آپ کے بعد ہر گھڑی ہم نے

آپ کے ساتھ ہی گزاری ہے

آئنہ دیکھ کر تسلی ہوئی

ہم کو اس گھر میں جانتا ہے کوئی

وقت رہتا نہیں کہیں ٹک کر

عادت اس کی بھی آدمی سی ہے

کبھی تو چونک کے دیکھے کوئی ہماری طرف

کسی کی آنکھ میں ہم کو بھی انتظار دکھے

زندگی یوں ہوئی بسر تنہا

قافلہ ساتھ اور سفر تنہا

شام سے آنکھ میں نمی سی ہے

آج پھر آپ کی کمی سی ہے

کتنی لمبی خاموشی سے گزرا ہوں

ان سے کتنا کچھ کہنے کی کوشش کی

عادتاً تم نے کر دیے وعدے

عادتاً ہم نے اعتبار کیا

جس کی آنکھوں میں کٹی تھیں صدیاں

اس نے صدیوں کی جدائی دی ہے

ہم نے اکثر تمہاری راہوں میں

رک کر اپنا ہی انتظار کیا

کوئی خاموش زخم لگتی ہے

زندگی ایک نظم لگتی ہے

ہاتھ چھوٹیں بھی تو رشتے نہیں چھوڑا کرتے

وقت کی شاخ سے لمحے نہیں توڑا کرتے

کل کا ہر واقعہ تمہارا تھا

آج کی داستاں ہماری ہے

اپنے سائے سے چونک جاتے ہیں

عمر گزری ہے اس قدر تنہا

میں چپ کراتا ہوں ہر شب امڈتی بارش کو

مگر یہ روز گئی بات چھیڑ دیتی ہے

تمہارے خواب سے ہر شب لپٹ کے سوتے ہیں

سزائیں بھیج دو ہم نے خطائیں بھیجی ہیں

خوشبو جیسے لوگ ملے افسانے میں

ایک پرانا خط کھولا انجانے میں

دل پر دستک دینے کون آ نکلا ہے

کس کی آہٹ سنتا ہوں ویرانے میں

ایک ہی خواب نے ساری رات جگایا ہے

میں نے ہر کروٹ سونے کی کوشش کی

جب بھی یہ دل اداس ہوتا ہے

جانے کون آس پاس ہوتا ہے

پھر وہیں لوٹ کے جانا ہوگا

یار نے کیسی رہائی دی ہے

وہ عمر کم کر رہا تھا میری

میں سال اپنے بڑھا رہا تھا

دن کچھ ایسے گزارتا ہے کوئی

جیسے احساں اتارتا ہے کوئی

سہما سہما ڈرا سا رہتا ہے

جانے کیوں جی بھرا سا رہتا ہے

اسی کا ایماں بدل گیا ہے

کبھی جو میرا خدا رہا تھا

اپنے ماضی کی جستجو میں بہار

پیلے پتے تلاش کرتی ہے

وہ ایک دن ایک اجنبی کو

مری کہانی سنا رہا تھا

زندگی پر بھی کوئی زور نہیں

دل نے ہر چیز پرائی دی ہے

راکھ کو بھی کرید کر دیکھو

ابھی جلتا ہو کوئی پل شاید

زخم کہتے ہیں دل کا گہنہ ہے

درد دل کا لباس ہوتا ہے

آپ نے اوروں سے کہا سب کچھ

ہم سے بھی کچھ کبھی کہیں کہتے

چند امیدیں نچوڑی تھیں تو آہیں ٹپکیں

دل کو پگھلائیں تو ہو سکتا ہے سانسیں نکلیں

دیر سے گونجتے ہیں سناٹے

جیسے ہم کو پکارتا ہے کوئی

رکے رکے سے قدم رک کے بار بار چلے

قرار دے کے ترے در سے بے قرار چلے

آنکھوں کے پوچھنے سے لگا آگ کا پتہ

یوں چہرہ پھیر لینے سے چھپتا نہیں دھواں

یادوں کی بوچھاروں سے جب پلکیں بھیگنے لگتی ہیں

سوندھی سوندھی لگتی ہے تب ماضی کی رسوائی بھی

یہ شکر ہے کہ مرے پاس تیرا غم تو رہا

وگرنہ زندگی بھر کو رلا دیا ہوتا

خاموشی کا حاصل بھی اک لمبی سی خاموشی تھی

ان کی بات سنی بھی ہم نے اپنی بات سنائی بھی

گو برستی نہیں سدا آنکھیں

ابر تو بارہ ماس ہوتا ہے

یوں بھی اک بار تو ہوتا کہ سمندر بہتا

کوئی احساس تو دریا کی انا کا ہوتا

آنکھوں سے آنسوؤں کے مراسم پرانے ہیں

مہماں یہ گھر میں آئیں تو چبھتا نہیں دھواں

چولھے نہیں جلائے کہ بستی ہی جل گئی

کچھ روز ہو گئے ہیں اب اٹھتا نہیں دھواں

ایک سناٹا دبے پاؤں گیا ہو جیسے

دل سے اک خوف سا گزرا ہے بچھڑ جانے کا

بھرے ہیں رات کے ریزے کچھ ایسے آنکھوں میں

اجالا ہو تو ہم آنکھیں جھپکتے رہتے ہیں

یہ روٹیاں ہیں یہ سکے ہیں اور دائرے ہیں

یہ ایک دوجے کو دن بھر پکڑتے رہتے ہیں

رات گزرتے شاید تھوڑا وقت لگے

دھوپ انڈیلو تھوڑی سی پیمانے میں

یہ دل بھی دوست زمیں کی طرح

ہو جاتا ہے ڈانوا ڈول کبھی

کانچ کے پار ترے ہاتھ نظر آتے ہیں

کاش خوشبو کی طرح رنگ حنا کا ہوتا

آگ میں کیا کیا جلا ہے شب بھر

کتنی خوش رنگ دکھائی دی ہے

جب دوستی ہوتی ہے تو دوستی ہوتی ہے

اور دوستی میں کوئی احسان نہیں ہوتا