جو نگاہ ناز کا بسمل نہیں

دل نہیں وہ دل نہیں وہ دل نہیں

تیری بخشش کے بھروسے پہ خطائیں کی ہیں

تیری رحمت کے سہارے نے گنہ گار کیا

مجھ کو معلوم ہے انجام محبت کیا ہے

ایک دن موت کی امید پہ جینا ہوگا

رہنے دے اپنی بندگی زاہد

بے محبت خدا نہیں ملتا

پھول کیا ڈالوگے تربت پر مری

خاک بھی تم سے نہ ڈالی جائے گی

دن بھی ہے رات بھی ہے صبح بھی ہے شام بھی ہے

اتنے وقتوں میں کوئی وقت ملاقات بھی ہے

تری ادا کی قسم ہے تری ادا کے سوا

پسند اور کسی کی ہمیں ادا نہ ہوئی

ہنسی ہے دل لگی ہے قہقہے ہیں

تمہاری انجمن کا پوچھنا کیا

کب وہ آئیں گے الٰہی مرے مہماں ہو کر

کون دن کون برس کون مہینہ ہوگا

آپ کا اختیار ہے سب پر

آپ پر اختیار کس کا ہے

جو دل نشیں ہو کسی کے تو اس کا کیا کہنا

جگہ نصیب سے ملتی ہے دل کے گوشوں میں

اپنی سی کرو تم بھی اپنی سی کریں ہم بھی

کچھ تم نے بھی ٹھانی ہے کچھ ہم نے بھی ٹھانی ہے

مہربانی چارہ سازوں کی بڑھی

جب بڑھا درماں تو بیماری بڑھی

قبول ہو کہ نہ ہو سجدہ و سلام اپنا

تمہارے بندے ہیں ہم بندگی ہے کام اپنا

بے وفا عمر دغاباز جوانی نکلی

نہ یہی رہتی ہے ظالم نہ وہی رہتی ہے

لے چلا پھر مجھے دل یار دل آزار کے پاس

اب کے چھوڑ آؤں گا ظالم کو ستم گار کے پاس

دامن اشکوں سے تر کریں کیوں کر

راز کو مشتہر کریں کیوں کر

ملو ملو نہ ملو اختیار ہے تم کو

اس آرزو کے سوا اور آرزو کیا ہے

اک تری بات کہ جس بات کی تردید محال

اک مرا خواب کہ جس خواب کی تعبیر نہیں

کب ان آنکھوں کا سامنا نہ ہوا

تیر جن کا کبھی خطا نہ ہوا

سمجھائیں کس طرح دل ناکردہ کار کو

یہ دوستی سمجھتا ہے دشمن کے پیار کو

کسی نے برچھیاں ماریں کسی نے تیر مارے ہیں

خدا رکھے انہیں یہ سب کرم فرما ہمارے ہیں

جو قیامت کا نہیں دن وہ مرا دن کیسا

جو تڑپ کر نہ کٹی ہو وہ مری رات نہیں

میں تو ہر ہر خم گیسو کی تلاشی لوں گا

کہ مرا دل ہے ترے گیسوئے خم دار کے پاس

آنے میں کبھی آپ سے جلدی نہیں ہوتی

جانے میں کبھی آپ توقف نہیں کرتے

یہ غم کدہ ہے اس میں مبارکؔ خوشی کہاں

غم کو خوشی بنا کوئی پہلو نکال کے

کسی سے آج کا وعدہ کسی سے کل کا وعدہ ہے

زمانے کو لگا رکھا ہے اس امیدواری میں

محبت میں وفا کی حد جفا کی انتہا کیسی

مبارکؔ پھر نہ کہنا یہ ستم کوئی سہے کب تک

اس گلی میں ہزار غم ٹوٹا

آنا جانا مگر نہیں چھوٹا

کہیں ایسا نہ ہو کم بخت میں جان آ جائے

اس لیے ہاتھ میں لیتے مری تصویر نہیں

مری خاک بھی اڑے گی با ادب تری گلی میں

ترے آستاں سے اونچا نہ مرا غبار ہوگا

گئی بہار مگر اپنی بے خودی ہے وہی

سمجھ رہا ہوں کہ اب تک بہار باقی ہے

کسی کی تمنا نکلتی رہی

مری آرزو ہاتھ ملتی رہی

شکست توبہ کی تمہید ہے تری توبہ

زباں پہ توبہ مبارکؔ نگاہ ساغر پر

یہ تصرف ہے مبارکؔ داغ کا

کیا سے کیا اردو زباں ہوتی گئی

کھٹک رہی ہے کوئی شے نکال دے کوئی

تڑپ رہا ہے دل بے قرار سینے میں

اک مرا سر کہ قدم بوسی کی حسرت اس کو

اک تری زلف کہ قدموں سے لگی رہتی ہے

خیر ساقی کی سلامت مے کدہ

جس قدر پی اتنی ہشیاری بڑھی

دل لگاتے ہی تو کہہ دیتی ہیں آنکھیں سب کچھ

ایسے کاموں کے بھی آغاز کہیں چھپتے ہیں

تم بھول گئے مجھ کو یوں یاد دلاتا ہوں

جو آہ نکلتی ہے وہ یاد دہانی ہے

کل تو دیکھا تھا مبارکؔ بتکدے میں آپ کو

آج حضرت جا کے مسجد میں مسلماں ہو گئے

دل میں آنے کے مبارکؔ ہیں ہزاروں رستے

ہم بتائیں اسے راہیں کوئی ہم سے پوچھے

کچھ اس انداز سے صیاد نے آزاد کیا

جو چلے چھٹ کے قفس سے وہ گرفتار چلے

کیا کہیں کیا کیا کیا تیری نگاہوں نے سلوک

دل میں آئیں دل میں ٹھہریں دل میں پیکاں ہو گئیں

اثر ہو یا نہ ہو واعظ بیاں میں

مگر چلتی تو ہے تیری زباں خوب

تم کو سمجھائے مبارکؔ کوئی کیوں کر افسوس

تم تو رونے لگے یار اور بھی سمجھانے سے

کہاں قسمت میں اس کی پھول ہونا

وہی دل کی کلی ہے اور ہم ہیں

جو ان کو چاہئے وہ کیے جا رہے ہیں وہ

جو مجھ کو چاہئے وہ کیے جا رہا ہوں میں

اس بھری محفل میں ہم سے داور محشر نہ پوچھ

ہم کہیں گے تجھ سے اپنی داستاں سب سے الگ

میری دشواری ہے دشواری مری

میری مشکل آپ کی مشکل نہیں