در بہ در ٹھوکریں کھائیں تو یہ معلوم ہوا

گھر کسے کہتے ہیں کیا چیز ہے بے گھر ہونا

گھاس میں جذب ہوئے ہوں گے زمیں کے آنسو

پاؤں رکھتا ہوں تو ہلکی سی نمی لگتی ہے

نہ جانے شعر میں کس درد کا حوالہ تھا

کہ جو بھی لفظ تھا وہ دل دکھانے والا تھا

سچ تو کہہ دوں مگر اس دور کے انسانوں کو

بات جو دل سے نکلتی ہے بری لگتی ہے

اتنی کاوش بھی نہ کر میری اسیری کے لیے

تو کہیں میرا گرفتار نہ سمجھا جائے

اس ایک چہرے میں آباد تھے کئی چہرے

اس ایک شخص میں کس کس کو دیکھتا تھا میں

نکل گئے ہیں جو بادل برسنے والے تھے

یہ شہر آب کو ترسے گا چشم تر کے بغیر

کسی کو کیا بتاؤں کون ہوں میں

کہ اپنی داستاں بھولا ہوا ہوں

منزل کا پتا ہے نہ کسی راہ گزر کا

بس ایک تھکن ہے کہ جو حاصل ہے سفر کا

میں وہ معنی غم عشق ہوں جسے حرف حرف لکھا گیا

کبھی آنسوؤں کی بیاض میں کبھی دل سے لے کے کتاب تک

چلی ہے موج میں کاغذ کی کشتی

اسے دریا کا اندازہ نہیں ہے

کون تو ہے کون میں کیسی وفا

حاصل ہستی ہیں کچھ رسوائیاں

دکھ دے یا رسوائی دے

غم کو مرے گہرائی دے

دیوتا بننے کی حسرت میں معلق ہو گئے

اب ذرا نیچے اتریے آدمی بن جائیے

خموشی کے ہیں آنگن اور سناٹے کی دیواریں

یہ کیسے لوگ ہیں جن کو گھروں سے ڈر نہیں لگتا

محلے والے میرے کار بے مصرف پہ ہنستے ہیں

میں بچوں کے لیے گلیوں میں غبارے بناتا ہوں

ساتھ اس کے رہ سکے نہ بغیر اس کے رہ سکے

یہ ربط ہے چراغ کا کیسا ہوا کے ساتھ

میرا شور غرقابی ختم ہو گیا آخر

اور رہ گیا باقی صرف شور دریا کا

سخت بیوی کو شکایت ہے جوان نو سے

ریل چلتی نہیں گر جاتا ہے پہلے سگنل

میں تجھ کو کتنا چاہتا ہوں

یہ کہنا غیر ضروری ہے

کوئی نہیں جو پتا دے دلوں کی حالت کا

کہ سارے شہر کے اخبار ہیں خبر کے بغیر

مجھ سے کہتا ہے کہ سائے کی طرح ساتھ ہیں ہم

یوں نہ ملنے کا نکالا ہے بہانہ کیسا

مجھے حرف غلط سمجھا تھا تو نے

سو میں معنی کا دفتر ہو گیا ہوں

وہ جنوں کو بڑھائے جائیں گے

ان کی شہرت ہے میری رسوائی

کیسے قصے تھے کہ چھڑ جائیں تو اڑ جاتی تھی نیند

کیا خبر تھی وہ بھی حرف مختصر ہو جائیں گے

اک پتنگے نے یہ اپنے رقص آخر میں کہا

روشنی کے ساتھ رہیئے روشنی بن جائیے

بارہا یوں بھی ہوا تیری محبت کی قسم

جان کر ہم نے تجھے خود سے خفا رکھا ہے

حال دل کون سنائے اسے فرصت کس کو

سب کو اس آنکھ نے باتوں میں لگا رکھا ہے

بدن کی آگ کو کہتے ہیں لوگ جھوٹی آگ

مگر اس آگ نے دل کو مرے گداز کیا

نہیں رہا میں ترے راستے کا پتھر بھی

وہ دن بھی تھے ترے احساس میں خدا تھا میں

یاد نے آ کر یکایک پردہ کھینچا دور تک

میں بھری محفل میں بیٹھا تھا کہ تنہا ہو گیا

جتنا آنکھ سے کم دیکھوں

اتنی دور دکھائی دے

یہ چاہا تھا کہ پتھر بن کے جی لوں

سو اندر سے پگھلتا جا رہا ہوں

خود اپنی دید سے اندھی ہیں آنکھیں

خود اپنی گونج سے بہرا ہوا ہوں

میں غم کو بسا رہا ہوں دل میں

بے گھر کو مکان دے رہا ہوں

سائے کو سائے میں گم ہوتے تو دیکھا ہوگا

یہ بھی دیکھو کہ تمہیں ہم نے بھلایا کیسے

قرب بدن سے کم نہ ہوئے دل کے فاصلے

اک عمر کٹ گئی کسی نا آشنا کے ساتھ

بہت طویل مری داستان غم تھی مگر

غزل سے کام لیا مختصر بنانے کا

وہ بے خودی تھی محبت کی بے رخی تو نہ تھی

پہ اس کو ترک تعلق کو اک بہانہ ہوا

آ کے اب جنگل میں یہ عقدہ کھلا

بھیڑیے پڑھتے نہیں ہیں فلسفہ

سفر میں عشق کے اک ایسا مرحلہ آیا

وہ ڈھونڈتا تھا مجھے اور کھو گیا تھا میں

خوش نما لفظوں کی رشوت دے کے راضی کیجیے

روح کی توہین پر آمادہ رہتا ہے بدن

حال دل ناگفتنی ہے ہم جو کہتے بھی تو کیا

پھر بھی غم یہ ہے کہ اس نے ہم سے پوچھا ہی نہیں

لباس درد بھی ہم نے اتارا

یہ کپڑے اب پرانے ہو چکے ہیں

زمیں یخ بستہ ہو جاتی ہے جب جاڑوں کی راتوں میں

میں اپنے دل کو سلگاتا ہوں انگارے بناتا ہوں

دل حسن کو دان دے رہا ہوں

گاہک کو دکان دے رہا ہوں

یہ نہیں ہے کہ نوازے نہ گئے ہوں ہم لوگ

ہم کو سرکار سے تمغہ ملا رسوائی کا

یہ کیسے لوگ ہیں صدیوں کی ویرانی میں رہتے ہیں

انہیں کمروں کی بوسیدہ چھتوں سے ڈر نہیں لگتا

جس آگ سے دل سلگ رہے تھے

اب اس سے دماغ جل رہے ہیں

اک آگ سی جلتی رہی تا عمر لہو میں

ہم اپنے ہی احساس میں پکتے رہے تا دیر