bichhḌā kuchh is adā se ki rut hī badal ga.ī

ik shaḳhs saare shahr ko vīrān kar gayā

bichhDa kuchh is ada se ki rut hi badal gai

ek shaKHs sare shahr ko viran kar gaya

'ḳhālid' maiñ baat baat pe kahtā thā jis ko jaan

vo shaḳhs āḳhirash mujhe be-jān kar gayā

'KHalid' main baat baat pe kahta tha jis ko jaan

wo shaKHs aaKHirash mujhe be-jaan kar gaya

āsmāñ jhāñk rahā hai 'ḳhālid'

chāñd kamre meñ mire utrā hai

aasman jhank raha hai 'KHalid'

chand kamre mein mere utra hai

nākām hasratoñ ke sivā kuchh nahīñ rahā

duniyā meñ ab dukhoñ ke sivā kuchh nahīñ rahā

nakaam hasraton ke siwa kuchh nahin raha

duniya mein ab dukhon ke siwa kuchh nahin raha

aaj kuchh rañg digar hai mire ghar kā 'ḳhālid'

sochtā huuñ ye tirī yaad hai yā ḳhud tū hai

aaj kuchh rang digar hai mere ghar ka 'KHalid'

sochta hun ye teri yaad hai ya KHud tu hai

aañkh kis lafz pe bhar aa.ī hai

kaun sī baat pe dil TuuTā hai

aankh kis lafz pe bhar aai hai

kaun si baat pe dil TuTa hai

tum ḳhush raho hamārī duā hai tamām-umr

apnī to ḳhair jaisī bhī guzrī guzar ga.ī

tum KHush raho hamari dua hai tamam-umr

apni to KHair jaisi bhi guzri guzar gai

aaj se ik dūsre ko qatl karnā hai hameñ

tū mirā paikar nahīñ hai maiñ tirā saaya nahīñ

aaj se ek dusre ko qatl karna hai hamein

tu mera paikar nahin hai main tera saya nahin

zaḳhm risne lagā hai phir shāyad

yaad us ne kiyā hai phir shāyad

zaKHm risne laga hai phir shayad

yaad us ne kiya hai phir shayad

vo to gayā ab apnī anā ko sameT le

ai ġham-gusār dast-e-duā ko sameT le

wo to gaya ab apni ana ko sameT le

ai gham-gusar dast-e-dua ko sameT le