Sher on Bahaar

shāḳhoñ se barg-e-gul nahīñ jhaḌte haiñ baaġh meñ

zevar utar rahā hai urūs-e-bahār kā

shaKHon se barg-e-gul nahin jhaDte hain bagh mein

zewar utar raha hai urus-e-bahaar ka

us ko ḳhizāñ ke aane kā kyā ranj kyā qalaq

rote kaTā ho jis ko zamāna bahār kā

us ko KHizan ke aane ka kya ranj kya qalaq

rote kaTa ho jis ko zamana bahaar ka

ḳhizāñ kā bhes banā kar bahār ne maarā

mujhe do-rañgī-e-lail-o-nahār ne maarā

KHizan ka bhes bana kar bahaar ne mara

mujhe do-rangi-e-lail-o-nahaar ne mara

tinkoñ se khelte hī rahe āshiyāñ meñ ham

aayā bhī aur gayā bhī zamāna bahār kā

tinkon se khelte hi rahe aashiyan mein hum

aaya bhi aur gaya bhi zamana bahaar ka

guloñ kā daur hai bulbul maze bahār meñ luuT

ḳhizāñ machāegī aate hī is dayār meñ luuT

gulon ka daur hai bulbul maze bahaar mein luT

KHizan machaegi aate hi is dayar mein luT

mujh ko ehsās-e-rañg-o-bū na huā

yuuñ bhī aksar bahār aa.ī hai

mujh ko ehsas-e-rang-o-bu na hua

yun bhi aksar bahaar aai hai

ḳhizāñ ruḳhsat huī phir āmad-e-fasl-e-bahārī hai

garebāñ ḳhud-baḳhud hone lagā hai dhajjiyāñ merā

KHizan ruKHsat hui phir aamad-e-fasl-e-bahaari hai

gareban KHud-baKHud hone laga hai dhajjiyan mera

shagufta bāġh-e-suḳhan hai hamīñ se ai 'sābir'

jahāñ meñ misl-e-nasīm-e-bahār ham bhī haiñ

shagufta bagh-e-suKHan hai hamin se ai 'sabir'

jahan mein misl-e-nasim-e-bahaar hum bhi hain

jo thī bahār to gaate rahe bahār kā raag

ḳhizāñ jo aa.ī to ham ho ga.e ḳhizāñ kī taraf

jo thi bahaar to gate rahe bahaar ka rag

KHizan jo aai to hum ho gae KHizan ki taraf

lutf-e-bahār kuchh nahīñ go hai vahī bahār

dil hī ujaḌ gayā ki zamāna ujaḌ gayā

lutf-e-bahaar kuchh nahin go hai wahi bahaar

dil hi ujaD gaya ki zamana ujaD gaya

na.ī bahār kā muzhda bajā sahī lekin

abhī to aglī bahāroñ kā zaḳhm taaza hai

nai bahaar ka muzhda baja sahi lekin

abhi to agli bahaaron ka zaKHm taza hai

bahār aate hī Takrāne lage kyuuñ sāġhar o miinā

batā ai pīr-e-mai-ḳhāna ye mai-ḳhānoñ pe kyā guzrī

bahaar aate hi Takrane lage kyun saghar o mina

bata ai pir-e-mai-KHana ye mai-KHanon pe kya guzri

chaar din kī bahār hai saarī

ye takabbur hai yār-e-jānī hech

chaar din ki bahaar hai sari

ye takabbur hai yar-e-jaani hech

shaguftagī-e-dil-e-kārvāñ ko kyā samjhe

vo ik nigāh jo uljhī huī bahār meñ hai

shaguftagi-e-dil-e-karwan ko kya samjhe

wo ek nigah jo uljhi hui bahaar mein hai

bahār chāk-e-girebāñ meñ Thahr jaatī hai

junūñ kī mauj koī āstīñ meñ hotī hai

bahaar chaak-e-gireban mein Thahr jati hai

junun ki mauj koi aastin mein hoti hai

maiñ ne dekhā hai bahāroñ meñ chaman ko jalte

hai koī ḳhvāb kī tābīr batāne vaalā

main ne dekha hai bahaaron mein chaman ko jalte

hai koi KHwab ki tabir batane wala

afsurdagī bhī husn hai tābindagī bhī husn

ham ko ḳhizāñ ne tum ko sañvārā bahār ne

afsurdagi bhi husn hai tabindagi bhi husn

hum ko KHizan ne tum ko sanwara bahaar ne

udhar bhī ḳhaak uḌī hai idhar bhī ḳhaak uḌī

jahāñ jahāñ se bahāroñ ke kārvāñ nikle

udhar bhi KHak uDi hai idhar bhi KHak uDi

jahan jahan se bahaaron ke karwan nikle

bahār aa.e to merā salām kah denā

mujhe to aaj talab kar liyā hai sahrā ne

bahaar aae to mera salam kah dena

mujhe to aaj talab kar liya hai sahra ne

ajab bahār dikhā.ī lahū ke chhīñToñ ne

ḳhizāñ kā rañg bhī rañg-e-bahār jaisā thā

ajab bahaar dikhai lahu ke chhinTon ne

KHizan ka rang bhi rang-e-bahaar jaisa tha

kyā isī ko bahār kahte haiñ

lāla-o-gul se ḳhuuñ Tapaktā hai

kya isi ko bahaar kahte hain

lala-o-gul se KHun Tapakta hai

ye sochte hī rahe aur bahār ḳhatm huī

kahāñ chaman meñ nasheman bane kahāñ na bane

ye sochte hi rahe aur bahaar KHatm hui

kahan chaman mein nasheman bane kahan na bane

mirī zindagī pe na muskurā mujhe zindagī kā alam nahīñ

jise tere ġham se ho vāsta vo ḳhizāñ bahār se kam nahīñ

meri zindagi pe na muskura mujhe zindagi ka alam nahin

jise tere gham se ho wasta wo KHizan bahaar se kam nahin

'arsh' bahāroñ meñ bhī aayā ek nazāra patjhaḌ kā

sabz shajar ke sabz tane par ik sūkhī sī Daalī thī

'arsh' bahaaron mein bhi aaya ek nazara patjhaD ka

sabz shajar ke sabz tane par ek sukhi si Dali thi

is taraf se guzre the qāfile bahāroñ ke

aaj tak sulagte haiñ zaḳhm rahguzāroñ ke

is taraf se guzre the qafile bahaaron ke

aaj tak sulagte hain zaKHm rahguzaron ke

taḌap ke rah ga.ī bulbul qafas meñ ai sayyād

ye kyā kahā ki abhī tak bahār baaqī hai

taDap ke rah gai bulbul qafas mein ai sayyaad

ye kya kaha ki abhi tak bahaar baqi hai

ai dil-e-be-qarār chup ho jā

jā chukī hai bahār chup ho jā

ai dil-e-be-qarar chup ho ja

ja chuki hai bahaar chup ho ja

aamad aamad hai ḳhizāñ kī jaane vaalī hai bahār

rote haiñ gulzār ke dar bāġhbāñ khole hue

aamad aamad hai KHizan ki jaane wali hai bahaar

rote hain gulzar ke dar baghban khole hue

kahiyo sabā salām hamārā bahār se

ham to chaman ko chhoḌ ke sū-e-qafas chale

kahiyo saba salam hamara bahaar se

hum to chaman ko chhoD ke su-e-qafas chale

tere qurbān 'qamar' muñh sar-e-gulzār na khol

sadqe us chāñd sī sūrat pe na ho jaa.e bahār

tere qurban 'qamar' munh sar-e-gulzar na khol

sadqe us chand si surat pe na ho jae bahaar

phuul par gulshan ke goyā dāna-e-shabnam nahīñ

āshiqoñ ke haal par āñkheñ phirātī hai bahār

phul par gulshan ke goya dana-e-shabnam nahin

aashiqon ke haal par aankhen phiraati hai bahaar

ai ḳhizāñ bhaag jā chaman se shitāb

varna fauj-e-bahār aave hai

ai KHizan bhag ja chaman se shitab

warna fauj-e-bahaar aawe hai

bahār aa.ī guloñ ko hañsī nahīñ aa.ī

kahīñ se bū tirī guftār kī nahīñ aa.ī

bahaar aai gulon ko hansi nahin aai

kahin se bu teri guftar ki nahin aai

mirī bahār meñ aalam ḳhizāñ kā rahtā hai

huā jo vasl to khaTkā rahā judā.ī kā

meri bahaar mein aalam KHizan ka rahta hai

hua jo wasl to khaTka raha judai ka

maiñ us gulshan kā bulbul huuñ bahār aane nahīñ paatī

ki sayyād aan kar merā gulistāñ mol lete haiñ

main us gulshan ka bulbul hun bahaar aane nahin pati

ki sayyaad aan kar mera gulistan mol lete hain

merī āñkhoñ meñ haiñ aañsū tere dāman meñ bahār

gul banā saktā hai tū shabnam banā saktā huuñ maiñ

meri aankhon mein hain aansu tere daman mein bahaar

gul bana sakta hai tu shabnam bana sakta hun main

mire ḳhayāl kī vus.at meñ haiñ hazār chaman

kahāñ kahāñ se nikālegī ye bahār mujhe

mere KHayal ki wusat mein hain hazar chaman

kahan kahan se nikalegi ye bahaar mujhe

ga.ī bahār magar apnī be-ḳhudī hai vahī

samajh rahā huuñ ki ab tak bahār baaqī hai

gai bahaar magar apni be-KHudi hai wahi

samajh raha hun ki ab tak bahaar baqi hai

ā.eñge vaqt-e-ḳhizāñ chhoḌ de aa.ī hai bahār

le le sayyād qasam rakh de gulistāñ sar par

aaenge waqt-e-KHizan chhoD de aai hai bahaar

le le sayyaad qasam rakh de gulistan sar par

na sair-e-bāġh na milnā na mīThī bāteñ haiñ

ye din bahār ke ai jaan muft jaate haiñ

na sair-e-bagh na milna na miThi baaten hain

ye din bahaar ke ai jaan muft jate hain

apne dāman meñ ek taar nahīñ

aur saarī bahār baaqī hai

apne daman mein ek tar nahin

aur sari bahaar baqi hai

jab se chhūTā hai gulistāñ ham se

roz sunte haiñ bahār aa.ī hai

jab se chhuTa hai gulistan hum se

roz sunte hain bahaar aai hai

ġhurūr se jo zamīñ par qadam nahīñ rakhtī

ye kis galī se nasīm-e-bahār aatī hai

ghurur se jo zamin par qadam nahin rakhti

ye kis gali se nasim-e-bahaar aati hai

bahār aa.ī ki din holī ke aa.e

guloñ meñ rañg khelā jā rahā hai

bahaar aai ki din holi ke aae

gulon mein rang khela ja raha hai

Tuk dekh leñ chaman ko chalo lāla-zār tak

kyā jaane phir ji.eñ na ji.eñ ham bahār tak

Tuk dekh len chaman ko chalo lala-zar tak

kya jaane phir jien na jien hum bahaar tak

kyā ḳhabar mujh ko ḳhizāñ kyā chiiz hai kaisī bahār

āñkheñ kholīñ aa ke maiñ ne ḳhāna-e-sayyād meñ

kya KHabar mujh ko KHizan kya chiz hai kaisi bahaar

aankhen kholin aa ke main ne KHana-e-sayyaad mein

ḳhushī ke phuul khile the tumhāre saath kabhī

phir is ke ba.ad na aayā bahār kā mausam

KHushi ke phul khile the tumhaare sath kabhi

phir is ke baad na aaya bahaar ka mausam

bahāroñ kī nazar meñ phuul aur kāñTe barābar haiñ

mohabbat kyā kareñge dost dushman dekhne vaale

bahaaron ki nazar mein phul aur kanTe barabar hain

mohabbat kya karenge dost dushman dekhne wale

kiyā hañgāma-e-gul ne mirā josh-e-junūñ taaza

udhar aa.ī bahār īdhar garebāñ kā rafū TuuTā

kiya hangama-e-gul ne mera josh-e-junun taza

udhar aai bahaar idhar gareban ka rafu TuTa

aaj hai vo bahār kā mausam

phuul toḌūñ to haath jaam aa.e

aaj hai wo bahaar ka mausam

phul toDun to hath jam aae