Sher on Tanz-o-Mizah

coat aur patlūn jab pahnā to mister ban gayā

jab koī taqrīr kī jalse meñ leader ban gayā

coat aur patlun jab pahna to mister ban gaya

jab koi taqrir ki jalse mein leader ban gaya

jo chāhtā hai ki ban jaa.e vo baḌā shā.er

vo jā ke dostī gāñThe kisī mudīr ke saath

jo chahta hai ki ban jae wo baDa shaer

wo ja ke dosti ganThe kisi mudir ke sath

ḳhud tiis kā hai aur dulhan saaTh baras kī

girtī huī dīvār ke saa.e meñ khaḌā hai

KHud tis ka hai aur dulhan saTh baras ki

girti hui diwar ke sae mein khaDa hai

kalām-e-mīr samjhe aur zabān-e-mīrzā samjhe

magar un kā kahā yā aap samjheñ yā ḳhudā samjhe

kalam-e-mir samjhe aur zaban-e-mirza samjhe

magar un ka kaha ya aap samjhen ya KHuda samjhe

pahle ham ko bahan kahā ab fikr hamīñ se shādī kī

ye bhī na sochā bahan se shādī kar ke kyā kahlā.eñge

pahle hum ko bahan kaha ab fikr hamin se shadi ki

ye bhi na socha bahan se shadi kar ke kya kahlaenge

vahāñ jo log anāḌī haiñ vaqt kāTte haiñ

yahāñ bhī kuchh mutashā.er dimāġh chāTte haiñ

wahan jo log anaDi hain waqt kaTte hain

yahan bhi kuchh mutashaer dimagh chaTte hain

pareshānī se sar ke baal tak sab jhaḌ ga.e lekin

purānī jeb meñ kanghī jo pahle thī so ab bhī hai

pareshani se sar ke baal tak sab jhaD gae lekin

purani jeb mein kanghi jo pahle thi so ab bhi hai

chehre to jhurriyoñ se bhare dil javān haiñ

din meñ haiñ shaiḳh raat meñ salmān-ḳhān haiñ

chehre to jhurriyon se bhare dil jawan hain

din mein hain shaiKH raat mein salman-KHan hain

ilm hāsil kar ke bhī miltī nahīñ hai naukrī

rahm ke qābil hai bas hālat hamārī in dinoñ

ilm hasil kar ke bhi milti nahin hai naukri

rahm ke qabil hai bas haalat hamari in dinon

maiñ ne har file kī dumchī par ye misra' likh diyā

kaam ho saktā nahīñ sarkār maiñ roze se huuñ

main ne har file ki dumchi par ye misra' likh diya

kaam ho sakta nahin sarkar main roze se hun

aa ke bazm-e-sher meñ shart-e-vafā puurī to kar

jitnā khānā khā gayā hai utnī mazdūrī to kar

aa ke bazm-e-sher mein shart-e-wafa puri to kar

jitna khana kha gaya hai utni mazduri to kar

un ke gunāh kyā kaheñ kis kis ke sar ga.e

tum ko ḳhabar nahīñ ka.ī ustād mar ga.e

un ke gunah kya kahen kis kis ke sar gae

tum ko KHabar nahin kai ustad mar gae

aa.ī sadā-e-haq ki yahī band-o-bast haiñ

tere vatan ke log to murda-parast haiñ

aai sada-e-haq ki yahi band-o-bast hain

tere watan ke log to murda-parast hain

election phir vo zil-hijj ke mahīne meñ karā.eñge

to kyā do daañt ke voter kī phir qurbāniyāñ hoñgī

election phir wo zil-hijj ke mahine mein karaenge

to kya do dant ke woter ki phir qurbaniyan hongi

kafan kī qīmat suneñge murde to is ke sadme se jī uTheñge

janāza uTThegā ab kisī kā na ab kisī kā mazār hogā

kafan ki qimat sunenge murde to is ke sadme se ji uThenge

janaza uTThega ab kisi ka na ab kisi ka mazar hoga

apne ustād ke sheroñ kā tiyā pāñcha kiyā

ai rahīm aap ke fan meñ ye kamāl achchhā hai

apne ustad ke sheron ka tiya pancha kiya

ai rahim aap ke fan mein ye kamal achchha hai

be-vaqūfī ke anokhe kārnāme dekh kar

achchhe-ḳhāse leaderoñ ko bhī gadhā kahnā paḌā

be-waqufi ke anokhe karname dekh kar

achchhe-KHase leaderon ko bhi gadha kahna paDa

buā ko to dekho na gahnā na paatā

bajaT haath meñ jaise dhobin kā khātā

bua ko to dekho na gahna na pata

bajaT hath mein jaise dhobin ka khata

ġhazal paḌhne se bilkul actor ma.alūm hotā hai

baḌhī haiñ is qadar zulfeñ 'jigar' ma.alūm hotā hai

ghazal paDhne se bilkul actor malum hota hai

baDhi hain is qadar zulfen 'jigar' malum hota hai

mumkin hai ki ho jaa.e nasha is se zarā sā

phir aap kā chālān bhī ho saktā hai is se

mumkin hai ki ho jae nasha is se zara sa

phir aap ka chaalan bhi ho sakta hai is se

'anvar' ḳhudā kare ki ye sachchī na ho ḳhabar

ikkīsvīñ sadī meñ vaDere bhī jā.eñge

'anwar' KHuda kare ki ye sachchi na ho KHabar

ikkiswin sadi mein waDere bhi jaenge

apnī shohrat kī alag raah nikālī ham ne

kisī dīvāñ se ġhazal koī churā lī ham ne

apni shohrat ki alag rah nikali hum ne

kisi diwan se ghazal koi chura li hum ne

zamāne kā chalan kyā pūchhte ho 'ḳhvāh-maḳhvāh' mujh se

vahī raftār be-Dhañgī jo pahle thī so ab bhī hai

zamane ka chalan kya puchhte ho 'KHwah-maKHwah' mujh se

wahi raftar be-Dhangi jo pahle thi so ab bhi hai

hamāre laal ko darkār hai vahī laḌkī

ki jis kā baap police meñ ho kam se kam deputy

hamare lal ko darkar hai wahi laDki

ki jis ka bap police mein ho kam se kam deputy

diyā hai naam kafan-chor jab se tum ne mujhe

purānī qabroñ ke murde mirī talāsh meñ haiñ

diya hai nam kafan-chor jab se tum ne mujhe

purani qabron ke murde meri talash mein hain

shaiḳh-sāhab ne masā.il meñ jakaḌ rakkhā hai

varna islām to āsān thā achchhā-ḳhāsā

shaiKH-sahab ne masail mein jakaD rakkha hai

warna islam to aasan tha achchha-KHasa

nahīñ hai bahr meñ be-vazn hai 'rahīm' magar

hamārī shā.irī sur meñ hai aur taal meñ hai

nahin hai bahr mein be-wazn hai 'rahim' magar

hamari shairi sur mein hai aur tal mein hai

uḌā letī haiñ sab naqadī talāshī jeb kī le kar

ham apnī hī kamā.ī un se Dar Dar ke chhupāte haiñ

uDa leti hain sab naqadi talashi jeb ki le kar

hum apni hi kamai un se Dar Dar ke chhupate hain

murdamāñ bisyār hoñge aur jā-e-qabr tañg

qabr kī taqsīm par murdoñ meñ chhiḌ jā.egī jañg

murdaman bisyar honge aur ja-e-qabr tang

qabr ki taqsim par murdon mein chhiD jaegi jang

ye rishvat ke haiñ paise din meñ kaise luuñ musalmāñ huuñ

maiñ le saktā nahīñ sar apne ye ilzām roze meñ

ye rishwat ke hain paise din mein kaise lun musalman hun

main le sakta nahin sar apne ye ilzam roze mein

dāḌhī kā naam le ke hameñ kyoñ ho Toktī

dāḌhī koī break hai jo cycle ko roktī

daDhi ka nam le ke hamein kyon ho Tokti

daDhi koi break hai jo cycle ko rokti

kahāñ hai tāb-o-tāqat jis pe tum ko naaz rahtā thā

javānī par na tum 'masrūr' itrāte to achchhā thā

kahan hai tab-o-taqat jis pe tum ko naz rahta tha

jawani par na tum 'masrur' itraate to achchha tha

durgat bane hai chaa.e meñ biscuit kī jis tarah

shādī ke baa'd logo vahī merā haal hai

durgat bane hai chae mein biscuit ki jis tarah

shadi ke ba'd logo wahi mera haal hai

na jis se pyaas bujh paa.e vo ''K-M-C'' kā nal tum ho

haqīqat ye hai merī ġhair-matbūa ġhazal tum ho

na jis se pyas bujh pae wo K-M-C ka nal tum ho

haqiqat ye hai meri ghair-matbua ghazal tum ho

siyāsat-dāñ jo tab.ī maut marte

to sāzish kī zarūrat hī na hotī

siyasat-dan jo tabi maut marte

to sazish ki zarurat hi na hoti

kahte the match dekhne vaale pukār ke

ustād jā rahe haiñ shab-e-ġham guzār ke

kahte the match dekhne wale pukar ke

ustad ja rahe hain shab-e-gham guzar ke

barhaman ko gavā.īñ Thumriyāñ is ne shivāle meñ

ḳhudā-baḳhshe bahut sī ḳhūbiyāñ thiiñ marne vaale meñ

barhaman ko gawain Thumriyan is ne shiwale mein

KHuda-baKHshe bahut si KHubiyan thin marne wale mein

jo bad-nasībī se kal ko mulāzmat na rahī

shikam kā apne sahārā mushā.era hogā

jo bad-nasibi se kal ko mulazmat na rahi

shikam ka apne sahaara mushaera hoga

tumhīñ batāo gale-bāz shā.eroñ ke baġhair

agar huā bhī to kaisā mushā.era hogā

tumhin batao gale-baz shaeron ke baghair

agar hua bhi to kaisa mushaera hoga

pāyān-e-kār ḳhatm huā jab ye tajziya

maiñ ne kahā huzūr to bole ki shukriya

payan-e-kar KHatm hua jab ye tajziya

main ne kaha huzur to bole ki shukriya

aulād kī kasrat pe hai sau sau yahāñ qadġhan

maiñ sau se ziyāda to bahar-taur karūñgā

aulad ki kasrat pe hai sau sau yahan qadghan

main sau se ziyaada to bahar-taur karunga

netā kā da.avā sun ke maiñ ye sochne lagā

qurbānī kankaTe kī to yaaro harām hai

neta ka dawa sun ke main ye sochne laga

qurbani kankaTe ki to yaro haram hai

kahīñ golī likhā hai aur kahīñ maar

ye golīmār likkhā jā rahā hai

kahin goli likha hai aur kahin mar

ye golimar likkha ja raha hai

das bachchoñ ke abbā haiñ magar hai yahī ḳhvāhish

har vaqt hī baiThī rahe lailā mire aage

das bachchon ke abba hain magar hai yahi KHwahish

har waqt hi baiThi rahe laila mere aage

kulliyāt-e-'mīr'-o-'ġhālib' se ġhazal laayā thā maiñ

aaj vo bhī chhap na paa.ī aap ke aḳhbār meñ!

kulliyat-e-'mir'-o-'ghaalib' se ghazal laya tha main

aaj wo bhi chhap na pai aap ke aKHbar mein!

numā.ish is tarah shā.ir ne bachchoñ kī lagā.ī hai

ki jaise us ke majmūe kī rasm-e-rū-numā.ī hai

numaish is tarah shair ne bachchon ki lagai hai

ki jaise us ke majmue ki rasm-e-ru-numai hai

marhūm shā'iroñ kā jo mil jaa.e kuchh kalām

sarqe kā le ke jaam chalo shā'irī kareñ

marhum sha'iron ka jo mil jae kuchh kalam

sarqe ka le ke jam chalo sha'iri karen

nurse ko dekh ke aa jaatī hai muñh pe raunaq

vo samajhte haiñ ki bīmār kā haal achchhā hai

nurse ko dekh ke aa jati hai munh pe raunaq

wo samajhte hain ki bimar ka haal achchha hai

tumheñ ḳhabar nahīñ thī kaisī ān-bān kī dum

kaTā ke bech lī tum ne to ḳhāndān kī dum

tumhein KHabar nahin thi kaisi aan-ban ki dum

kaTa ke bech li tum ne to KHandan ki dum

chaa.e bhī achchhī banātī haiñ mirī begam magar

muñh banāne meñ to un kā koī saanī hī nahīñ

chae bhi achchhi banati hain meri begam magar

munh banane mein to un ka koi sani hi nahin