حادثہ پر اشعار

یہ جبر بھی دیکھا ہے تاریخ کی نظروں نے

لمحوں نے خطا کی تھی صدیوں نے سزا پائی

وقت کرتا ہے پرورش برسوں

حادثہ ایک دم نہیں ہوتا

تم ابھی شہر میں کیا نئے آئے ہو

رک گئے راہ میں حادثہ دیکھ کر

زندگی اک حادثہ ہے اور کیسا حادثہ

موت سے بھی ختم جس کا سلسلہ ہوتا نہیں

ہمارے پیش نظر منزلیں کچھ اور بھی تھیں

یہ حادثہ ہے کہ ہم تیرے پاس آ پہنچے

کس درجہ دل شکن تھے محبت کے حادثے

ہم زندگی میں پھر کوئی ارماں نہ کر سکے

بانیؔ ذرا سنبھل کے محبت کا موڑ کاٹ

اک حادثہ بھی تاک میں ہوگا یہیں کہیں

ہر نئے حادثے پہ حیرانی

پہلے ہوتی تھی اب نہیں ہوتی

انہیں صدیوں نہ بھولے گا زمانہ

یہاں جو حادثے کل ہو گئے ہیں

کسے خبر تھی کہ یہ واقعہ بھی ہونا تھا

کہ کھیل کھیل میں اک حادثہ بھی ہونا تھا

وہ حادثے بھی دہر میں ہم پر گزر گئے

جینے کی آرزو میں کئی بار مر گئے

تصویر زندگی میں نیا رنگ بھر گئے

وہ حادثے جو دل پہ ہمارے گزر گئے

رنگینئ حیات بڑھانے کے واسطے

پڑتی ہے حادثوں کی ضرورت کبھی کبھی

حادثے راہ کے زیور ہیں مسافر کے لیے

ایک ٹھوکر جو لگی ہے تو ارادہ نہ بدل

بستیوں میں ہونے کو حادثے بھی ہوتے ہیں

پتھروں کی زد پر کچھ آئنے بھی ہوتے ہیں