Sher on Mizah

akbar dabe nahīñ kisī sultāñ kī fauj se

lekin shahīd ho ga.e biivī kī nauj se

akbar dabe nahin kisi sultan ki fauj se

lekin shahid ho gae biwi ki nauj se

lipaT bhī jā na ruk 'akbar' ġhazab kī beauty hai

nahīñ nahīñ pe na jā ye hayā kī duty hai

lipaT bhi ja na ruk 'akbar' ghazab ki beauty hai

nahin nahin pe na ja ye haya ki duty hai

ġhazab hai vo ziddī baḌe ho ga.e

maiñ leTā to uTh ke khaḌe ho ga.e

ghazab hai wo ziddi baDe ho gae

main leTa to uTh ke khaDe ho gae

haqīqī aur majāzī shā.erī meñ farq ye paayā

ki vo jaame se bāhar hai ye pājāme se bāhar hai

haqiqi aur majazi shaeri mein farq ye paya

ki wo jame se bahar hai ye pajame se bahar hai

is qadar thā khaTmaloñ kā chārpā.ī meñ hujūm

vasl kā dil se mire armān ruḳhsat ho gayā

is qadar tha khaTmalon ka chaarpai mein hujum

wasl ka dil se mere arman ruKHsat ho gaya

dhamkā ke bose lūñgā ruḳh-e-rashk-e-māh kā

chandā vasūl hotā hai sāhab dabāv se

dhamka ke bose lunga ruKH-e-rashk-e-mah ka

chanda wasul hota hai sahab dabaw se

jab ġham huā chaḌhā liiñ do botaleñ ikaTThī

mullā kī dauḌ masjid 'akbar' kī dauḌ bhaTTī

jab gham hua chaDha lin do botalen ikaTThi

mulla ki dauD masjid 'akbar' ki dauD bhaTTi

ham ne kitne dhoke meñ sab jīvan kī barbādī kī

gaal pe ik til dekh ke un ke saare jism se shādī kī

hum ne kitne dhoke mein sab jiwan ki barbaadi ki

gal pe ek til dekh ke un ke sare jism se shadi ki

jab bhī vālid kī jafā yaad aa.ī

apne daadā kī ḳhatā yaad aa.ī

jab bhi walid ki jafa yaad aai

apne dada ki KHata yaad aai

aam terī ye ḳhush-nasībī hai

varna langḌoñ pe kaun martā hai

aam teri ye KHush-nasibi hai

warna langDon pe kaun marta hai

urdu se ho kyuuñ bezār english se kyuuñ itnā pyaar

chhoḌo bhī ye raTTā yaar twinkle twinkle little star

urdu se ho kyun bezar english se kyun itna pyar

chhoDo bhi ye raTTa yar twinkle twinkle little star

ta.alluq āshiq o māshūq kā to lutf rakhtā thā

maze ab vo kahāñ baaqī rahe biivī miyāñ ho kar

talluq aashiq o mashuq ka to lutf rakhta tha

maze ab wo kahan baqi rahe biwi miyan ho kar

sirf mehnat kyā hai 'anvar' kāmyābī ke liye

koī uupar se bhī telephone honā chāhiye

sirf mehnat kya hai 'anwar' kaamyabi ke liye

koi upar se bhi telephone hona chahiye

hai kāmyābī-e-mardāñ meñ haath aurat kā

magar tū ek hī aurat pe inhisār na kar

hai kaamyabi-e-mardan mein hath aurat ka

magar tu ek hi aurat pe inhisar na kar

begam bhī haiñ khaḌī huī maidān-e-hashr meñ

mujh se mire gunah kā hisāb ai ḳhudā na maañg

begam bhi hain khaDi hui maidan-e-hashr mein

mujh se mere gunah ka hisab ai KHuda na mang

us kī beTī ne uThā rakkhī hai duniyā sar par

ḳhairiyat guzrī ki añgūr ke beTā na huā

us ki beTi ne uTha rakkhi hai duniya sar par

KHairiyat guzri ki angur ke beTa na hua

butoñ ke pahle bande the misoñ ke ab hue ḳhādim

hameñ har ahd meñ mushkil rahā hai bā-ḳhudā honā

buton ke pahle bande the mison ke ab hue KHadim

hamein har ahd mein mushkil raha hai ba-KHuda hona

har mulk is ke aage jhuktā hai ehtirāman

har mulk kā hai father hindostāñ hamārā

har mulk is ke aage jhukta hai ehtiraman

har mulk ka hai father hindostan hamara

laundry kholī thī us ke ishq meñ

par vo kapḌe ham se dhulvātā nahīñ

laundry kholi thi us ke ishq mein

par wo kapDe hum se dhulwata nahin

hoñT kī shīrīniyāñ college meñ jab baTne lagīñ

chaar din ke chhokre karne lage farhādiyāñ

honT ki shiriniyan college mein jab baTne lagin

chaar din ke chhokre karne lage farhadiyan

kyā pūchhte ho 'akbar'-e-shorīda-sar kā haal

ḳhufiya police se pūchh rahā hai kamar kā haal

kya puchhte ho 'akbar'-e-shorida-sar ka haal

KHufiya police se puchh raha hai kamar ka haal

do sagī bahnoñ kī do gañjoñ se shādī ho ga.ī

aur ye be-zulf bhī ham-zulf kahlāne lage

do sagi bahnon ki do ganjon se shadi ho gai

aur ye be-zulf bhi ham-zulf kahlane lage