ان کو میں اس طرح بھلاؤں نظامؔ

یاد کس بات پر نہیں آتے

بحر ہستی سے کوچ ہے درپیش

یاد منصوبۂ حباب رہے

لپٹا کے شب وصل وہ اس شوخ کا کہنا

کچھ اور ہوس اس سے زیادہ تو نہیں ہے

نہ بن آیا جب ان کو کوئی جواب

تو منہ پھیر کر مسکرانے لگے

بوسہ تو اس لب شیریں سے کہاں ملتا ہے

گالیاں بھی ملیں ہم کو تو ملیں تھوڑی سی

ضد ہے گر ہے تو ہو سبھی کے ساتھ

یا نہ ملنے کی ضد مجھی سے ہے

حق بات تو یہ ہے کہ اسی بت کے واسطے

زاہد کوئی ہوا تو کوئی برہمن ہوا

کوئے جاناں میں گر اب جائیں بھی تو کیا دیکھیں

کوئی روزن نہ رہا بن گئی دیوار نئی

سچ ہے نظامؔ یاد بھی اس کو نہ ہوں گے ہم

پر کیا کریں وہ ہم سے بھلایا نہ جائے گا

مضمون سوجھتے ہیں ہزاروں نئے نئے

قاصد یہ خط نہیں مرے غم کی کتاب ہے

تم ہو گئے کچھ اور نہ کچھ اور ہم ہوئے

کچھ تو سبب ہوا ہے کہ وہ ربط کم ہوئے

دینا وہ اس کا ساغر مے یاد ہے نظامؔ

منہ پھیر کر ادھر کو ادھر کو بڑھا کے ہاتھ

آئے بھی وہ چلے بھی گئے یاں کسے خبر

حیراں ہوں میں خیال ہے یہ یا کہ خواب ہے

آپ دیکھیں تو مرے دل میں بھی کیا کیا کچھ ہے

یہ بھی گھر آپ کا ہے کیوں نہ پھر آباد رہے

اس کی الفت میں جیتے جی مرنا

فائدہ یہ بھی زندگی سے ہے

اٹھتا ہوں اس کی بزم سے جب ہو کے ناامید

پھر پھر کے دیکھتا ہوں کوئی اب پکار لے

منظور کیا ہے یہ بھی تو کھلتا نہیں سبب

ملتا تو ہے وہ ہم سے مگر کچھ رکا ہوا

ہوئے نمود جو پستاں تو شرم کھا کے کہا

یہ کیا بلا ہے جو اٹھتی ہے میرے سینے سے

گر کوئی پوچھے مجھے آپ اسے جانتے ہیں

ہو کے انجان وہ کہتے ہیں کہیں دیکھا ہے

آنکھیں پھوٹیں جو جھپکتی بھی ہوں

شب تنہائی میں کیسا سونا

راہ نکلے گی نہ کب تک کوئی

تری دیوار ہے اور سر میرا

اک بات لکھی ہے کیا ہی میں نے

تجھ سے تو نہ نامہ بر کہوں گا

یوں تو روٹھے ہیں مگر لوگوں سے

پوچھتے حال ہیں اکثر میرا

کیا کسی سے کسی کا حال کہیں

نام بھی تو لیا نہیں جاتا

رات تھا وصل آج ہجر کا دن

کچھ زمانے کا اعتبار نہیں

وہ اشاروں میں اس کا کہنا ہائے

دیکھو اپنے پرائے بیٹھے ہیں

کہیں اس بزم تک رسائی ہو

پھر کوئی دیکھے اہتمام مرا

اب آؤ مل کے سو رہیں تکرار ہو چکی

آنکھوں میں نیند بھی ہے بہت رات کم بھی ہے

کس قدر ہجر میں بے ہوشی ہے

جاگنا بھی ہے ہمارا سونا

میں نہ کہتا تھا کہ بہکائیں گے تم کو دشمن

تم نے کس واسطے آنا مرے گھر چھوڑ دیا

اب تو سب کا ترے کوچے ہی میں مسکن ٹھہرا

یہی آباد ہے دنیا میں زمیں تھوڑی سی

تیرے ہی غم میں مر گئے صد شکر

آخر اک دن تو ہم کو مرنا تھا

اک وہ کہ رات دن رہیں محفل میں اس کی ہائے

اک ہم کہ ترسیں سایۂ دیوار کے لیے

یہ بھی نیا ستم ہے حنا تو لگائیں غیر

اور اس کی داد چاہیں وہ مجھ کو دکھا کے ہاتھ

جو کچھ اشارے ہوتے ہیں سب دیکھتا ہوں میں

ساری شرارت آپ کی میری نظر میں ہے

اب تم سے کیا کسی سے شکایت نہیں مجھے

تم کیا بدل گئے کہ زمانا بدل گیا

دو دن بھی اس صنم سے نہ اپنی نبھی کبھی

جب کچھ بنی تو فضل خدا سے بگڑ گئی

اب کیا ملیں کسی سے کہاں جائیں ہم نظامؔ

ہم وہ نہیں رہے وہ محبت نہیں رہی

اپنی انداز کے کہہ شعر نہ کہہ یہ تو نظامؔ

کہ چناں بیٹھ گیا اور چنیں بیٹھ گئی

یہ دن تو صرف آپ کے وعدوں میں ہو گئے

اب دن نیا نکالئے اقرار کے لیے

جو کہ ناداں ہے وہ کیا جانے تری چاہت کی قدر

اے پری دیوانہ بننا کام ہے ہشیار کا

منتظر ہوں کسی کے آنے کا

کس کی آنکھوں میں آ کے خواب رہے

تیرا ملنا تو ہے مشکل مگر اتنا تو ہوا

اپنا مرنا مجھے آساں نہ ہوا تھا سو ہوا

کس کا ہے انتظار کہاں دھیان ہے لگا

کیوں چونک چونک جاتے ہو آواز پا کے ساتھ

درباں سے آپ کہتے تھے کچھ میرے باب میں

سنتا تھا میں بھی پاس ہی در کے کھڑا ہوا

چھیڑ ہر وقت کی نہیں جاتی

روز کا روٹھنا نہیں جاتا

میرے ملنے سے جو یوں ہاتھ اٹھا بیٹھا تو

نہیں معلوم کہ دل میں ترے کیا بیٹھ گیا

خوشبو وہ پسینے کی تری یاد نہ آ جائے

گل کیسا کبھی عطر بھی سونگھا نہ کریں گے

دشمن سے اور ہوتیں بہت باتیں پیار کی

شکر خدا یہ ہے کہ وہ بت کم سخن ہوا

یہ ہوا سرد چلی اور یہ بادل آئے

کہو ساقی سے کہ ساغر چلے بوتل آئے