andāz apnā dekhte haiñ aa.ine meñ vo

aur ye bhī dekhte haiñ koī dekhtā na ho

andaz apna dekhte hain aaine mein wo

aur ye bhi dekhte hain koi dekhta na ho

añgḌā.ī bhī vo lene na paa.e uThā ke haath

dekhā jo mujh ko chhoḌ diye muskurā ke haath

angDai bhi wo lene na pae uTha ke hath

dekha jo mujh ko chhoD diye muskura ke hath

hai ḳhushī intizār kī har dam

maiñ ye kyuuñ pūchhūñ kab mileñge aap

hai KHushi intizar ki har dam

main ye kyun puchhun kab milenge aap

tere hī ġham meñ mar ga.e sad-shukr

āḳhir ik din to ham ko marnā thā

tere hi gham mein mar gae sad-shukr

aaKHir ek din to hum ko marna tha

ab tum se kyā kisī se shikāyat nahīñ mujhe

tum kyā badal ga.e ki zamānā badal gayā

ab tum se kya kisi se shikayat nahin mujhe

tum kya badal gae ki zamana badal gaya

ab aao mil ke so raheñ takrār ho chukī

āñkhoñ meñ niiñd bhī hai bahut raat kam bhī hai

ab aao mil ke so rahen takrar ho chuki

aankhon mein nind bhi hai bahut raat kam bhi hai

bosa to us lab-e-shīrīñ se kahāñ miltā hai

gāliyāñ bhī milīñ ham ko to milīñ thoḌī sī

bosa to us lab-e-shirin se kahan milta hai

galiyan bhi milin hum ko to milin thoDi si

mazmūn sūjhte haiñ hazāroñ na.e na.e

qāsid ye ḳhat nahīñ mire ġham kī kitāb hai

mazmun sujhte hain hazaron nae nae

qasid ye KHat nahin mere gham ki kitab hai

gar koī pūchhe mujhe aap ise jānte haiñ

ho ke anjān vo kahte haiñ kahīñ dekhā hai

gar koi puchhe mujhe aap ise jaante hain

ho ke anjaan wo kahte hain kahin dekha hai

aa.e bhī vo chale bhī ga.e yaañ kise ḳhabar

hairāñ huuñ maiñ ḳhayāl hai ye yā ki ḳhvāb hai

aae bhi wo chale bhi gae yan kise KHabar

hairan hun main KHayal hai ye ya ki KHwab hai

kahīñ us bazm tak rasā.ī ho

phir koī dekhe ehtimām mirā

kahin us bazm tak rasai ho

phir koi dekhe ehtimam mera

ye bhī nayā sitam hai hinā to lagā.eñ ġhair

aur us kī daad chāheñ vo mujh ko dikhā ke haath

ye bhi naya sitam hai hina to lagaen ghair

aur us ki dad chahen wo mujh ko dikha ke hath

abhī to kahā hī nahīñ maiñ ne kuchh

abhī tum jo āñkheñ churāne lage

abhi to kaha hi nahin main ne kuchh

abhi tum jo aankhen churane lage

uThtā huuñ us kī bazm se jab ho ke nā-umīd

phir phir ke dekhtā huuñ koī ab pukār le

uThta hun us ki bazm se jab ho ke na-umid

phir phir ke dekhta hun koi ab pukar le

ab kyā mileñ kisī se kahāñ jaa.eñ ham'nizām'

ham vo nahīñ rahe vo mohabbat nahīñ rahī

ab kya milen kisi se kahan jaen ham'nizam'

hum wo nahin rahe wo mohabbat nahin rahi

jo kuchh ishāre hote haiñ sab dekhtā huuñ maiñ

saarī sharārat aap kī merī nazar meñ hai

jo kuchh ishaare hote hain sab dekhta hun main

sari shararat aap ki meri nazar mein hai

sach hai 'nizām' yaad bhī us ko na hoñge ham

par kyā kareñ vo ham se bhulāyā na jā.egā

sach hai 'nizam' yaad bhi us ko na honge hum

par kya karen wo hum se bhulaya na jaega

yuuñ to rūThe haiñ magar logoñ se

pūchhte haal haiñ aksar merā

yun to ruThe hain magar logon se

puchhte haal hain aksar mera

na ban aayā jab un ko koī javāb

to muñh pher kar muskurāne lage

na ban aaya jab un ko koi jawab

to munh pher kar muskurane lage

zid hai gar hai to ho sabhī ke saath

yā na milne kī zid mujhī se hai

zid hai gar hai to ho sabhi ke sath

ya na milne ki zid mujhi se hai

kyā duā roz-e-hashr kī māñgeñ

vahāñ par bhī yahī ḳhudā hogā

kya dua roz-e-hashr ki mangen

wahan par bhi yahi KHuda hoga

terā milnā to hai mushkil magar itnā to huā

apnā marnā mujhe āsāñ na huā thā so huā

tera milna to hai mushkil magar itna to hua

apna marna mujhe aasan na hua tha so hua

kyā kisī se kisī kā haal kaheñ

naam bhī to liyā nahīñ jaatā

kya kisi se kisi ka haal kahen

nam bhi to liya nahin jata

kis kā hai intizār kahāñ dhyān hai lagā

kyuuñ chauñk chauñk jaate ho āvāz-e-pā ke saath

kis ka hai intizar kahan dhyan hai laga

kyun chaunk chaunk jate ho aawaz-e-pa ke sath

tujh se hī chhupā.ūñgā ġham apnā

tujh se hī kahūñgā gar kahūñgā

tujh se hi chhupaunga gham apna

tujh se hi kahunga gar kahunga

maiñ na kahtā thā ki bahkā.enge tum ko dushman

tum ne kis vāste aanā mire ghar chhoḌ diyā

main na kahta tha ki bahkaenge tum ko dushman

tum ne kis waste aana mere ghar chhoD diya

hue numūd jo pistāñ to sharm khā ke kahā

ye kyā balā hai jo uThtī hai mere siine se

hue numud jo pistan to sharm kha ke kaha

ye kya bala hai jo uThti hai mere sine se

vo ishāroñ meñ us kā kahnā haa.e

dekho apne parā.e baiThe haiñ

wo ishaaron mein us ka kahna hae

dekho apne parae baiThe hain

ḳhushbū vo pasīne kī tirī yaad na aa jaa.e

gul kaisā kabhī itr bhī sūñghā na kareñge

KHushbu wo pasine ki teri yaad na aa jae

gul kaisa kabhi itr bhi sungha na karenge

kis qadar hijr meñ behoshī hai

jāgnā bhī hai hamārā sonā

kis qadar hijr mein behoshi hai

jagna bhi hai hamara sona

haq baat to ye hai ki usī but ke vāste

zāhid koī huā to koī barhaman huā

haq baat to ye hai ki usi but ke waste

zahid koi hua to koi barhaman hua

tum ho ga.e kuchh aur na kuchh aur ham hue

kuchh to sabab huā hai ki vo rabt kam hue

tum ho gae kuchh aur na kuchh aur hum hue

kuchh to sabab hua hai ki wo rabt kam hue

ye havā sard chalī aur ye bādal aa.e

kaho saaqī se ki sāġhar chale botal aa.e

ye hawa sard chali aur ye baadal aae

kaho saqi se ki saghar chale botal aae

chheḌ har vaqt kī nahīñ jaatī

roz kā rūThnā nahīñ jaatā

chheD har waqt ki nahin jati

roz ka ruThna nahin jata

us kī ulfat meñ jīte-jī marnā

fā.eda ye bhī zindagī se hai

us ki ulfat mein jite-ji marna

faeda ye bhi zindagi se hai

ab to sab kā tire kūche hī meñ maskan Thahrā

yahī ābād hai duniyā meñ zamīñ thoḌī sī

ab to sab ka tere kuche hi mein maskan Thahra

yahi aabaad hai duniya mein zamin thoDi si

jo ki nādāñ hai vo kyā jaane tirī chāhat kī qadr

ai parī dīvāna banñā kaam hai hoshiyār kā

jo ki nadan hai wo kya jaane teri chahat ki qadr

ai pari diwana banna kaam hai hoshiyar ka

muntazir huuñ kisī ke aane kā

kis kī āñkhoñ meñ aa ke ḳhvāb rahe

muntazir hun kisi ke aane ka

kis ki aankhon mein aa ke KHwab rahe

lipTā ke shab-e-vasl vo us shoḳh kā kahnā

kuchh aur havas is se ziyāda to nahīñ hai

lipTa ke shab-e-wasl wo us shoKH ka kahna

kuchh aur hawas is se ziyaada to nahin hai

dekh kar ġhair ko shoḳhī dekho

mujh se kahte haiñ ki dekhā tū ne

dekh kar ghair ko shoKHi dekho

mujh se kahte hain ki dekha tu ne

mere milne se jo yuuñ haath uThā-baiThā tū

nahīñ ma.alūm ki dil meñ tire kyā baiTh gayā

mere milne se jo yun hath uTha-baiTha tu

nahin malum ki dil mein tere kya baiTh gaya

raat thā vasl aaj hijr kā din

kuchh zamāne kā e'tibār nahīñ

raat tha wasl aaj hijr ka din

kuchh zamane ka e'tibar nahin

āñkheñ phūTeñ jo jhapaktī bhī hoñ

shab-e-tanhā.ī meñ kaisā sonā

aankhen phuTen jo jhapakti bhi hon

shab-e-tanhai mein kaisa sona

manzūr kyā hai ye bhī to khultā nahīñ sabab

miltā to hai vo ham se magar kuchh rukā huā

manzur kya hai ye bhi to khulta nahin sabab

milta to hai wo hum se magar kuchh ruka hua

aap dekheñ to mire dil meñ bhī kyā kyā kuchh hai

ye bhī ghar aap kā hai kyuuñ na phir ābād rahe

aap dekhen to mere dil mein bhi kya kya kuchh hai

ye bhi ghar aap ka hai kyun na phir aabaad rahe

un ko maiñ is tarah bhulā.ūñ 'nizām'

yaad kis baat par nahīñ aate

un ko main is tarah bhulaun 'nizam'

yaad kis baat par nahin aate

dushman se aur hotīñ bahut bāteñ pyaar kī

shukr-e-ḳhudā ye hai ki vo but kam-suḳhan huā

dushman se aur hotin bahut baaten pyar ki

shukr-e-KHuda ye hai ki wo but kam-suKHan hua

be-sāḳhta nigāheñ jo aapas meñ mil ga.iiñ

kyā muñh par us ne rakh liye āñkheñ churā ke haath

be-saKHta nigahen jo aapas mein mil gain

kya munh par us ne rakh liye aankhen chura ke hath

do din bhī us sanam se na apnī nibhī kabhī

jab kuchh banī to fazl-e-ḳhudā se bigaḌ ga.ī

do din bhi us sanam se na apni nibhi kabhi

jab kuchh bani to fazl-e-KHuda se bigaD gai

is qadar aap kā itaab rahe

dil ko mere na iztirāb rahe

is qadar aap ka itab rahe

dil ko mere na iztirab rahe