اتنا بھی ناامید دل کم نظر نہ ہو

ممکن نہیں کہ شام الم کی سحر نہ ہو

خدا سے کیا محبت کر سکے گا

جسے نفرت ہے اس کے آدمی سے

عقل سے صرف ذہن روشن تھا

عشق نے دل میں روشنی کی ہے

زندگی سے تو خیر شکوہ تھا

مدتوں موت نے بھی ترسایا

اللہ رے بے خودی کہ ترے پاس بیٹھ کر

تیرا ہی انتظار کیا ہے کبھی کبھی

گناہوں سے ہمیں رغبت نہ تھی مگر یا رب

تری نگاہ کرم کو بھی منہ دکھانا تھا

ترا ہجر میرا نصیب ہے ترا غم ہی میری حیات ہے

مجھے تیری دوری کا غم ہو کیوں تو کہیں بھی ہو مرے پاس ہے

محفل ان کی ساقی ان کا

آنکھیں اپنی باقی ان کا

زندگی نام ہے جدائی کا

آپ آئے تو مجھ کو یاد آیا

خدا سے لوگ بھی خائف کبھی تھے

مگر لوگوں سے اب خائف خدا ہے

محسوس بھی ہو جائے تو ہوتا نہیں بیاں

نازک سا ہے جو فرق گناہ و ثواب میں

کسی کے جور و ستم کا تو اک بہانا تھا

ہمارے دل کو بہرحال ٹوٹ جانا تھا

طوفان غم کی تند ہواؤں کے باوجود

اک شمع آرزو ہے جو اب تک بجھی نہیں

یہ سوچ کر بھی ہنس نہ سکے ہم شکستہ دل

یاران غم گسار کا دل ٹوٹ جائے گا

تو مرے غم میں نہ ہنستی ہوئی آنکھوں کو رلا

میں تو مر مر کے بھی جی سکتا ہوں میرا کیا ہے

کسی سے رسم و رہ دوستی تو کیا کرتے

ہمارا خود سے تعارف بھی غائبانہ تھا