ظلم پر اشعار

کہیں سورج نظر آتا نہیں ہے

حکومت شہر میں اب دھند کی ہے

قہر ڈھائے گی اسیروں کی تڑپ

اور بھی الجھیں گے حلقے دام کے

شاخ سے توڑ کے گلدان میں رکھا ہم کو

اور پھر اس پہ ہدایت کہ مہکتے رہنا

ہم پرندوں سے ہنر چھینے گا کون

جل گیا اک گھر تو سو گھر بن گئے

مر جائیں گے جب ہم تو بہت یاد کرے گی

جی بھر کے ستا لے شب ہجراں کوئی دن اور

آپ مظلوم کے اشکوں سے نہ کھلواڑ کریں

یہ وہ دریا ہیں جو شہروں کو نگل سکتے ہیں

کیا عشق مجازی نے حقیقت آشنا مجھ کو

بتوں نے ظلم وہ ڈھایا کہ یاد آیا خدا مجھ کو

سنی نہ ایک بھی ظالم نے آرزو دل کی

یہ کس کے سامنے ہم عرض حال کر بیٹھے

انہی پہ ہو کبھی نازل عذاب آگ اجل

وہی نگر کبھی ٹھہریں پیمبروں والے

گزرا تھا اپنے شہر سے راون فساد کا

ظالم محبتوں کی کتھائیں بھی لے گیا

ظلم سہہ کے بھی میں نے ہونٹ سی لیے غازیؔ

ایک ظرف ان کا ہے ایک ظرف میرا ہے

ظلم سے گر ذبح بھی کر دو مجھے پروا نہیں

لطف سے ڈرتا ہوں یہ میری قضا ہو جائے گا

میں ملک بدر صبر بھی کر سکتی تھی لیکن

یہ دیکھنا تھا ظلم کی سرحد ہے کہاں تک

خود فریبی میں مبتلا رکھ کر

ظلم کی تم نے انتہا کی ہے

ڈر اور ظلم کا یارو کوئی انت نہیں

خود کو ڈھونڈ رہے ہیں لوگ اب راون میں

معصوم تھا میں پھر بھی سزا کر دیا اس نے

اچھے بھلے قیدی کو رہا کر دیا اس نے

پوچھو مصلوب کرنے والوں سے

اب تو معصوم ہو گیا ہوں میں

راجا کا بیٹا راجا نہیں بنتا بنتے ہم

بس اس لئے کہانی میں مارا گیا ہمیں

دیکھی ہے رعونت بھی اور نام بھی دیکھا ہے

تاریخ نے ظالم کا انجام بھی دیکھا ہے

دنگے میں تو ہلاک ہوئے بے شمار لوگ

کل کس طرح چھپے گی خبر دیکھنا یہ ہے

اسی کو سونپ دی ہم نے حفاظت اپنے خیموں کی

وہ آدم خور جو لاشوں کا بیوپاری رہا برسوں

اس ستم پیشہ کا اعجاز ستم ہی ہوگا

دست قاتل کو اگر دست مسیحا لکھوں