mujh ko ma.alūm hai mahbūb-parastī kā azaab

der se chāñd nikalnā bhī ġhalat lagtā hai

mujh ko malum hai mahbub-parasti ka azab

der se chand nikalna bhi ghalat lagta hai

tujh se bichhḌūñ to tirī zaat kā hissa ho jā.ūñ

jis se martā huuñ usī zahr se achchhā ho jā.ūñ

tujh se bichhDun to teri zat ka hissa ho jaun

jis se marta hun usi zahr se achchha ho jaun

is qadar aap ke badle hue tevar haiñ ki maiñ

apnī hī chiiz uThāte hue Dar jaatā huuñ

is qadar aap ke badle hue tewar hain ki main

apni hi chiz uThate hue Dar jata hun

tum mire saath ho ye sach to nahīñ hai lekin

maiñ agar jhuuT na bolūñ to akelā ho jā.ūñ

tum mere sath ho ye sach to nahin hai lekin

main agar jhuT na bolun to akela ho jaun

vo apne husn kī ḳhairāt dene vaale haiñ

tamām jism ko kaasa banā ke chalnā hai

wo apne husn ki KHairaat dene wale hain

tamam jism ko kasa bana ke chalna hai

maiñ is liye bhī tire fan kī qadr kartā huuñ

tū jhuuT bol ke aañsū nikāl letā hai

main is liye bhi tere fan ki qadr karta hun

tu jhuT bol ke aansu nikal leta hai

tumhāre vasl kā jis din koī imkān hotā hai

maiñ us din roza rakhtā huuñ burā.ī chhoḌ detā huuñ

tumhaare wasl ka jis din koi imkan hota hai

main us din roza rakhta hun burai chhoD deta hun

ek hī tiir hai tarkash meñ to ujlat na karo

aise mauqe pe nishānā bhī ġhalat lagtā hai

ek hi tir hai tarkash mein to ujlat na karo

aise mauqe pe nishana bhi ghalat lagta hai

maiñ ne is shahr meñ vo Thokareñ khaa.ī haiñ ki ab

aañkh bhī muuñd ke guzrūñ to guzar jaatā huuñ

main ne is shahr mein wo Thokaren khai hain ki ab

aankh bhi mund ke guzrun to guzar jata hun

mirī aadat mujhe pāgal nahīñ hone detī

log to ab bhī samajhte haiñ ki ghar jaatā huuñ

meri aadat mujhe pagal nahin hone deti

log to ab bhi samajhte hain ki ghar jata hun

tanhā.ī se bachāv kī sūrat nahīñ karūñ

mar jā.ūñ kyā kisī se mohabbat nahīñ karūñ

tanhai se bachaw ki surat nahin karun

mar jaun kya kisi se mohabbat nahin karun

maiñ qasīda tirā likkhūñ to koī baat nahīñ

par koī dūsrā dohrā.e to shak kartā huuñ

main qasida tera likkhun to koi baat nahin

par koi dusra dohrae to shak karta hun

na jaane kyā ḳharābī aa ga.ī hai mere lahje meñ

na jaane kyuuñ mirī āvāz bojhal hotī rahtī hai

na jaane kya KHarabi aa gai hai mere lahje mein

na jaane kyun meri aawaz bojhal hoti rahti hai

ḳhudāyā yuuñ bhī ho ki us ke hāthoñ qatl ho jā.ūñ

vahī ik aisā qātil hai jo pesha-var nahīñ lagtā

KHudaya yun bhi ho ki us ke hathon qatl ho jaun

wahi ek aisa qatil hai jo pesha-war nahin lagta

jo kho gayā hai kahīñ zindagī ke mele meñ

kabhī kabhī use aañsū nikal ke dekhte haiñ

jo kho gaya hai kahin zindagi ke mele mein

kabhi kabhi use aansu nikal ke dekhte hain

rafāqatoñ kā tavāzun agar bigaḌ jaa.e

ḳhamoshiyoñ ke ta.āvun se ghar chalā lenā

rafaqaton ka tawazun agar bigaD jae

KHamoshiyon ke taawun se ghar chala lena

mohabbat tiir hai aur tiir bātin chhed detā hai

magar niyyat ġhalat ho to nishāne par nahīñ lagtā

mohabbat tir hai aur tir baatin chhed deta hai

magar niyyat ghalat ho to nishane par nahin lagta

agar kaT-phaT gayā thā merā dāman

tumheñ siina pironā chāhiye thā

agar kaT-phaT gaya tha mera daman

tumhein sina pirona chahiye tha

aag to chāroñ hī jānib thī par achchhā ye hai

hosh-mandī se kisī chiiz ko jalne na diyā

aag to chaaron hi jaanib thi par achchha ye hai

hosh-mandi se kisi chiz ko jalne na diya