Sher on Water

kis ne bhīge hue bāloñ se ye jhaTkā paanī

jhuum ke aa.ī ghaTā TuuT ke barsā paanī

kis ne bhige hue baalon se ye jhaTka pani

jhum ke aai ghaTa TuT ke barsa pani

agar fursat mile paanī kī tahrīroñ ko paḌh lenā

har ik dariyā hazāroñ saal kā afsāna likhtā hai

agar fursat mile pani ki tahriron ko paDh lena

har ek dariya hazaron sal ka afsana likhta hai

tum us ke paas ho jis ko tumhārī chaah na thī

kahāñ pe pyaas thī dariyā kahāñ banāyā gayā

tum us ke pas ho jis ko tumhaari chah na thi

kahan pe pyas thi dariya kahan banaya gaya

ham intizār kareñ ham ko itnī taab nahīñ

pilā do tum hameñ paanī agar sharāb nahīñ

hum intizar karen hum ko itni tab nahin

pila do tum hamein pani agar sharab nahin

vo jo pyāsā lagtā thā sailāb-zada thā

paanī paanī kahte kahte Duub gayā hai

wo jo pyasa lagta tha sailab-zada tha

pani pani kahte kahte Dub gaya hai

ye paanī ḳhāmushī se bah rahā hai

ise dekheñ ki is meñ Duub jaa.eñ

ye pani KHamushi se bah raha hai

ise dekhen ki is mein Dub jaen

maiñ ne apnī ḳhushk āñkhoñ se lahū chhalkā diyā

ik samundar kah rahā thā mujh ko paanī chāhiye

main ne apni KHushk aankhon se lahu chhalka diya

ek samundar kah raha tha mujh ko pani chahiye

duur tak phailā huā paanī hī paanī har taraf

ab ke bādal ne bahut kī mehrbānī har taraf

dur tak phaila hua pani hi pani har taraf

ab ke baadal ne bahut ki mehrbani har taraf

aisī pyaas aur aisā sabr

dariyā paanī paanī hai

aisi pyas aur aisa sabr

dariya pani pani hai

andar andar khokhle ho jaate haiñ ghar

jab dīvāroñ meñ paanī bhar jaatā hai

andar andar khokhle ho jate hain ghar

jab diwaron mein pani bhar jata hai

vo majbūrī maut hai jis meñ kaase ko buniyād mile

pyaas kī shiddat jab baḌhtī hai Dar lagtā hai paanī se

wo majburi maut hai jis mein kase ko buniyaad mile

pyas ki shiddat jab baDhti hai Dar lagta hai pani se

agar ai nāḳhudā tūfān se laḌne kā dam-ḳham hai

idhar kashtī na le aanā yahāñ paanī bahut kam hai

agar ai naKHuda tufan se laDne ka dam-KHam hai

idhar kashti na le aana yahan pani bahut kam hai

us se kahnā ki dhuāñ dekhne laa.eq hogā

aag pahne hue jā.uñgā maiñ paanī kī taraf

us se kahna ki dhuan dekhne laeq hoga

aag pahne hue jaunga main pani ki taraf

ubalte vaqt paanī sochtā hogā zarūr

agar bartan na hotā to batātā aag ko

ubalte waqt pani sochta hoga zarur

agar bartan na hota to batata aag ko

harf apne hī ma.ānī kī tarah hotā hai

pyaas kā zā.iqa paanī kī tarah hotā hai

harf apne hi maani ki tarah hota hai

pyas ka zaiqa pani ki tarah hota hai

hañstā paanī rotā paanī

mujh ko āvāzeñ detā thā

hansta pani rota pani

mujh ko aawazen deta tha

dosto DhūñD ke ham sā koī pyāsā laao

ham to aañsū bhī jo piite haiñ to paanī kī tarah

dosto DhunD ke hum sa koi pyasa lao

hum to aansu bhi jo pite hain to pani ki tarah

qisse se tire merī kahānī se ziyāda

paanī meñ hai kyā aur bhī paanī se ziyāda

qisse se tere meri kahani se ziyaada

pani mein hai kya aur bhi pani se ziyaada

hairān mat ho tairtī machhlī ko dekh kar

paanī meñ raushnī ko utarte hue bhī dekh

hairan mat ho tairti machhli ko dekh kar

pani mein raushni ko utarte hue bhi dekh

vo dhuup thī ki zamīñ jal ke raakh ho jaatī

baras ke ab ke baḌā kaam kar gayā paanī

wo dhup thi ki zamin jal ke rakh ho jati

baras ke ab ke baDa kaam kar gaya pani

anginat safīnoñ meñ diip jagmagāte haiñ

raat ne luTāyā hai rañg-o-nūr paanī par

anginat safinon mein dip jagmagate hain

raat ne luTaya hai rang-o-nur pani par

paanī ne jise dhuup kī miTTī se banāyā

vo dā.era-e-rabt bigaḌne ke liye thā

pani ne jise dhup ki miTTi se banaya

wo daera-e-rabt bigaDne ke liye tha

ḳhaak huuñ uḌtā huuñ sach hai ki maiñ āvāra-mizāj

paanī hotā bhī to sailāb meñ dekhā jaatā

KHak hun uDta hun sach hai ki main aawara-mizaj

pani hota bhi to sailab mein dekha jata

jinheñ ham bulbulā paanī kā dikhte haiñ kaho un se

nazar ho dekhne vaalī to bahr-e-be-karāñ ham haiñ

jinhen hum bulbula pani ka dikhte hain kaho un se

nazar ho dekhne wali to bahr-e-be-karan hum hain