Sher on Bewafai

kuchh to majbūriyāñ rahī hoñgī

yuuñ koī bevafā nahīñ hotā

kuchh to majburiyan rahi hongi

yun koi bewafa nahin hota

tum ne kiyā na yaad kabhī bhuul kar hameñ

ham ne tumhārī yaad meñ sab kuchh bhulā diyā

tum ne kiya na yaad kabhi bhul kar hamein

hum ne tumhaari yaad mein sab kuchh bhula diya

ham se koī ta.alluq-e-ḳhātir to hai use

vo yaar bā-vafā na sahī bevafā to hai

hum se koi talluq-e-KHatir to hai use

wo yar ba-wafa na sahi bewafa to hai

ham se kyā ho sakā mohabbat meñ

ḳhair tum ne to bevafā.ī kī

hum se kya ho saka mohabbat mein

KHair tum ne to bewafai ki

ik ajab haal hai ki ab us ko

yaad karnā bhī bevafā.ī hai

ek ajab haal hai ki ab us ko

yaad karna bhi bewafai hai

chalā thā zikr zamāne kī bevafā.ī kā

so aa gayā hai tumhārā ḳhayāl vaise hī

chala tha zikr zamane ki bewafai ka

so aa gaya hai tumhaara KHayal waise hi

bevafā.ī pe terī jī hai fidā

qahr hotā jo bā-vafā hotā

bewafai pe teri ji hai fida

qahr hota jo ba-wafa hota

is qadar musalsal thiiñ shiddateñ judā.ī kī

aaj pahlī baar us se maiñ ne bevafā.ī kī

is qadar musalsal thin shiddaten judai ki

aaj pahli bar us se main ne bewafai ki

nahīñ shikva mujhe kuchh bevafā.ī kā tirī hargiz

gilā tab ho agar tū ne kisī se bhī nibhā.ī ho

nahin shikwa mujhe kuchh bewafai ka teri hargiz

gila tab ho agar tu ne kisi se bhi nibhai ho

āshiqī meñ bahut zarūrī hai

bevafā.ī kabhī kabhī karnā

aashiqi mein bahut zaruri hai

bewafai kabhi kabhi karna

ham use yaad bahut ā.eñge

jab use bhī koī Thukrā.egā

hum use yaad bahut aaenge

jab use bhi koi Thukraega

dil bhī toḌā to salīqe se na toḌā tum ne

bevafā.ī ke bhī ādāb huā karte haiñ

dil bhi toDa to saliqe se na toDa tum ne

bewafai ke bhi aadab hua karte hain

uḌ ga.ī yuuñ vafā zamāne se

kabhī goyā kisī meñ thī hī nahīñ

uD gai yun wafa zamane se

kabhi goya kisi mein thi hi nahin

vafā kī ḳhair manātā huuñ bevafā.ī meñ bhī

maiñ us kī qaid meñ huuñ qaid se rihā.ī meñ bhī

wafa ki KHair manata hun bewafai mein bhi

main us ki qaid mein hun qaid se rihai mein bhi

mere alāva use ḳhud se bhī mohabbat hai

aur aisā karne se vo bevafā nahīñ hotī

mere alawa use KHud se bhi mohabbat hai

aur aisa karne se wo bewafa nahin hoti

mere ba.ad vafā kā dhokā aur kisī se mat karnā

gaalī degī duniyā tujh ko sar merā jhuk jā.egā

mere baad wafa ka dhoka aur kisi se mat karna

gali degi duniya tujh ko sar mera jhuk jaega

tum kisī ke bhī ho nahīñ sakte

tum ko apnā banā ke dekh liyā

tum kisi ke bhi ho nahin sakte

tum ko apna bana ke dekh liya

kaam aa sakīñ na apnī vafā.eñ to kyā kareñ

us bevafā ko bhuul na jaa.eñ to kyā kareñ

kaam aa sakin na apni wafaen to kya karen

us bewafa ko bhul na jaen to kya karen

jo milā us ne bevafā.ī kī

kuchh ajab rañg hai zamāne kā

jo mila us ne bewafai ki

kuchh ajab rang hai zamane ka

ye kyā ki tum ne jafā se bhī haath khīñch liyā

mirī vafāoñ kā kuchh to sila diyā hotā

ye kya ki tum ne jafa se bhi hath khinch liya

meri wafaon ka kuchh to sila diya hota

ham ne to ḳhud ko bhī miTā Daalā

tum ne to sirf bevafā.ī kī

hum ne to KHud ko bhi miTa Dala

tum ne to sirf bewafai ki

jaao bhī kyā karoge mehr-o-vafā

bār-hā aazmā ke dekh liyā

jao bhi kya karoge mehr-o-wafa

bar-ha aazma ke dekh liya

gila likhūñ maiñ agar terī bevafā.ī kā

lahū meñ ġharq safīna ho āshnā.ī kā

gila likhun main agar teri bewafai ka

lahu mein gharq safina ho aashnai ka

umiid un se vafā kī to ḳhair kyā kiije

jafā bhī karte nahīñ vo kabhī jafā kī tarah

umid un se wafa ki to KHair kya kije

jafa bhi karte nahin wo kabhi jafa ki tarah

vahī to markazī kirdār hai kahānī kā

usī pe ḳhatm hai tāsīr bevafā.ī kī

wahi to markazi kirdar hai kahani ka

usi pe KHatm hai tasir bewafai ki

ab zamāna hai bevafā.ī kā

siikh leñ ham bhī ye hunar shāyad

ab zamana hai bewafai ka

sikh len hum bhi ye hunar shayad

qaa.em hai ab bhī merī vafāoñ kā silsila

ik silsila hai un kī jafāoñ kā silsila

qaem hai ab bhi meri wafaon ka silsila

ek silsila hai un ki jafaon ka silsila

tum jafā par bhī to nahīñ qaa.em

ham vafā umr bhar kareñ kyūñ-kar

tum jafa par bhi to nahin qaem

hum wafa umr bhar karen kyun-kar

us bevafā se kar ke vafā mar-miTā 'razā'

ik qissa-e-tavīl kā ye iḳhtisār hai

us bewafa se kar ke wafa mar-miTa 'raza'

ek qissa-e-tawil ka ye iKHtisar hai

adhūrī vafāoñ se ummīd rakhnā

hamāre bhī dil kī ajab sādgī hai

adhuri wafaon se ummid rakhna

hamare bhi dil ki ajab sadgi hai

husain-ibn-e-alī karbalā ko jaate haiñ

magar ye log abhī tak gharoñ ke andar haiñ

husain-ibn-e-ali karbala ko jate hain

magar ye log abhi tak gharon ke andar hain

be-vafā tum bā-vafā maiñ dekhiye hotā hai kyā

ġhaiz meñ aane ko tum ho mujh ko pyaar aane ko hai

be-wafa tum ba-wafa main dekhiye hota hai kya

ghaiz mein aane ko tum ho mujh ko pyar aane ko hai

na mudārāt hamārī na adū se nafrat

na vafā hī tumheñ aa.ī na jafā hī aa.ī

na mudaraat hamari na adu se nafrat

na wafa hi tumhein aai na jafa hi aai

ġhalat-ravī ko tirī maiñ ġhalat samajhtā huuñ

ye bevafā.ī bhī shāmil mirī vafā meñ hai

ghalat-rawi ko teri main ghalat samajhta hun

ye bewafai bhi shamil meri wafa mein hai

ye jafāoñ kī sazā hai ki tamāshā.ī hai tū

ye vafāoñ kī sazā hai ki pa.e-dār huuñ maiñ

ye jafaon ki saza hai ki tamashai hai tu

ye wafaon ki saza hai ki pae-dar hun main

maiñ ḳhāndān kī pābandiyoñ se vāqif thī

ḳhudā kā shukr hai us shaḳhs ne vafā nahīñ kī

main KHandan ki pabandiyon se waqif thi

KHuda ka shukr hai us shaKHs ne wafa nahin ki