زمانہ حسن نزاکت بلا جفا شوخی

سمٹ کے آ گئے سب آپ کی اداؤں میں

ازل سے تا بہ ابد ایک ہی کہانی ہے

اسی سے ہم کو نئی داستاں بنانی ہے

ہم نہ مانیں گے خموشی ہے تمنا کا مزاج

ہاں بھری بزم میں وہ بول نہ پائی ہوگی

چمن کا حسن سمجھ کر سمیٹ لائے تھے

کسے خبر تھی کہ ہر پھول خار نکلے گا

دنیا تو سیدھی ہے لیکن دنیا والے

جھوٹی سچی کہہ کے اسے بہکاتے ہوں گے

اب کوئی ڈھونڈ ڈھانڈ کے لاؤ نیا وجود

انسان تو بلندی انساں سے گھٹ گیا

حیات لاکھ ہو فانی مگر یہ سن رکھئے

حیات سے جو ہے مقصود غیر فانی ہے

بہار آئی گلوں کو ہنسی نہیں آئی

کہیں سے بو تری گفتار کی نہیں آئی

سامنا آج انا سے ہوگا

بات رکھنی ہے تو سر دے دینا

خرد ڈھونڈھتی رہ گئی وجہ غم

مزا غم کا درد آشنا لے گیا

بات اگر نہ کرنی تھی کیوں چمن میں آئے تھے

رنگ کیوں بکھیرا تھا پھول کیوں کھلائے تھے

لب خرد سے یہی بار بار نکلے گا

نکالنے ہی سے دل کا غبار نکلے گا

جب فکروں پر بادل سے منڈلاتے ہوں گے

انساں گھٹ کر سائے سے رہ جاتے ہوں گے

سراغ مہر و محبت کا ڈھونڈیو نہ کہیں

کہ ان کی راکھ ہوا میں بکھیر آیا میں