jise ishq kā tiir kaarī lage

use zindagī kyuuñ na bhārī lage

jise ishq ka tir kari lage

use zindagi kyun na bhaari lage

muflisī sab bahār khotī hai

mard kā e'tibār khotī hai

muflisi sab bahaar khoti hai

mard ka e'tibar khoti hai

yaad karnā har ghaḌī tujh yaar kā

hai vazīfa mujh dil-e-bīmār kā

yaad karna har ghaDi tujh yar ka

hai wazifa mujh dil-e-bimar ka

chāhtā hai is jahāñ meñ gar bahisht

jā tamāshā dekh us ruḳhsār kā

chahta hai is jahan mein gar bahisht

ja tamasha dekh us ruKHsar ka

phir merī ḳhabar lene vo sayyād na aayā

shāyad ki mirā haal use yaad na aayā

phir meri KHabar lene wo sayyaad na aaya

shayad ki mera haal use yaad na aaya

kiyā mujh ishq ne zālim kuuñ aab āhista āhista

ki ātish gul kuuñ kartī hai gulāb āhista āhista

kiya mujh ishq ne zalim kun aab aahista aahista

ki aatish gul kun karti hai gulab aahista aahista

dil-e-ushshāq kyuuñ na ho raushan

jab ḳhayāl-e-sanam charāġh huā

dil-e-ushshaq kyun na ho raushan

jab KHayal-e-sanam charagh hua

ḳhūb-rū ḳhuub kaam karte haiñ

yak nigah meñ ġhulām karte haiñ

KHub-ru KHub kaam karte hain

yak nigah mein ghulam karte hain

tujh lab kī sifat la.al-e-badaḳhshāñ suuñ kahūñgā

jaadū haiñ tire nain ġhazālāñ suuñ kahūñgā

tujh lab ki sifat lal-e-badaKHshan sun kahunga

jadu hain tere nain ghazalan sun kahunga

gul hue ġharq āb-e-shabnam meñ

dekh us sāhib-e-hayā kī adā

gul hue gharq aab-e-shabnam mein

dekh us sahib-e-haya ki ada

pī ke bairāg kī udāsī suuñ

dil pe mere sadā udāsī hai

pi ke bairag ki udasi sun

dil pe mere sada udasi hai

rāh-e-mazmūn-e-tāza band nahīñ

tā qayāmat khulā hai bāb-e-suḳhan

rah-e-mazmun-e-taza band nahin

ta qayamat khula hai bab-e-suKHan

aaj terī bhavāñ ne masjid meñ

hosh khoyā hai har namāzī kā

aaj teri bhawan ne masjid mein

hosh khoya hai har namazi ka

ārzū-e-chashma-e-kausar na.iiñ

tishna-lab huuñ sharbat-e-dīdār kā

aarzu-e-chashma-e-kausar nain

tishna-lab hun sharbat-e-didar ka

dekhnā har sub.h tujh ruḳhsār kā

hai mutāla matla-e-anvār kā

dekhna har subh tujh ruKHsar ka

hai mutala matla-e-anwar ka

shaġhl behtar hai ishq-bāzī kā

kyā haqīqī o kyā majāzī kā

shaghl behtar hai ishq-bazi ka

kya haqiqi o kya majazi ka

tere lab ke huqūq haiñ mujh par

kyuuñ bhulā duuñ maiñ dil se haqq-e-namak

tere lab ke huquq hain mujh par

kyun bhula dun main dil se haqq-e-namak

ai nūr-e-jān-o-dīda tire intizār meñ

muddat huī palak suuñ palak āshnā na.iiñ

ai nur-e-jaan-o-dida tere intizar mein

muddat hui palak sun palak aashna nain

har zarra us kī chashm meñ labrez-e-nūr hai

dekhā hai jis ne husn-e-tajalli bahār kā

har zarra us ki chashm mein labrez-e-nur hai

dekha hai jis ne husn-e-tajalli bahaar ka

kishan kī gopiyāñ kī na.iiñ hai ye nasl

raheñ sab gopiyāñ vo naql ye asl

kishan ki gopiyan ki nain hai ye nasl

rahen sab gopiyan wo naql ye asl

jāma-zeboñ ko kyuuñ tajūñ ki mujhe

gher rakhtā hai daur dāman kā

jama-zebon ko kyun tajun ki mujhe

gher rakhta hai daur daman ka

rashk suuñ tujh labāñ kī surḳhī par

jigar-e-lāla daaġh daaġh huā

rashk sun tujh laban ki surKHi par

jigar-e-lala dagh dagh hua

aaj tujh yaad ne ai dilbar-e-shīrīñ-harakāt

aah ko dil ke upar tesha-e-farhād kiyā

aaj tujh yaad ne ai dilbar-e-shirin-harakat

aah ko dil ke upar tesha-e-farhad kiya

na ho kyuuñ shor dil kī bāñsulī meñ

malāhat kā salonā kaan pahuñchā

na ho kyun shor dil ki bansuli mein

malahat ka salona kan pahuncha

mire dil kī tajallī kyoñ rahe poshīda majlis meñ

za'īfī suuñ huā hai parda-e-fānūs tan merā

mere dil ki tajalli kyon rahe poshida majlis mein

za'ifi sun hua hai parda-e-fanus tan mera

chhupā huuñ maiñ sadā-e-bāñsulī meñ

ki tā jānūñ parī-rū kī galī meñ

chhupa hun main sada-e-bansuli mein

ki ta jaanun pari-ru ki gali mein