rañg darkār the ham ko tirī ḳhāmoshī ke

ek āvāz kī tasvīr banānī thī hameñ

rang darkar the hum ko teri KHamoshi ke

ek aawaz ki taswir banani thi hamein

mujh se ziyāda kaun tamāsha dekh sakegā

gāñdhī-jī ke tīnoñ bandar mere andar

mujh se ziyaada kaun tamasha dekh sakega

gandhi-ji ke tinon bandar mere andar

paḌhne vaalā bhī to kartā hai kisī se mansūb

sabhī kirdār kahānī ke nahīñ hote haiñ

paDhne wala bhi to karta hai kisi se mansub

sabhi kirdar kahani ke nahin hote hain

likhte likhte hī laḌī aañkh jo raanī se mirī

phir to raajā ko nikalnā thā kahānī se mirī

likhte likhte hi laDi aankh jo rani se meri

phir to raja ko nikalna tha kahani se meri

ik na.e ġham se kinārā bhī to ho saktā hai

ishq phir ham ko dobārā bhī to ho saktā hai

ek nae gham se kinara bhi to ho sakta hai

ishq phir hum ko dobara bhi to ho sakta hai

dekhne vaale tujhe dekhte hoñge lekin

dekhne vāloñ ko hairat bhī to hotī hogī

dekhne wale tujhe dekhte honge lekin

dekhne walon ko hairat bhi to hoti hogi

hausle dard-bayānī ke nahīñ hote haiñ

ab yahāñ lafz ma.ānī ke nahīñ hote haiñ

hausle dard-bayani ke nahin hote hain

ab yahan lafz maani ke nahin hote hain

sher kī tarah jo hote haiñ mukammal kuchh log

vo binā misra-e-sānī ke nahīñ hote haiñ

sher ki tarah jo hote hain mukammal kuchh log

wo bina misra-e-sani ke nahin hote hain

us ke hoñToñ pe shikāyat bhī to hotī hogī

dil lagāne kī ye sūrat bhī to hotī hogī

us ke honTon pe shikayat bhi to hoti hogi

dil lagane ki ye surat bhi to hoti hogi