حالات پر اشعار

صبح ہوتے ہی نکل آتے ہیں بازار میں لوگ

گٹھریاں سر پہ اٹھائے ہوئے ایمانوں کی

حالات سے خوف کھا رہا ہوں

شیشے کے محل بنا رہا ہوں

یہ دھوپ تو ہر رخ سے پریشان کرے گی

کیوں ڈھونڈ رہے ہو کسی دیوار کا سایہ

بچوں کے ساتھ آج اسے دیکھا تو دکھ ہوا

ان میں سے کوئی ایک بھی ماں پر نہیں گیا

مرے حالات کو بس یوں سمجھ لو

پرندے پر شجر رکھا ہوا ہے

اگر بدل نہ دیا آدمی نے دنیا کو

تو جان لو کہ یہاں آدمی کی خیر نہیں

جمع کرتی ہے مجھے رات بہت مشکل سے

صبح کو گھر سے نکلتے ہی بکھرنے کے لیے

ان گنت خونی مسائل کی ہوا ایسی چلی

رنج و غم کی گرد میں لپٹا ہر اک چہرہ ملا

مجھ سے زیادہ کون تماشہ دیکھ سکے گا

گاندھی جی کے تینوں بندر میرے اندر

کیسے مانوں کہ زمانے کی خبر رکھتی ہے

گردش وقت تو بس مجھ پہ نظر رکھتی ہے

پریشانی اگر ہے تو پریشانی کا حل بھی ہے

پریشاں حال رہنے سے پریشانی نہیں جاتی

منسوب چراغوں سے طرفدار ہوا کے

تم لوگ منافق ہو منافق بھی بلا کے

دیکھو تو ہر بغل میں ہے دفتر دبا ہوا

اخبار میں جو چھاپنا چاہو خبر نہیں

میں آج زد پہ اگر ہوں تو خوش گمان نہ ہو

چراغ سب کے بجھیں گے ہوا کسی کی نہیں