Sher on Holi

mere 'anāsir ḳhaak na hoñ bas rang baneñ

aur jangal sahrā dariyā par barse rang

mere 'anasir KHak na hon bas rang banen

aur jangal sahra dariya par barse rang

mujh ko ehsās-e-rañg-o-bū na huā

yuuñ bhī aksar bahār aa.ī hai

mujh ko ehsas-e-rang-o-bu na hua

yun bhi aksar bahaar aai hai

saañs letā huā har rang nazar aa.egā

tum kisī roz mire rang meñ aao to sahī

sans leta hua har rang nazar aaega

tum kisi roz mere rang mein aao to sahi

vo aa.e to rang sañvarne lagte haiñ

jaise bichhḌā yaar bhī koī mausam hai

wo aae to rang sanwarne lagte hain

jaise bichhDa yar bhi koi mausam hai

saikḌoñ rangoñ kī bārish ho chukegī us ke baad

itr meñ bhīgī huī shāmoñ kā manzar aa.egā

saikDon rangon ki barish ho chukegi us ke baad

itr mein bhigi hui shamon ka manzar aaega

muñh par naqāb-e-zard har ik zulf par gulāl

holī kī shaam hī to sahar hai basant kī

munh par naqab-e-zard har ek zulf par gulal

holi ki sham hi to sahar hai basant ki

saaqī kuchh aaj tujh ko ḳhabar hai basant kī

har sū bahār pesh-e-nazar hai basant kī

saqi kuchh aaj tujh ko KHabar hai basant ki

har su bahaar pesh-e-nazar hai basant ki

tū bhī dekhegā zarā rang utar leñ tere

ham hī rakhte haiñ tujhe yaad ki sab rakhte haiñ

tu bhi dekhega zara rang utar len tere

hum hi rakhte hain tujhe yaad ki sab rakhte hain

maiñ duur thā to apne hī chehre pe mal liyā

is zindagī ke haath meñ jitnā gulāl thā

main dur tha to apne hi chehre pe mal liya

is zindagi ke hath mein jitna gulal tha

kab tak chunarī par hī zulm hoñ rañgoñ ke

rañgreza terī bhī qabā par barse rañg

kab tak chunari par hi zulm hon rangon ke

rangreza teri bhi qaba par barse rang

kitnī rangīniyoñ meñ terī yaad

kis qadar sādgī se aatī hai

kitni ranginiyon mein teri yaad

kis qadar sadgi se aati hai

bahut hī ḳhushkī meñ guzrī hai is baras holī

gila hai tujh se ki giilā nahīñ kiyā mujh ko

bahut hi KHushki mein guzri hai is baras holi

gila hai tujh se ki gila nahin kiya mujh ko

puurā kareñge holī meñ kyā vāda-e-visāl

jin ko abhī basant kī ai dil ḳhabar nahīñ

pura karenge holi mein kya wada-e-visal

jin ko abhi basant ki ai dil KHabar nahin

Daal kar ġhunchoñ kī muñdrī shāḳh-e-gul ke kaan meñ

ab ke holī meñ banānā gul ko jogan ai sabā

Dal kar ghunchon ki mundri shaKH-e-gul ke kan mein

ab ke holi mein banana gul ko jogan ai saba

sajnī kī āñkhoñ meñ chhup kar jab jhāñkā

bin holī khele hī sājan bhiig gayā

sajni ki aankhon mein chhup kar jab jhanka

bin holi khele hi sajan bhig gaya

kis kī holī jashn-e-nau-rozī hai aaj

surḳh mai se sāqiyā dastār rañg

kis ki holi jashn-e-nau-rozi hai aaj

surKH mai se saqiya dastar rang

bād-e-bahār meñ sab ātish junūn kī hai

har saal āvatī hai garmī meñ fasl-e-holī

baad-e-bahaar mein sab aatish junun ki hai

har sal aawati hai garmi mein fasl-e-holi

holī ke ab bahāne chhiḌkā hai rañg kis ne

nām-e-ḳhudā tujh uupar is aan ajab samāñ hai

holi ke ab bahane chhiDka hai rang kis ne

nam-e-KHuda tujh upar is aan ajab saman hai

vo rañg rañg ke chhīñTe paḌe ki us ke ba.ad

kabhī na phir na.e kapḌe pahan ke niklā maiñ

wo rang rang ke chhinTe paDe ki us ke baad

kabhi na phir nae kapDe pahan ke nikla main

ab kī holī meñ rahā be-kār rañg

aur hī laayā firāq-e-yār rañg

ab ki holi mein raha be-kar rang

aur hi laya firaq-e-yar rang

tere gāloñ pe jab gulāl lagā

ye jahāñ mujh ko laal laal lagā

tere galon pe jab gulal laga

ye jahan mujh ko lal lal laga

bādal aa.e haiñ ghir gulāl ke laal

kuchh kisī kā nahīñ kisī ko ḳhayāl

baadal aae hain ghir gulal ke lal

kuchh kisi ka nahin kisi ko KHayal

sahj yaad aa gayā vo laal holī-bāz juuñ dil meñ

gulālī ho gayā tan par mire ḳhirqa jo ujlā thā

sahj yaad aa gaya wo lal holi-baz jun dil mein

gulali ho gaya tan par mere KHirqa jo ujla tha

vo kūdte uchhalte rangīn pairahan the

ma.asūm qahqahoñ meñ uḌtā gulāl dekhā

wo kudte uchhalte rangin pairahan the

masum qahqahon mein uDta gulal dekha

sab kā alag andāz thā sab rang rakhte the judā

rahnā sabhī ke saath thā so ḳhud ko paanī kar liyā

sab ka alag andaz tha sab rang rakhte the juda

rahna sabhi ke sath tha so KHud ko pani kar liya

shab jo holī kī hai milne ko tire mukhḌe se jaan

chāñd aur taare liye phirte haiñ afshāñ haath meñ

shab jo holi ki hai milne ko tere mukhDe se jaan

chand aur tare liye phirte hain afshan hath mein

idhar bhī ik nazar ai jalva-e-rangīn-o-begāna

tulū-e-māh kā hai muntazir merā siyah-ḳhāna

idhar bhi ek nazar ai jalwa-e-rangin-o-begana

tulu-e-mah ka hai muntazir mera siyah-KHana

mausam-e-holī hai din aa.e haiñ rañg aur raag ke

ham se tum kuchh māñgne aao bahāne phaag ke

mausam-e-holi hai din aae hain rang aur rag ke

hum se tum kuchh mangne aao bahane phag ke

bahār aa.ī ki din holī ke aa.e

guloñ meñ rañg khelā jā rahā hai

bahaar aai ki din holi ke aae

gulon mein rang khela ja raha hai

muhayyā sab hai ab asbāb-e-holī

uTho yaaro bharo rañgoñ se jholī

muhayya sab hai ab asbab-e-holi

uTho yaro bharo rangon se jholi

maiñ ne kuchh rang uchhāle the havāoñ meñ 'nabīl'

aur tasvīr tirī dhyān se bāhar aa.ī

main ne kuchh rang uchhaale the hawaon mein 'nabil'

aur taswir teri dhyan se bahar aai

lab-e-dariyā pe dekh aa kar tamāshā aaj holī kā

bhañvar kaale ke daf baaje hai mauj ai yaar paanī meñ

lab-e-dariya pe dekh aa kar tamasha aaj holi ka

bhanwar kale ke daf baje hai mauj ai yar pani mein

gulābī gaal par kuchh rañg mujh ko bhī jamāne do

manāne do mujhe bhī jān-e-man tyauhār holī meñ

gulabi gal par kuchh rang mujh ko bhi jamane do

manane do mujhe bhi jaan-e-man tyauhaar holi mein

vo tamāshā o khel holī kā

sab ke tan raḳht-e-kesarī hai yaad

wo tamasha o khel holi ka

sab ke tan raKHt-e-kesari hai yaad

ġhair se khelī hai holī yaar ne

Daale mujh par dīda-e-ḳhūñ-bār rañg

ghair se kheli hai holi yar ne

Dale mujh par dida-e-KHun-bar rang