zindagī ik savāl hai jis kā javāb maut hai

maut bhī ik savāl hai jis kā javāb kuchh nahīñ

zindagi ek sawal hai jis ka jawab maut hai

maut bhi ek sawal hai jis ka jawab kuchh nahin

kahānī apnī apnī ahl-e-mahfil jab sunāte haiñ

mujhe bhī yaad ik bhūlā huā afsāna aatā hai

kahani apni apni ahl-e-mahfil jab sunate hain

mujhe bhi yaad ek bhula hua afsana aata hai

zabān o dahan se jo khulte nahīñ haiñ

vo khul jaate haiñ raaz aksar nazar se

zaban o dahan se jo khulte nahin hain

wo khul jate hain raaz aksar nazar se

mukammal dāstāñ kā iḳhtisār itnā hī kaafī hai

sulāyā shor-e-duniyā ne jagāyā shor-e-mahshar ne

mukammal dastan ka iKHtisar itna hi kafi hai

sulaya shor-e-duniya ne jagaya shor-e-mahshar ne

tumhārī bazm bhī kyā bazm hai ādāb haiñ kaise

vahī maqbūl hotā hai jo gustāḳhāna aatā hai

tumhaari bazm bhi kya bazm hai aadab hain kaise

wahi maqbul hota hai jo gustaKHana aata hai

zamāne kī kashākash kā diyā paiham pata mujh ko

kahīñ TuuTe hue dil ne kahīñ TuuTe hue sar ne

zamane ki kashakash ka diya paiham pata mujh ko

kahin TuTe hue dil ne kahin TuTe hue sar ne

zamīñ par haiñ vo kuchh miTTī ke putle

ki jin meñ rif.ateñ haiñ āsmāñ kī

zamin par hain wo kuchh miTTi ke putle

ki jin mein rifaten hain aasman ki