Sher on Zulf

sub.h-dam zulfeñ na yuuñ bikhrā.iye

log dhokā khā rahe haiñ shaam kā

subh-dam zulfen na yun bikhraiye

log dhoka kha rahe hain sham ka

barsāt kā mazā tire gesū dikhā ga.e

aks āsmān par jo paḌā abr chhā ga.e

barsat ka maza tere gesu dikha gae

aks aasman par jo paDa abr chha gae

niiñd us kī hai dimāġh us kā hai rāteñ us kī haiñ

terī zulfeñ jis ke baazū par pareshāñ ho ga.iiñ

nind us ki hai dimagh us ka hai raaten us ki hain

teri zulfen jis ke bazu par pareshan ho gain

aap kī nāzuk kamar par bojh paḌtā hai bahut

baḌh chale haiñ had se gesū kuchh inheñ kam kījiye

aap ki nazuk kamar par bojh paDta hai bahut

baDh chale hain had se gesu kuchh inhen kam kijiye

Dar ḳhudā siiñ ḳhuub na.iiñ ye vaqt-e-qatl-e-ām kuuñ

sub.h kuuñ kholā na kar is zulf-e-ḳhūn-āshām kuuñ

Dar KHuda sin KHub nain ye waqt-e-qatl-e-am kun

subh kun khola na kar is zulf-e-KHun-asham kun

ai junūñ phir mire sar par vahī shāmat aa.ī

phir phañsā zulfoñ meñ dil phir vahī aafat aa.ī

ai junun phir mere sar par wahi shamat aai

phir phansa zulfon mein dil phir wahi aafat aai

shukr hai bāñdh liyā apne khule bāloñ ko

us ne shīrāza-e-ālam ko bikharne na diyā

shukr hai bandh liya apne khule baalon ko

us ne shiraaza-e-alam ko bikharne na diya

ruḳh-e-raushan pe us kī gesū-e-shab-gūñ laTakte haiñ

qayāmat hai musāfir rāsta din ko bhaTakte haiñ

ruKH-e-raushan pe us ki gesu-e-shab-gun laTakte hain

qayamat hai musafir rasta din ko bhaTakte hain

bas itnī sī baat thī us kī zulf zarā lahrā.ī thī

ḳhauf-zada har shaam kā manzar sahmī sī har raat milī

bas itni si baat thi us ki zulf zara lahrai thi

KHauf-zada har sham ka manzar sahmi si har raat mili

sarak kar aa ga.iiñ zulfeñ jo in maḳhmūr āñkhoñ tak

maiñ ye samjhā ki mai-ḳhāne pe badlī chhā.ī jaatī hai

sarak kar aa gain zulfen jo in maKHmur aankhon tak

main ye samjha ki mai-KHane pe badli chhai jati hai

ik mirā sar ki qadam-bosī kī hasrat is ko

ik tirī zulf ki qadmoñ se lagī rahtī hai

ek mera sar ki qadam-bosi ki hasrat is ko

ek teri zulf ki qadmon se lagi rahti hai

ham hue tum hue ki 'mīr' hue

us kī zulfoñ ke sab asiir hue

hum hue tum hue ki 'mir' hue

us ki zulfon ke sab asir hue

ai zulf-e-yār tujh se bhī āshufta-tar huuñ maiñ

mujh sā na koī hogā pareshān-e-rozgār

ai zulf-e-yar tujh se bhi aashufta-tar hun main

mujh sa na koi hoga pareshan-e-rozgar

jo dekhte tirī zanjīr-e-zulf kā aalam

asiir hone kī āzād aarzū karte

jo dekhte teri zanjir-e-zulf ka aalam

asir hone ki aazad aarzu karte

muñh par naqāb-e-zard har ik zulf par gulāl

holī kī shaam hī to sahar hai basant kī

munh par naqab-e-zard har ek zulf par gulal

holi ki sham hi to sahar hai basant ki

us ke ruḳhsār par kahāñ hai zulf

shola-e-husn kā dhuāñ hai zulf

us ke ruKHsar par kahan hai zulf

shola-e-husn ka dhuan hai zulf

duniyā kī ravish dekhī tirī zulf-e-dotā meñ

bantī hai ye mushkil se bigaḌtī hai zarā meñ

duniya ki rawish dekhi teri zulf-e-dota mein

banti hai ye mushkil se bigaDti hai zara mein

baal apne us parī-rū ne sañvāre raat bhar

saañp loTe saikḌoñ dil par hamāre raat bhar

baal apne us pari-ru ne sanware raat bhar

sanp loTe saikDon dil par hamare raat bhar

dil se kyā pūchhtā hai zulf-e-girah-gīr se pūchh

apne dīvāne kā ahvāl tū zanjīr se pūchh

dil se kya puchhta hai zulf-e-girah-gir se puchh

apne diwane ka ahwal tu zanjir se puchh

un ke gesū sañvarte jaate haiñ

hādse haiñ guzarte jaate haiñ

un ke gesu sanwarte jate hain

hadse hain guzarte jate hain

sab ke jaisī na banā zulf ki ham sāda-nigāh

tere dhoke meñ kisī aur ke shāne lag jaa.eñ

sab ke jaisi na bana zulf ki hum sada-nigah

tere dhoke mein kisi aur ke shane lag jaen

kuchh bikhrī huī yādoñ ke qisse bhī bahut the

kuchh us ne bhī bāloñ ko khulā chhoḌ diyā thā

kuchh bikhri hui yaadon ke qisse bhi bahut the

kuchh us ne bhi baalon ko khula chhoD diya tha

haath TūTeñ maiñ ne gar chheḌī hoñ zulfeñ aap kī

aap ke sar kī qasam bād-e-sabā thī maiñ na thā

hath TuTen main ne gar chheDi hon zulfen aap ki

aap ke sar ki qasam baad-e-saba thi main na tha

apne sar ik balā to lenī thī

maiñ ne vo zulf apne sar lī hai

apne sar ek bala to leni thi

main ne wo zulf apne sar li hai

zāhid ne mirā hāsil-e-īmāñ nahīñ dekhā

ruḳh par tirī zulfoñ ko pareshāñ nahīñ dekhā

zahid ne mera hasil-e-iman nahin dekha

ruKH par teri zulfon ko pareshan nahin dekha

agar dekhe tumhārī zulf le Das

ulaT jaave kalejā nāganī kā

agar dekhe tumhaari zulf le Das

ulaT jawe kaleja nagani ka

zulf-e-kalmūñhī ko pyāre itnā bhī sar mat chaḌhā

be-mahābā muñh pe tere paañv kartī hai darāz

zulf-e-kalmunhi ko pyare itna bhi sar mat chaDha

be-mahaba munh pe tere panw karti hai daraaz

dekhī thī ek raat tirī zulf ḳhvāb meñ

phir jab talak jiyā maiñ pareshān hī rahā

dekhi thi ek raat teri zulf KHwab mein

phir jab talak jiya main pareshan hi raha

ga.ī thī kah ke maiñ laatī huuñ zulf-e-yār kī bū

phirī to bād-e-sabā kā dimāġh bhī na milā

gai thi kah ke main lati hun zulf-e-yar ki bu

phiri to baad-e-saba ka dimagh bhi na mila

tasavvur zulf kā hai aur maiñ huuñ

balā kā sāmnā hai aur maiñ huuñ

tasawwur zulf ka hai aur main hun

bala ka samna hai aur main hun

kisī ke ho raho achchhī nahīñ ye āzādī

kisī kī zulf se lāzim hai silsila dil kā

kisi ke ho raho achchhi nahin ye aazadi

kisi ki zulf se lazim hai silsila dil ka

aah ko chāhiye ik umr asar hote tak

kaun jiitā hai tirī zulf ke sar hote tak

aah ko chahiye ek umr asar hote tak

kaun jita hai teri zulf ke sar hote tak

dekh lete jo mire dil kī pareshānī ko

aap baiThe hue zulfeñ na sañvārā karte

dekh lete jo mere dil ki pareshani ko

aap baiThe hue zulfen na sanwara karte

mere junūñ ko zulf ke saa.e se duur rakh

raste meñ chhāñv pā ke musāfir Thahar na jaa.e

mere junun ko zulf ke sae se dur rakh

raste mein chhanw pa ke musafir Thahar na jae

bikhrī huī vo zulf ishāroñ meñ kah ga.ī

maiñ bhī sharīk huuñ tire hāl-e-tabāh meñ

bikhri hui wo zulf ishaaron mein kah gai

main bhi sharik hun tere haal-e-tabah mein

kabhī khole to kabhī zulf ko bikhrā.e hai

zindagī shaam hai aur shaam Dhalī jaa.e hai

kabhi khole to kabhi zulf ko bikhrae hai

zindagi sham hai aur sham Dhali jae hai

zulfeñ muñh par haiñ muñh hai zulfoñ meñ

raat bhar sub.h shaam din bhar hai

zulfen munh par hain munh hai zulfon mein

raat bhar subh sham din bhar hai

us zulf pe phabtī shab-e-dījūr kī sūjhī

andhe ko añdhere meñ baḌī duur kī sūjhī

us zulf pe phabti shab-e-dijur ki sujhi

andhe ko andhere mein baDi dur ki sujhi

zulfoñ meñ kiyā qaid na abrū se kiyā qatl

tū ne to koī baat na maanī mire dil kī

zulfon mein kiya qaid na abru se kiya qatl

tu ne to koi baat na mani mere dil ki

tire ruḳhsār se be-tarah lipTī jaa.e hai zālim

jo kuchh kahiye to bal khā uljhatī hai zulf be-Dhañgī

tere ruKHsar se be-tarah lipTi jae hai zalim

jo kuchh kahiye to bal kha uljhati hai zulf be-Dhangi

kabhī be-dām Thahrāveñ kabhī zanjīr karte haiñ

ye nā-shā.er tirī zulfāñ kuuñ kyā kyā naam dharte haiñ

kabhi be-dam Thahrawen kabhi zanjir karte hain

ye na-shaer teri zulfan kun kya kya nam dharte hain

ye khule khule se gesū inheñ laakh tū sañvāre

mire haath se sañvarte to kuchh aur baat hotī

ye khule khule se gesu inhen lakh tu sanware

mere hath se sanwarte to kuchh aur baat hoti

dil us kī tār-e-zulf ke bal meñ ulajh gayā

suljhegā kis tarah se ye bistār hai ġhazab

dil us ki tar-e-zulf ke bal mein ulajh gaya

suljhega kis tarah se ye bistar hai ghazab

kuchh ab ke ham bhī kaheñ us kī dāstān-e-visāl

magar vo zulf-e-pareshāñ khule to baat chale

kuchh ab ke hum bhi kahen us ki dastan-e-visal

magar wo zulf-e-pareshan khule to baat chale

ijāzat ho to maiñ tasdīq kar luuñ terī zulfoñ se

sunā hai zindagī ik ḳhūb-sūrat daam hai saaqī

ijazat ho to main tasdiq kar lun teri zulfon se

suna hai zindagi ek KHub-surat dam hai saqi

abr meñ chāñd gar na dekhā ho

ruḳh pe zulfoñ ko Daal kar dekho

abr mein chand gar na dekha ho

ruKH pe zulfon ko Dal kar dekho

nikal gayā thā vo hasīn apnī zulf bāñdh kar

havā kī bāqiyāt ko sameTte rahe haiñ ham

nikal gaya tha wo hasin apni zulf bandh kar

hawa ki baqiyat ko sameTte rahe hain hum

ai junūñ haath jo vo zulf na aa.ī hotī

aah ne arsh kī zanjīr hilā.ī hotī

ai junun hath jo wo zulf na aai hoti

aah ne arsh ki zanjir hilai hoti

kis ne bhīge hue bāloñ se ye jhaTkā paanī

jhuum ke aa.ī ghaTā TuuT ke barsā paanī

kis ne bhige hue baalon se ye jhaTka pani

jhum ke aai ghaTa TuT ke barsa pani

tirī jo zulf kā aayā ḳhayāl āñkhoñ meñ

vahīñ khaTakne lagā baal baal āñkhoñ meñ

teri jo zulf ka aaya KHayal aankhon mein

wahin khaTakne laga baal baal aankhon mein