ریختہ پر اشعار

ریختے کے تمہیں استاد نہیں ہو غالبؔ

کہتے ہیں اگلے زمانے میں کوئی میرؔ بھی تھا

گفتگو ریختے میں ہم سے نہ کر

یہ ہماری زبان ہے پیارے

پڑھتے پھریں گے گلیوں میں ان ریختوں کو لوگ

مدت رہیں گی یاد یہ باتیں ہماریاں

اب نہ غالبؔ سے شکایت ہے نہ شکوہ میرؔ کا

بن گیا میں بھی نشانہ ریختہ کے تیر کا

جو یہ کہے کہ ریختہ کیونکے ہو رشک فارسی

گفتۂ غالبؔ ایک بار پڑھ کے اسے سنا کہ یوں

جا پڑے چپ ہو کے جب شہر خموشاں میں نظیرؔ

یہ غزل یہ ریختہ یہ شعر خوانی پھر کہاں

یار کے آگے پڑھا یہ ریختہ جا کر نظیرؔ

سن کے بولا واہ واہ اچھا کہا اچھا کہا

ریختہ گوئی کی بنیاد ولیؔ نے ڈالی

بعد ازاں خلق کو مرزاؔ سے ہے اور میرؔ سے فیض

یہ نظم آئیں یہ طرز بندش سخنوری ہے فسوں گری ہے

کہ ریختہ میں بھی تیرے شبلیؔ مزہ ہے طرز علی حزیںؔ کا

قائمؔ جو کہیں ہیں فارسی یار

اس سے تو یہ ریختہ ہے بہتر

کیا ریختہ کم ہے مصحفیؔ کا

بو آتی ہے اس میں فارسی کی

قائم میں غزل طور کیا ریختہ ورنہ

اک بات لچر سی بزبان دکنی تھی

ریختہ کے قصر کی بنیاد اٹھائی اے نصیرؔ

کام ہے ملک سخن میں صاحب مقدور کا

اے مصحفیؔ استاد فن ریختہ گوئی

تجھ سا کوئی عالم کو میں چھانا نہیں ملتا

موئے نے منہ کی کھائی پھر بھی یہ زور زوری

یہ ریختی ہے بھائی تم ریختہ تو جانو

آنکھیں نہ چرا مصحفیٔؔ ریختہ گو سے

اک عمر سے تیرا ہے ثنا خوان ادھر دیکھ

اک بات کہیں گے انشاؔ جی تمہیں ریختہ کہتے عمر ہوئی

تم ایک جہاں کا علم پڑھے کوئی میرؔ سا شعر کہا تم نے

قائمؔ میں ریختہ کو دیا خلعت قبول

ورنہ یہ پیش اہل ہنر کیا کمال تھا

پیچ دے دے لفظ و معنی کو بناتے ہیں کلفت

اور وہ پھر اس پہ رکھتے ہیں گمان ریختہ

جب سے معنی بندی کا چرچا ہوا اے مصحفیؔ

خلطے میں جاتا رہا حسن زبان ریختہ

کیوں نہ آ کر اس کے سننے کو کریں سب یار بھیڑ

آبروؔ یہ ریختہ تو نیں کہا ہے دھوم کا

مصحفیؔ گرچہ یہ سب کہتے ہیں ہم سے بہتر

اپنی پر ریختہ گوئی کی زباں اور ہی ہے

طبع کہہ اور غزل، ہے یہ نظیریؔ کا جواب

ریختہ یہ جو پڑھا قابل اظہار نہ تھا