chāhte haiñ

bahut mushkil zamanon mein bhi hum ahl-e-mohabbat

wafa par ishq ki buniyaad rakhna chahte hain

duniyā ke sitam yaad na apnī hī vafā yaad

ab mujh ko nahīñ kuchh bhī mohabbat ke sivā yaad

duniya ke sitam yaad na apni hi wafa yaad

ab mujh ko nahin kuchh bhi mohabbat ke siwa yaad

vafā ke naam par pairā kiye kachche ghaḌe le kar

Duboyā zindagī ko dāstāñ-dar-dāstāñ ham ne

wafa ke nam par paira kiye kachche ghaDe le kar

Duboya zindagi ko dastan-dar-dastan hum ne

mujh se kyā ho sakā vafā ke sivā

mujh ko miltā bhī kyā sazā ke sivā

mujh se kya ho saka wafa ke siwa

mujh ko milta bhi kya saza ke siwa

jo unheñ vafā kī sūjhī to na ziist ne vafā kī

abhī aa ke vo na baiThe ki ham uTh ga.e jahāñ se

jo unhen wafa ki sujhi to na zist ne wafa ki

abhi aa ke wo na baiThe ki hum uTh gae jahan se

vafā ke baab meñ kār-e-suḳhan tamām huā

mirī zamīn pe ik ma.arka lahū kā bhī ho

wafa ke bab mein kar-e-suKHan tamam hua

meri zamin pe ek marka lahu ka bhi ho

mujhe ma.alūm hai ahl-e-vafā par kyā guzartī hai

samajh kar soch kar tujh se mohabbat kar rahā huuñ maiñ

mujhe malum hai ahl-e-wafa par kya guzarti hai

samajh kar soch kar tujh se mohabbat kar raha hun main

un kī jafāoñ par bhī vafā kā huā gumāñ

apnī vafāoñ ko bhī farāmosh kar diyā

un ki jafaon par bhi wafa ka hua guman

apni wafaon ko bhi faramosh kar diya

kyuuñ pashemāñ ho agar va.ada vafā ho na sakā

kahīñ va.ade bhī nibhāne ke liye hote haiñ

kyun pasheman ho agar wada wafa ho na saka

kahin wade bhi nibhane ke liye hote hain

tujh se vafā na kī to kisī se vafā na kī

kis tarah intiqām liyā apne aap se

tujh se wafa na ki to kisi se wafa na ki

kis tarah intiqam liya apne aap se

vafā kā lāzmī thā ye natīja

sazā apne kiye kī pā rahā huuñ

wafa ka lazmi tha ye natija

saza apne kiye ki pa raha hun

ham ne be-intihā vafā kar ke

be-vafāoñ se intiqām liyā

hum ne be-intiha wafa kar ke

be-wafaon se intiqam liya

ab to kar Dāliye vafā us ko

vo jo va.ada udhār rahtā hai

ab to kar Daliye wafa us ko

wo jo wada udhaar rahta hai

jo baat dil meñ thī us se nahīñ kahī ham ne

vafā ke naam se vo bhī fareb khā jaatā

jo baat dil mein thi us se nahin kahi hum ne

wafa ke nam se wo bhi fareb kha jata

unhīñ ko arz-e-vafā kā thā ishtiyāq bahut

unhīñ ko arz-e-vafā nā-gavār guzrī hai

unhin ko arz-e-wafa ka tha ishtiyaq bahut

unhin ko arz-e-wafa na-gawar guzri hai

us bevafā se kar ke vafā mar-miTā 'razā'

ik qissa-e-tavīl kā ye iḳhtisār hai

us bewafa se kar ke wafa mar-miTa 'raza'

ek qissa-e-tawil ka ye iKHtisar hai

būḌhoñ ke saath log kahāñ tak vafā kareñ

būḌhoñ ko bhī jo maut na aa.e to kyā kareñ

buDhon ke sath log kahan tak wafa karen

buDhon ko bhi jo maut na aae to kya karen

ek aurat se vafā karne kā ye tohfa milā

jaane kitnī auratoñ kī bad-duā.eñ saath haiñ

ek aurat se wafa karne ka ye tohfa mila

jaane kitni auraton ki bad-duaen sath hain

ab diloñ meñ koī gunjā.ish nahīñ miltī 'hayāt'

bas kitāboñ meñ likkhā harf-e-vafā rah jā.egā

ab dilon mein koi gunjaish nahin milti 'hayat'

bas kitabon mein likkha harf-e-wafa rah jaega

kabhī kī thī jo ab vafā kījiyegā

mujhe pūchh kar aap kyā kījiyegā

kabhi ki thi jo ab wafa kijiyega

mujhe puchh kar aap kya kijiyega

merī vafā hai us kī udāsī kā ek baab

muddat huī hai jis se mujhe ab mile hue

meri wafa hai us ki udasi ka ek bab

muddat hui hai jis se mujhe ab mile hue

aap chheḌeñ na vafā kā qissa

baat meñ baat nikal aatī hai

aap chheDen na wafa ka qissa

baat mein baat nikal aati hai

va.ada vo kar rahe haiñ zarā lutf dekhiye

va.ada ye kah rahā hai na karnā vafā mujhe

wada wo kar rahe hain zara lutf dekhiye

wada ye kah raha hai na karna wafa mujhe

ishq pāband-e-vafā hai na ki pāband-e-rusūm

sar jhukāne ko nahīñ kahte haiñ sajda karnā

ishq paband-e-wafa hai na ki paband-e-rusum

sar jhukane ko nahin kahte hain sajda karna

DhūñD ujḌe hue logoñ meñ vafā ke motī

ye ḳhazāne tujhe mumkin hai ḳharāboñ meñ mileñ

DhunD ujDe hue logon mein wafa ke moti

ye KHazane tujhe mumkin hai KHarabon mein milen

kyā maslahat-shanās thā vo aadmī 'qatīl'

majbūriyoñ kā jis ne vafā naam rakh diyā

kya maslahat-shanas tha wo aadmi 'qatil'

majburiyon ka jis ne wafa nam rakh diya

aazmā lo ki dil ko chain aa.e

ye na kahnā kahīñ vafā hī nahīñ

aazma lo ki dil ko chain aae

ye na kahna kahin wafa hi nahin

mere ba.ad vafā kā dhokā aur kisī se mat karnā

gaalī degī duniyā tujh ko sar merā jhuk jā.egā

mere baad wafa ka dhoka aur kisi se mat karna

gali degi duniya tujh ko sar mera jhuk jaega

tumhāre saath mire muḳhtalif marāsim haiñ

mirī vafā pe kabhī inhisār mat karnā

tumhaare sath mere muKHtalif marasim hain

meri wafa pe kabhi inhisar mat karna

umiid un se vafā kī to ḳhair kyā kiije

jafā bhī karte nahīñ vo kabhī jafā kī tarah

umid un se wafa ki to KHair kya kije

jafa bhi karte nahin wo kabhi jafa ki tarah

ye jafāoñ kī sazā hai ki tamāshā.ī hai tū

ye vafāoñ kī sazā hai ki pa.e-dār huuñ maiñ

ye jafaon ki saza hai ki tamashai hai tu

ye wafaon ki saza hai ki pae-dar hun main

in vafādārī ke vādoñ ko ilāhī kyā huā

vo vafā.eñ karne vaale bevafā kyuuñ ho ga.e

in wafadari ke wadon ko ilahi kya hua

wo wafaen karne wale bewafa kyun ho gae