تیر پر اشعار

تیر کھانے کی ہوس ہے تو جگر پیدا کر

سرفروشی کی تمنا ہے تو سر پیدا کر

اک پرندہ ابھی اڑان میں ہے

تیر ہر شخص کی کمان میں ہے

اک اور تیر چلا اپنا عہد پورا کر

ابھی پرندے میں تھوڑی سی جان باقی ہے

تیر پہ تیر نشانوں پہ نشانے بدلے

شکر ہے حسن کے انداز پرانے بدلے

زندگی کے حسین ترکش میں

کتنے بے رحم تیر ہوتے ہیں

میٹھی باتیں، کبھی تلخ لہجے کے تیر

دل پہ ہر دن ہے ان کا کرم بھی نیا

شکریہ ریشمی دلاسے کا

تیر تو آپ نے بھی مارا تھا

حال غم کہہ کے غم بڑھا بیٹھے

تیر مارے تھے تیر کھا بیٹھے

کب ان آنکھوں کا سامنا نہ ہوا

تیر جن کا کبھی خطا نہ ہوا

جنگ کا ہتھیار طے کچھ اور تھا

تیر سینے میں اتارا اور ہے

کتنے ہی زخم ہیں مرے اک زخم میں چھپے

کتنے ہی تیر آنے لگے اک نشان پر

برساؤ تیر مجھ پہ مگر اتنا جان لو

پہلو میں دل ہے دل میں تمہارا خیال ہے

یوں ترس کھا کے نہ پوچھو احوال

تیر سینے پہ لگا ہو جیسے

کس سے پوچھیں کہ وہ انداز نظر

کب تبسم ہوا کب تیر ہوا

کب نکلتا ہے اب جگر سے تیر

یہ بھی کیا تیری آشنائی ہے

تیر و کمان آپ بھی محسنؔ سنبھالیے

جب دوستی کی آڑ میں خنجر دکھائی دے

کربلا میں رخ اصغر کی طرف

تیر چلتے نہیں دیکھے جاتے

یہ ناد علی کا عجب معجزہ تھا

سبھی تیر پلٹے کمانوں کی جانب

غیر پر کیوں نگاہ کرتے ہو

مجھ کو اس تیر کا نشانہ کرو

وقت مہلت نہ دے گا پھر تم کو

تیر جس دم کمان سے نکلا

تیرا انداز نرالا سب سے

تیر تو ایک نشانے کیا کیا

مرحلے اور آنے والے ہیں

تیر اپنا ابھی کمان میں رکھ

چلے گا تیر جب اپنی دعا کا

کلیجے دشمنوں کے چھان دے گا

تیرے مژگاں کی کیا کروں تعریف

تیر یہ بے کمان جاتا ہے

جینے کی نہیں امید ہم کو

تیر اس کا جگر کے پار نکلا

نمی جگہ بنا رہی ہے آنکھ میں

یہ تیر اب کمان سے نکالئے

قتل کے کب تھے یہ سارے ساماں

ایک تیر ایک کماں تھی پہلے

محبت تیر ہے اور تیر باطن چھید دیتا ہے

مگر نیت غلط ہو تو نشانے پر نہیں لگتا

ہو گئے رخصت رئیسؔ و عالؔی و واصفؔ نثارؔ

رفتہ رفتہ آگرہ سیمابؔ سونا ہو گیا

ایک تیر نظر ادھر مارو

دل ترستا ہے جاں ترستی ہے

میں بھی تصورؔ ان میں تھا

جن کے تیر خطا کے تھے

پلک فسانہ شرارت حجاب تیر دعا

تمنا نیند اشارہ خمار سخت تھکی

نشانہ بنے دل رہے تیر دل میں

نشانی نہیں اس نشانی سے اچھی

زخم کاری بہت لگا دل پر

تیر اپنوں نے اک چلایا تھا

دل جو امیدوار ہوتا ہے

تیر غم کا شکار ہوتا ہے

بچ گیا تیر نگاہ یار سے

واقعی آئینہ ہے فولاد کا

یہ تیر یوں ہی نہیں دشمنوں تلک جاتے

بدن کا سارا کھچاؤ کماں پہ پڑتا ہے

تیر مت دیکھ مرے زخم کو دیکھ

یار یار اپنا عدو میں گم ہے

سب نشانے اگر صحیح ہوتے

تیر کوئی خطا نہیں ہوتا

تیر پر تیر لگے تو بھی نہ پیکاں نکلے

یا رب اس گھر میں جو آوے نہ وہ مہماں نکلے

ہم بھی ہیں بلقیسؔ مجروحین میں

ہم پہ بھی تیر و تبر چلتے رہے

ریت پر وہ پڑی ہے مشک کوئی

تیر بھی اور کمان سا کچھ ہے