dhyān meñ us ke fanā ho kar koī muñh dekh le

dil vo ā.īna nahīñ jo har koī muñh dekh le

dhyan mein us ke fana ho kar koi munh dekh le

dil wo aaina nahin jo har koi munh dekh le

ta.ana-zan kufr pe hotā hai abas ai zāhid

but-parastī hai tire zohd-e-riyā se behtar

tana-zan kufr pe hota hai abas ai zahid

but-parasti hai tere zohd-e-riya se behtar

ye sach hai ki auroñ hī ko tum yaad karoge

mere dil-e-nāshād ko kab shaad karoge

ye sach hai ki auron hi ko tum yaad karoge

mere dil-e-nashad ko kab shad karoge

allāh tā-qayāmat tujh ko rakhe salāmat

kyā kyā sitam na dekhe ham ne tire karam se

allah ta-qayamat tujh ko rakhe salamat

kya kya sitam na dekhe hum ne tere karam se

kufr par mat ta.an kar ai shaiḳh mere rū-ba-rū

mujh ko hai ma.alūm kaifiyyat tire islām kī

kufr par mat tan kar ai shaiKH mere ru-ba-ru

mujh ko hai malum kaifiyyat tere islam ki

haiñ dair-o-haram meñ to bhare shaiḳh-o-barahman

juz ḳhāna-e-dil kījiye phir qasd kidhar kā

hain dair-o-haram mein to bhare shaiKH-o-barahman

juz KHana-e-dil kijiye phir qasd kidhar ka

kis tarah tujh se mulāqāt mayassar hove

ye duā-go tirā ne zor na zar rakhtā hai

kis tarah tujh se mulaqat mayassar howe

ye dua-go tera ne zor na zar rakhta hai

bhuul jaatā huuñ maiñ ḳhudā.ī ko

us se jab raam raam hotī hai

bhul jata hun main KHudai ko

us se jab ram ram hoti hai

sabā bhī duur khaḌī apne haath maltī hai

tirī galī meñ kisī kā guzar nahīñ hargiz

saba bhi dur khaDi apne hath malti hai

teri gali mein kisi ka guzar nahin hargiz

be-gunah kahtā phire hai aap ko

shaiḳh nasl-e-hazrat-e-ādam nahīñ

be-gunah kahta phire hai aap ko

shaiKH nasl-e-hazrat-e-adam nahin

vo maah bhar ke jām-e-mai-nāb le gayā

ik dam meñ āftāb ko mahtāb le gayā

wo mah bhar ke jam-e-mai-nab le gaya

ek dam mein aaftab ko mahtab le gaya

ham ko to yaad nahīñ ham pe jo guzrī tujh bin

tere aage kahe jis ko ye kahānī aa.e

hum ko to yaad nahin hum pe jo guzri tujh bin

tere aage kahe jis ko ye kahani aae

hamāre sher ko sun kar sukūt ḳhuub nahīñ

bayān kījiye is meñ jo kuchh ta.ammul ho

hamare sher ko sun kar sukut KHub nahin

bayan kijiye is mein jo kuchh tammul ho

ye ziist tarf-e-dil hī meñ yā-rab tamām ho

kāfir huuñ gar irāda-e-bait-ul-harām ho

ye zist tarf-e-dil hi mein ya-rab tamam ho

kafir hun gar irada-e-bait-ul-haram ho

aisī mire ḳhazāna-e-dil meñ bharī hai aag

favvāra chhūTtā hai mizha se sharār kā

aisi mere KHazana-e-dil mein bhari hai aag

fawwara chhuTta hai mizha se sharar ka

yaañ tak rahe judā ki hamāre mazāq meñ

āḳhir ki zahr-e-hijr bhī tiryāk ho gayā

yan tak rahe juda ki hamare mazaq mein

aaKHir ki zahr-e-hijr bhi tiryak ho gaya

rakhte haiñ dahānoñ pe sadā mohr-e-ḳhamoshī

ve log jinheñ aatī hai guftār-e-mohabbat

rakhte hain dahanon pe sada mohr-e-KHamoshi

we log jinhen aati hai guftar-e-mohabbat

tujh se ham-bazm hoñ nasīb kahāñ

tū kahāñ aur maiñ ġharīb kahāñ

tujh se ham-bazm hon nasib kahan

tu kahan aur main gharib kahan

zulf aur ruḳh kī parastish shart hai

kufr ho ai shaiḳh yā islām ho

zulf aur ruKH ki parastish shart hai

kufr ho ai shaiKH ya islam ho

zāhid na rahne pā.eñge ābād mai-kade

jab tak na Dhā.iyegā tirī ḳhānqāh ko

zahid na rahne paenge aabaad mai-kade

jab tak na Dhaiyega teri KHanqah ko

shart andāz hai agar aa.e

baat chhoTī ho yā baḌī muñh par

shart andaz hai agar aae

baat chhoTi ho ya baDi munh par

ahvāl dekh kar mirī chashm-e-pur-āb kā

dariyā se aaj TuuT gayā dil habāb kā

ahwal dekh kar meri chashm-e-pur-ab ka

dariya se aaj TuT gaya dil habab ka

ai zulf-e-yār tujh se bhī āshufta-tar huuñ maiñ

mujh sā na koī hogā pareshān-e-rozgār

ai zulf-e-yar tujh se bhi aashufta-tar hun main

mujh sa na koi hoga pareshan-e-rozgar

chhup-chhup ke dekhte ho bahut us ko har kahīñ

hogā ġhazab jo paḌ ga.ī us kī nazar kahīñ

chhup-chhup ke dekhte ho bahut us ko har kahin

hoga ghazab jo paD gai us ki nazar kahin

bas kar ye ḳhayāl-āfrīnī

us ke hī ḳhayāl meñ rahā kar

bas kar ye KHayal-afrini

us ke hi KHayal mein raha kar

us ke ruḳhsār par kahāñ hai zulf

shola-e-husn kā dhuāñ hai zulf

us ke ruKHsar par kahan hai zulf

shola-e-husn ka dhuan hai zulf

tanik ūdhar hī rah ai hirs-e-duniyā

na de taklīf is gosha-nashīñ ko

tanik udhar hi rah ai hirs-e-duniya

na de taklif is gosha-nashin ko

ai charḳh be-kasī pe hamārī nazar na kar

jo kuchh ki tujh se ho sake tū dar-guzar na kar

ai charKH be-kasi pe hamari nazar na kar

jo kuchh ki tujh se ho sake tu dar-guzar na kar

dāġh-e-jigar kā apne ahvāl kyā sunā.ūñ

bharte haiñ us ke aage sham-o-charāġh paanī

dagh-e-jigar ka apne ahwal kya sunaun

bharte hain us ke aage sham-o-charagh pani

nāḳhun-e-yār se bhī khul na sakī

dāna-e-ashk kī girah ai chashm

naKHun-e-yar se bhi khul na saki

dana-e-ashk ki girah ai chashm

apnā dushman ho agar kuchh hai shu.ūr

intizār-e-vāda-e-fardā na kar

apna dushman ho agar kuchh hai shuur

intizar-e-wada-e-farda na kar

jo tire sāmne aa.e haiñ so kam Thahre haiñ

ye hamārā hī kaleja hai ki ham Thahre haiñ

jo tere samne aae hain so kam Thahre hain

ye hamara hi kaleja hai ki hum Thahre hain

jo āñkhoñ meñ phirtā hai phire āñkhoñ ke aage

āsān ḳhudā kar de ye dushvār mohabbat

jo aankhon mein phirta hai phire aankhon ke aage

aasan KHuda kar de ye dushwar mohabbat

tirā sher 'joshish' tujhe hai pasand

tū muhtāj hai kis kī tā.īd kā

tera sher 'joshish' tujhe hai pasand

tu muhtaj hai kis ki taid ka

chashm-e-vahdat se gar koī dekhe

but-parastī bhī haq-parastī hai

chashm-e-wahdat se gar koi dekhe

but-parasti bhi haq-parasti hai

mar ga.e 'joshish' isī daryāft meñ

kyā kaheñ hai kaun sī shai zindagī

mar gae 'joshish' isi daryaft mein

kya kahen hai kaun si shai zindagi

insān to hai sūrat-e-haq ka.abe meñ kyā hai

ai shaiḳh bhalā kyuuñ na karūñ sajde butāñ ko

insan to hai surat-e-haq kabe mein kya hai

ai shaiKH bhala kyun na karun sajde butan ko

jo hai ka.aba vo hī but-ḳhāna hai shaiḳh o barhaman

is kī nāhaq karte ho takrār donoñ ek haiñ

jo hai kaba wo hi but-KHana hai shaiKH o barhaman

is ki nahaq karte ho takrar donon ek hain

husn aur ishq kā mazkūr na hove jab tak

mujh ko bhātā nahīñ sunñā kisī afsāne kā

husn aur ishq ka mazkur na howe jab tak

mujh ko bhata nahin sunna kisi afsane ka

gulzār-e-mohabbat meñ na phūle na phale ham

mānind-e-chinār aag meñ apnī hī jale ham

gulzar-e-mohabbat mein na phule na phale hum

manind-e-chinar aag mein apni hi jale hum

mūnis-e-tāza haiñ ye dard-o-alam

muddatoñ kā rafīq hai ġham to

munis-e-taza hain ye dard-o-alam

muddaton ka rafiq hai gham to

dīvāne chāhtā hai agar vasl-e-yār ho

terā baḌā raqīb hai dil is se raah rakh

diwane chahta hai agar wasl-e-yar ho

tera baDa raqib hai dil is se rah rakh

ḳhār-zār-e-ishq ko kyā ho gayā

paañv meñ kāñTe chubhotā hī nahīñ

KHar-zar-e-ishq ko kya ho gaya

panw mein kanTe chubhota hi nahin

sajda jise kareñ haiñ vo har-sū hai jalva-gar

jīdhar tirā mizāj ho ūdhar namāz kar

sajda jise karen hain wo har-su hai jalwa-gar

jidhar tera mizaj ho udhar namaz kar

phirte haiñ ka.ī qais se hairān o pareshān

is ishq kī sarkār meñ bahbūd nahīñ hai

phirte hain kai qais se hairan o pareshan

is ishq ki sarkar mein bahbud nahin hai