eid kā chāñd tum ne dekh liyā

chāñd kī eid ho ga.ī hogī

eid ka chand tum ne dekh liya

chand ki eid ho gai hogi

maiñ to itnā bhī samajhne se rahā hoñ qāsir

raah takne ke sivā aañkh kā maqsad kyā hai

main to itna bhi samajhne se raha hon qasir

rah takne ke siwa aankh ka maqsad kya hai

itne zālim na bano kuchh to muravvat sīkho

tum pe marte haiñ to kyā maar hī Dāloge hameñ

itne zalim na bano kuchh to murawwat sikho

tum pe marte hain to kya mar hi Daloge hamein

maiñ apne aap se rahtā huuñ duur eid ke din

ik ajnabī sā takalluf na.e libās meñ hai

main apne aap se rahta hun dur eid ke din

ek ajnabi sa takalluf nae libas mein hai

dil kā darvāza khulā thā koī Tiktā kaise

jo bhī aatā thā vo jaane ke liye aatā thā

dil ka darwaza khula tha koi Tikta kaise

jo bhi aata tha wo jaane ke liye aata tha

tirī tārīf karne lag gayā huuñ

mohabbat ne diyānat chhīn lī hai

teri tarif karne lag gaya hun

mohabbat ne diyanat chhin li hai

maiñ ne jitne bhī log dekhe haiñ

sab ke sīnoñ meñ rog dekhe haiñ

main ne jitne bhi log dekhe hain

sab ke sinon mein rog dekhe hain

jab chhoḌ gayā thā to kahāñ chhoḌ gayā thā

lauTā hai to lagtā hai ki ab chhoḌ gayā hai

jab chhoD gaya tha to kahan chhoD gaya tha

lauTa hai to lagta hai ki ab chhoD gaya hai

nahīñ nahīñ maiñ akelā to dil-girafta na thā

shajar bhī baiThā thā mujh se kamar lagā.e hue

nahin nahin main akela to dil-girafta na tha

shajar bhi baiTha tha mujh se kamar lagae hue

vo shahr bhar ko fasāne sunātā phirtā hai

hamāre sāmne sachchā bane to baat bane

wo shahr bhar ko fasane sunata phirta hai

hamare samne sachcha bane to baat bane

maiñ ḳhud udaas khaḌā thā kaTe daraḳht ke paas

parinda uḌ ke mire haath par utar aaya

main KHud udas khaDa tha kaTe daraKHt ke pas

parinda uD ke mere hath par utar aaya

kaun kāfir hai jo khelegā diyānat se yahāñ

jab mirī jiit hai vābasta tirī haar ke saath

kaun kafir hai jo khelega diyanat se yahan

jab meri jit hai wabasta teri haar ke sath

tum ne tāroñ ko rahnumā jaanā

ham ne tāroñ kī rahnumā.ī kī

tum ne taron ko rahnuma jaana

hum ne taron ki rahnumai ki

maiñ jis meñ dafn huuñ ik chaltī phirtī qabr hai ye

janam nahīñ thā vo dar-asl mar gayā thā maiñ

main jis mein dafn hun ek chalti phirti qabr hai ye

janam nahin tha wo dar-asl mar gaya tha main

jahāñ tasvīr banvāne kī ḳhātir log aate the

vahāñ pas-manzar-e-tasvīr jo dīvār thī maiñ thā

jahan taswir banwane ki KHatir log aate the

wahan pas-manzar-e-taswir jo diwar thi main tha

bajtā rahtā hai musalsal kisī barbat kī tarah

kis kī dastak pe lagā hai mirā darvāza-e-dil

bajta rahta hai musalsal kisi barbat ki tarah

kis ki dastak pe laga hai mera darwaza-e-dil

TuuTī nishast-e-dil to mohabbat kī aabrū

vāpas usī maqām pe laa.ī na jā sakī

TuTi nishast-e-dil to mohabbat ki aabru

wapas usi maqam pe lai na ja saki

khīñch laatī hai samundar se jazīre sar-e-āb

jab mirī aañkh ko manzar kī tamanna ho jaa.e

khinch lati hai samundar se jazire sar-e-ab

jab meri aankh ko manzar ki tamanna ho jae

use ehsās honā chāhiye thā

ki bachche ko khilaunā chāhiye thā

use ehsas hona chahiye tha

ki bachche ko khilauna chahiye tha

vo shauq-e-rabt-e-nau meñ khaḌī jhūltī rahī

maiñ shāḳh-e-e.atibār se phal kī tarah girā

wo shauq-e-rabt-e-nau mein khaDi jhulti rahi

main shaKH-e-eatibar se phal ki tarah gira

tirī rū-numā.ī kī raat bhī maiñ jahāñ khaḌā thā khaḌā rahā

ki hujūm-e-shahr ko chiir kar mujhe rāsta nahīñ chāhiye

teri ru-numai ki raat bhi main jahan khaDa tha khaDa raha

ki hujum-e-shahr ko chir kar mujhe rasta nahin chahiye