Sher on Qismat

kisī ko ghar se nikalte hī mil ga.ī manzil

koī hamārī tarah umr bhar safar meñ rahā

kisi ko ghar se nikalte hi mil gai manzil

koi hamari tarah umr bhar safar mein raha

ye na thī hamārī qismat ki visāl-e-yār hotā

agar aur jiite rahte yahī intizār hotā

ye na thi hamari qismat ki visal-e-yar hota

agar aur jite rahte yahi intizar hota

kisī ke tum ho kisī kā ḳhudā hai duniyā meñ

mire nasīb meñ tum bhī nahīñ ḳhudā bhī nahīñ

kisi ke tum ho kisi ka KHuda hai duniya mein

mere nasib mein tum bhi nahin KHuda bhi nahin

yahāñ kisī ko bhī kuchh hasb-e-ārzū na milā

kisī ko ham na mile aur ham ko tū na milā

yahan kisi ko bhi kuchh hasb-e-arzu na mila

kisi ko hum na mile aur hum ko tu na mila

bad-qismatī ko ye bhī gavārā na ho sakā

ham jis pe mar miTe vo hamārā na ho sakā

bad-qismati ko ye bhi gawara na ho saka

hum jis pe mar miTe wo hamara na ho saka

kitnā hai bad-nasīb 'zafar' dafn ke liye

do gaz zamīn bhī na milī kū-e-yār meñ

kitna hai bad-nasib 'zafar' dafn ke liye

do gaz zamin bhi na mili ku-e-yar mein

tum hamāre kisī tarah na hue

varna duniyā meñ kyā nahīñ hotā

tum hamare kisi tarah na hue

warna duniya mein kya nahin hota

ham ko na mil sakā to faqat ik sukūn-e-dil

ai zindagī vagarna zamāne meñ kyā na thā

hum ko na mil saka to faqat ek sukun-e-dil

ai zindagi wagarna zamane mein kya na tha

TuuT paḌtī thiiñ ghaTā.eñ jin kī āñkheñ dekh kar

vo bharī barsāt meñ tarse haiñ paanī ke liye

TuT paDti thin ghaTaen jin ki aankhen dekh kar

wo bhari barsat mein tarse hain pani ke liye

roz vo ḳhvāb meñ aate haiñ gale milne ko

maiñ jo sotā huuñ to jaag uThtī hai qismat merī

roz wo KHwab mein aate hain gale milne ko

main jo sota hun to jag uThti hai qismat meri

kho diyā tum ko to ham pūchhte phirte haiñ yahī

jis kī taqdīr bigaḌ jaa.e vo kartā kyā hai

kho diya tum ko to hum puchhte phirte hain yahi

jis ki taqdir bigaD jae wo karta kya hai

kabhī maiñ apne hāthoñ kī lakīroñ se nahīñ uljhā

mujhe ma.alūm hai qismat kā likkhā bhī badaltā hai

kabhi main apne hathon ki lakiron se nahin uljha

mujhe malum hai qismat ka likkha bhi badalta hai

koī manzil ke qarīb aa ke bhaTak jaatā hai

koī manzil pe pahuñchtā hai bhaTak jaane se

koi manzil ke qarib aa ke bhaTak jata hai

koi manzil pe pahunchta hai bhaTak jaane se

kabhī saaya hai kabhī dhuup muqaddar merā

hotā rahtā hai yuuñ hī qarz barābar merā

kabhi saya hai kabhi dhup muqaddar mera

hota rahta hai yun hi qarz barabar mera

bulbul ko bāġhbāñ se na sayyād se gila

qismat meñ qaid likkhī thī fasl-e-bahār meñ

bulbul ko baghban se na sayyaad se gila

qismat mein qaid likkhi thi fasl-e-bahaar mein

qismat to dekh TuuTī hai jā kar kahāñ kamand

kuchh duur apne haath se jab baam rah gayā

qismat to dekh TuTi hai ja kar kahan kamand

kuchh dur apne hath se jab baam rah gaya

justujū karnī har ik amr meñ nādānī hai

jo ki peshānī pe likkhī hai vo pesh aanī hai

justuju karni har ek amr mein nadani hai

jo ki peshani pe likkhi hai wo pesh aani hai

ḳhush-nasībī meñ hai yahī ik aib

bad-nasīboñ ke ghar nahīñ aatī

KHush-nasibi mein hai yahi ek aib

bad-nasibon ke ghar nahin aati

zor qismat pe chal nahīñ saktā

ḳhāmushī iḳhtiyār kartā huuñ

zor qismat pe chal nahin sakta

KHamushi iKHtiyar karta hun

tadbīr se qismat kī burā.ī nahīñ jaatī

bigḌī huī taqdīr banā.ī nahīñ jaatī

tadbir se qismat ki burai nahin jati

bigDi hui taqdir banai nahin jati

sunā hai ab bhī mire haath kī lakīroñ meñ

najūmiyoñ ko muqaddar dikhā.ī detā hai

suna hai ab bhi mere hath ki lakiron mein

najumiyon ko muqaddar dikhai deta hai

tujh se qismat meñ mirī sūrat-e-qufl-e-abjad

thā likhā baat ke bante hī judā ho jaanā

tujh se qismat mein meri surat-e-qufl-e-abjad

tha likha baat ke bante hi juda ho jaana

mere havās ishq meñ kyā kam haiñ muntashir

majnūñ kā naam ho gayā qismat kī baat hai

mere hawas ishq mein kya kam hain muntashir

majnun ka nam ho gaya qismat ki baat hai

ḳhudā taufīq detā hai jinheñ vo ye samajhte haiñ

ki ḳhud apne hī hāthoñ se banā kartī haiñ taqdīreñ

KHuda taufiq deta hai jinhen wo ye samajhte hain

ki KHud apne hi hathon se bana karti hain taqdiren

kab hañsā thā jo ye kahte ho ki ronā hogā

ho rahegā mirī qismat meñ jo honā hogā

kab hansa tha jo ye kahte ho ki rona hoga

ho rahega meri qismat mein jo hona hoga

haath meñ chāñd jahāñ aayā muqaddar chamkā

sab badal jā.egā qismat kā likhā jaam uThā

hath mein chand jahan aaya muqaddar chamka

sab badal jaega qismat ka likha jam uTha

maqbūl hoñ na hoñ ye muqaddar kī baat hai

sajde kisī ke dar pe kiye jā rahā huuñ maiñ

maqbul hon na hon ye muqaddar ki baat hai

sajde kisi ke dar pe kiye ja raha hun main

nairañgī-e-siyāsat-e-daurāñ to dekhiye

manzil unheñ milī jo sharīk-e-safar na the

nairangi-e-siyasat-e-dauran to dekhiye

manzil unhen mili jo sharik-e-safar na the

daulat nahīñ kaam aatī jo taqdīr burī ho

qārūn ko bhī apnā ḳhazānā nahīñ miltā

daulat nahin kaam aati jo taqdir buri ho

qarun ko bhi apna KHazana nahin milta

kabhī merī talab kachche ghaḌe par paar utartī hai

kabhī mahfūz kashtī meñ safar karne se Dartā huuñ

kabhi meri talab kachche ghaDe par par utarti hai

kabhi mahfuz kashti mein safar karne se Darta hun

ba.ad marne ke mirī qabr pe aayā 'ġhāfil'

yaad aa.ī mire iisā ko davā mere ba.ad

baad marne ke meri qabr pe aaya 'ghafil'

yaad aai mere isa ko dawa mere baad

dekhiye kyā dikhātī hai taqdīr

chup khaḌā huuñ gunāhgāroñ meñ

dekhiye kya dikhati hai taqdir

chup khaDa hun gunahgaron mein

vasl kī bantī haiñ in bātoñ se tadbīreñ kahīñ

ārzūoñ se phirā kartī haiñ taqdīreñ kahīñ

wasl ki banti hain in baaton se tadbiren kahin

aarzuon se phira karti hain taqdiren kahin

'adam' roz-e-ajal jab qismateñ taqsīm hotī thiiñ

muqaddar kī jagah maiñ sāġhar-o-mīnā uThā laayā

'adam' roz-e-ajal jab qismaten taqsim hoti thin

muqaddar ki jagah main saghar-o-mina uTha laya

aisī qismat kahāñ ki jaam aatā

bū-e-mai bhī idhar nahīñ aa.ī

aisi qismat kahan ki jam aata

bu-e-mai bhi idhar nahin aai

hamesha tinke hī chunte guzar ga.ī apnī

magar chaman meñ kahīñ āshiyāñ banā na sake

hamesha tinke hi chunte guzar gai apni

magar chaman mein kahin aashiyan bana na sake

apne māthe kī shikan tum se miTā.ī na ga.ī

apnī taqdīr ke bal ham se nikāle na ga.e

apne mathe ki shikan tum se miTai na gai

apni taqdir ke bal hum se nikale na gae

likkhā hai jo taqdīr meñ hogā vahī ai dil

sharminda na karnā mujhe tū dast-e-duā kā

likkha hai jo taqdir mein hoga wahi ai dil

sharminda na karna mujhe tu dast-e-dua ka

phuul khile haiñ gulshan gulshan

lekin apnā apnā dāman

phul khile hain gulshan gulshan

lekin apna apna daman

yaar par ilzām kaisā ai dil-e-ḳhāna-ḳharāb

jo kiyā tujh se tirī qismat ne us ne kyā kiyā

yar par ilzam kaisa ai dil-e-KHana-KHarab

jo kiya tujh se teri qismat ne us ne kya kiya

ishq ne mansab likhe jis din mirī taqdīr meñ

daaġh kī naqadī milī sahrā milā jāgīr meñ

ishq ne mansab likhe jis din meri taqdir mein

dagh ki naqadi mili sahra mila jagir mein

jo chal paḌe the azm-e-safar le ke thak ga.e

jo laḌkhaḌā rahe the vo manzil pe aa.e haiñ

jo chal paDe the azm-e-safar le ke thak gae

jo laDkhaDa rahe the wo manzil pe aae hain

shā.erī hai sarmāyā ḳhush-nasīb logoñ kā

baañs kī har ik Tahnī bāñsurī nahīñ hotī

shaeri hai sarmaya KHush-nasib logon ka

bans ki har ek Tahni bansuri nahin hoti

usī ko dasht-e-ḳhizāñ ne kiyā bahut pāmāl

jo phuul sab se hasīñ mausam-e-bahār meñ thā

usi ko dasht-e-KHizan ne kiya bahut pamal

jo phul sab se hasin mausam-e-bahaar mein tha

itnā bhī bār-e-ḳhātir-e-gulshan na ho koī

TuuTī vo shāḳh jis pe mirā āshiyāna thā

itna bhi bar-e-KHatir-e-gulshan na ho koi

TuTi wo shaKH jis pe mera aashiyana tha

merī qismat hai ye āvāra-ḳhirāmī 'sājid'

dasht ko raah nikaltī hai na ghar aatā hai

meri qismat hai ye aawara-KHirami 'sajid'

dasht ko rah nikalti hai na ghar aata hai

maiñ jāñ-ba-lab huuñ ai taqdīr tere hāthoñ se

ki tere aage mirī kuchh na chal sakī tadbīr

main jaan-ba-lab hun ai taqdir tere hathon se

ki tere aage meri kuchh na chal saki tadbir