Sher on Inquilab

inqalāb aa.egā raftār se māyūs na ho

bahut āhista nahīñ hai jo bahut tez nahīñ

inqalab aaega raftar se mayus na ho

bahut aahista nahin hai jo bahut tez nahin

kuchh usūloñ kā nasha thā kuchh muqaddas ḳhvāb the

har zamāne meñ shahādat ke yahī asbāb the

kuchh usulon ka nasha tha kuchh muqaddas KHwab the

har zamane mein shahadat ke yahi asbab the

ai inqalāb-e-nau tirī raftār dekh kar

ḳhud ham bhī sochte haiñ ki ab tak kahāñ rahe

ai inqalab-e-nau teri raftar dekh kar

KHud hum bhi sochte hain ki ab tak kahan rahe

rañg-e-mahfil chāhtā hai ik mukammal inqalāb

chand sham.oñ ke bhaḌakne se sahar hotī nahīñ

rang-e-mahfil chahta hai ek mukammal inqalab

chand shamon ke bhaDakne se sahar hoti nahin

kaam hai merā taġhayyur naam hai merā shabāb

merā na.ara inqilāb o inqilāb o inqilāb

kaam hai mera taghayyur nam hai mera shabab

mera nara inqilab o inqilab o inqilab

zulm phir zulm hai baḌhtā hai to miT jaatā hai

ḳhuun phir ḳhuun hai Tapkegā to jam jā.egā

zulm phir zulm hai baDhta hai to miT jata hai

KHun phir KHun hai Tapkega to jam jaega

inqalāb-e-sub.h kī kuchh kam nahīñ ye bhī dalīl

pattharoñ ko de rahe haiñ aa.ine khul kar javāb

inqalab-e-subh ki kuchh kam nahin ye bhi dalil

pattharon ko de rahe hain aaine khul kar jawab

bahut barbād haiñ lekin sadā-e-inqalāb aa.e

vahīñ se vo pukār uThegā jo zarra jahāñ hogā

bahut barbaad hain lekin sada-e-inqalab aae

wahin se wo pukar uThega jo zarra jahan hoga

dekh raftār-e-inqalāb 'firāq'

kitnī āhista aur kitnī tez

dekh raftar-e-inqalab 'firaq'

kitni aahista aur kitni tez

ham amn chāhte haiñ magar zulm ke ḳhilāf

gar jañg lāzmī hai to phir jañg hī sahī

hum amn chahte hain magar zulm ke KHilaf

gar jang lazmi hai to phir jang hi sahi

ham parvarish-e-lauh-o-qalam karte raheñge

jo dil pe guzartī hai raqam karte raheñge

hum parwarish-e-lauh-o-qalam karte rahenge

jo dil pe guzarti hai raqam karte rahenge

inqilābāt-e-dahr kī buniyād

haq jo haqdār tak nahīñ pahuñchā

inqilabaat-e-dahr ki buniyaad

haq jo haqdar tak nahin pahuncha

sutūn-e-dār pe rakhte chalo saroñ ke charāġh

jahāñ talak ye sitam kī siyāh raat chale

sutun-e-dar pe rakhte chalo saron ke charagh

jahan talak ye sitam ki siyah raat chale

ye kah rahī hai ishāroñ meñ gardish-e-gardūñ

ki jald ham koī saḳht inqalāb dekheñge

ye kah rahi hai ishaaron mein gardish-e-gardun

ki jald hum koi saKHt inqalab dekhenge

jo ek pal ke liye ḳhud badal nahīñ sakte

ye kah rahe haiñ ki saarā jahāñ badal Daalo

jo ek pal ke liye KHud badal nahin sakte

ye kah rahe hain ki sara jahan badal Dalo

koī to suud chukā.e koī to zimma le

us inqalāb kā jo aaj tak udhār sā hai

koi to sud chukae koi to zimma le

us inqalab ka jo aaj tak udhaar sa hai

inqilāboñ kī ghaḌī hai

har nahīñ haañ se baḌī hai

inqilabon ki ghaDi hai

har nahin han se baDi hai

duniyā meñ vahī shaḳhs hai tāzīm ke qābil

jis shaḳhs ne hālāt kā ruḳh moḌ diyā ho

duniya mein wahi shaKHs hai tazim ke qabil

jis shaKHs ne haalat ka ruKH moD diya ho

mere siine meñ nahīñ to tere siine meñ sahī

ho kahīñ bhī aag lekin aag jalnī chāhiye

mere sine mein nahin to tere sine mein sahi

ho kahin bhi aag lekin aag jalni chahiye