Sher on Baam

ham hī un ko baam pe laa.e aur hamīñ mahrūm rahe

parda hamāre naam se uTThā aañkh laḌā.ī logoñ ne

hum hi un ko baam pe lae aur hamin mahrum rahe

parda hamare nam se uTTha aankh laDai logon ne

qismat to dekh TuuTī hai jā kar kahāñ kamand

kuchh duur apne haath se jab baam rah gayā

qismat to dekh TuTi hai ja kar kahan kamand

kuchh dur apne hath se jab baam rah gaya

ai kaash hamārī qismat meñ aisī bhī koī shaam aa jaa.e

ik chāñd falak par niklā ho ik chāñd sar-e-bām aa jaa.e

ai kash hamari qismat mein aisi bhi koi sham aa jae

ek chand falak par nikla ho ek chand sar-e-baam aa jae

ab ḳhaak uḌ rahī hai yahāñ intizār kī

ai dil ye bām-o-dar kisī jān-e-jahāñ ke the

ab KHak uD rahi hai yahan intizar ki

ai dil ye baam-o-dar kisi jaan-e-jahan ke the

āñkhoñ meñ damak uTThī hai tasvīr-e-dar-o-bām

ye kaun gayā mere barābar se nikal kar

aankhon mein damak uTThi hai taswir-e-dar-o-baam

ye kaun gaya mere barabar se nikal kar

ik dāstān ab bhī sunāte haiñ farsh o baam

vo kaun thī jo raqs ke aalam meñ mar ga.ī

ek dastan ab bhi sunate hain farsh o baam

wo kaun thi jo raqs ke aalam mein mar gai

ik barf sī jamī rahe dīvār-o-bām par

ik aag mere kamre ke andar lagī rahe

ek barf si jami rahe diwar-o-baam par

ek aag mere kamre ke andar lagi rahe

ahbāb mujh se qat-e-ta.alluq kareñ 'jigar'

ab āftāb-e-zīst lab-e-bām aa gayā

ahbab mujh se qat-e-talluq karen 'jigar'

ab aaftab-e-zist lab-e-baam aa gaya

ek añgḌā.ī se saare shahr ko niiñd aa ga.ī

ye tamāshā maiñ ne dekhā baam par hotā huā

ek angDai se sare shahr ko nind aa gai

ye tamasha main ne dekha baam par hota hua

jal uThe bazm-e-ġhair ke dar-o-bām

jab bhī ham ḳhānumāñ-ḳharāb aa.e

jal uThe bazm-e-ghair ke dar-o-baam

jab bhi hum KHanuman-KHarab aae

allāh-re un ke husn kī mojiz-numā.iyāñ

jis baam par vo aa.eñ vahī koh-e-tūr ho

allah-re un ke husn ki mojiz-numaiyan

jis baam par wo aaen wahi koh-e-tur ho

jab safar se lauT kar aa.e to kitnā dukh huā

is purāne baam par vo sūrat-e-zebā na thī

jab safar se lauT kar aae to kitna dukh hua

is purane baam par wo surat-e-zeba na thi

maiñ jāntā huuñ makīnoñ kī ḳhāmushī kā sabab

makāñ se pahle dar-o-bām se milā huuñ maiñ

main jaanta hun makinon ki KHamushi ka sabab

makan se pahle dar-o-baam se mila hun main

mujh ko bhī jāgne kī aziyyat se de najāt

ai raat ab to ghar ke dar-o-bām so ga.e

mujh ko bhi jagne ki aziyyat se de najat

ai raat ab to ghar ke dar-o-baam so gae

judā thī baam se dīvār dar akelā thā

makīñ the ḳhud meñ magan aur ghar akelā thā

juda thi baam se diwar dar akela tha

makin the KHud mein magan aur ghar akela tha

mujhe rahne ko vo milā hai ghar ki jo āfatoñ kī hai rahguzar

tumheñ ḳhāksāroñ kī kyā ḳhabar kabhī nīche utre ho baam se

mujhe rahne ko wo mila hai ghar ki jo aafaton ki hai rahguzar

tumhein KHaksaron ki kya KHabar kabhi niche utre ho baam se

vo sub.h ko is Dar se nahīñ baam par aatā

naama na koī bāñdh de sūraj kī kiran meñ

wo subh ko is Dar se nahin baam par aata

nama na koi bandh de suraj ki kiran mein

ham lab-e-gor ho ga.e zālim

tū lab-e-bām kyuuñ nahīñ aatā

hum lab-e-gor ho gae zalim

tu lab-e-baam kyun nahin aata

koī bhī sajnī kisī bhī sājan kī muntazir hai na muztarib hai

tamām baam aur dar bujhe haiñ kahīñ bhī raushan diyā nahīñ hai

koi bhi sajni kisi bhi sajan ki muntazir hai na muztarib hai

tamam baam aur dar bujhe hain kahin bhi raushan diya nahin hai