یکجائی سے پل بھر کی خود آرائی بھلی تھی

شعلے سے نکل آئے شرارے کی طرح ہم

سمجھ لیا تھا تجھے دوست ہم نے دھوکے میں

سو آج سے تجھے بار دگر سمجھتے ہیں

خواہش ہے کہ خود کو بھی کبھی دور سے دیکھوں

منظر کا نظارہ کروں منظر سے نکل کر

یہ تو دنیا بھی نہیں ہے کہ کنارا کر لے

تو کہاں جائے گا اے دل کے ستائے ہوئے شخص

برون خاک فقط چند ٹھیکرے ہیں مگر

یہاں سے شہر ملیں گے اگر کھدائی ہوئی

سورج کے افق ہوتے ہیں منزل نہیں ہوتی

سو ڈھلتا رہا جلتا رہا چلتا رہا میں

میں چاہتا ہوں اسے اور چاہنے کے سوا

مرے لیے تو کوئی اور راستا بھی نہیں

نظر تو اپنے مناظر کے رمز جانتی ہے

کہ آنکھ کہہ نہیں سکتی سنی سنائی ہوئی

یہ جو میں اتنی سہولت سے تجھے چاہتا ہوں

دوست اک عمر میں ملتی ہے یہ آسانی بھی

ہر اک افق پہ مسلسل طلوع ہوتا ہوا

میں آفتاب کے مانند رہ گزار میں تھا

ہر ایک جسم میں موجود ہشت پا کی طرح

وبا کا خوف ہے خود بھی کسی وبا کی طرح

پکا رستہ کچی سڑک اور پھر پگڈنڈی

جیسے کوئی چلتے چلتے تھک جاتا ہے

حیرت سے تکتا ہے صحرا بارش کے نذرانے کو

کتنی دور سے آئی ہے یہ ریت سے ہاتھ ملانے کو

کچھ اور بھی درکار تھا سب کچھ کے علاوہ

کیا ہوگا جسے ڈھونڈتا تھا تیرے سوا میں

ہر شے سے پلٹ رہی ہیں نظریں

منظر کوئی جم نہیں رہا ہے

تیری شکست اصل میں میری شکست ہے

تو مجھ سے ایک بار بھی ہارا تو میں گیا

وہ چاہتا تھا کہ دیکھے مجھے بکھرتے ہوئے

سو اس کا جشن بصد اہتمام میں نے کیا

تمام عمر یہاں کس کا انتظار ہوا ہے

تمام عمر مرا کون انتظار کرے گا

ایسا ہے کہ سکوں کی طرح ملک سخن میں

جاری کوئی اک یاد پرانی کریں ہم بھی

کسی الاؤ کا شعلہ بھڑک کے بولتا ہے

سفر کٹھن ہے مگر ایک بار آخری بار

مجھے یہ سارے مسیحا عزیز ہیں لیکن

یہ کہہ رہے ہیں کہ میں تم سے فاصلہ رکھوں

جان ہے تو جہان ہے دل ہے تو آرزو بھی ہے

عشق بھی ہو رہے گا پھر جان ابھی بچایئے

اتنی سیاہ رات میں اتنی سی روشنی

یہ چاند وہ نہیں مرا مہتاب اور ہے

مزاج درد کو سب لفظ بھی قبول نہ تھے

کسی کسی کو ترے غم کا استعارہ کیا

ان سے بھی میری دوستی ان سے بھی رنجشیں

سینے میں ایک حلقۂ احباب اور ہے

آخر اک روز اترنی ہے لبادوں کی طرح

تن ملبوس! یہ پہنی ہوئی عریانی بھی

یہ میری کاغذی کشتی ہے اور یہ میں ہوں

خبر نہیں کہ سمندر کا فیصلہ کیا ہے

بہت دنوں میں مرے گھر کی خاموشی ٹوٹی

خود اپنے آپ سے اک دن کلام میں نے کیا