Sher on Deshbhakti

kahāñ haiñ aaj vo sham-e-vatan ke parvāne

bane haiñ aaj haqīqat unhīñ ke afsāne

kahan hain aaj wo sham-e-watan ke parwane

bane hain aaj haqiqat unhin ke afsane

dil se niklegī na mar kar bhī vatan kī ulfat

merī miTTī se bhī ḳhushbū-e-vafā aa.egī

dil se niklegi na mar kar bhi watan ki ulfat

meri miTTi se bhi KHushbu-e-wafa aaegi

vatan kī pāsbānī jān-o-īmāñ se bhī afzal hai

maiñ apne mulk kī ḳhātir kafan bhī saath rakhtā huuñ

watan ki pasbani jaan-o-iman se bhi afzal hai

main apne mulk ki KHatir kafan bhi sath rakhta hun

ai ahl-e-vatan shām-o-sahar jāgte rahnā

aġhyār haiñ āmāda-e-shar jāgte rahnā

ai ahl-e-watan sham-o-sahar jagte rahna

aghyar hain aamada-e-shar jagte rahna

diloñ meñ hubb-e-vatan hai agar to ek raho

nikhārnā ye chaman hai agar to ek raho

dilon mein hubb-e-watan hai agar to ek raho

nikhaarna ye chaman hai agar to ek raho

isī jagah isī din to huā thā ye elaan

añdhere haar ga.e zindabād hindostān

isi jagah isi din to hua tha ye elan

andhere haar gae zindabaad hindostan

vatan kī ret zarā eḌiyāñ ragaḌne de

mujhe yaqīñ hai ki paanī yahīñ se niklegā

watan ki ret zara eDiyan ragaDne de

mujhe yaqin hai ki pani yahin se niklega

kārvāñ jin kā luTā raah meñ āzādī kī

qaum kā mulk kā un dard ke māroñ ko salām

karwan jin ka luTa rah mein aazadi ki

qaum ka mulk ka un dard ke maron ko salam

ham bhī tire beTe haiñ zarā dekh hameñ bhī

ai ḳhāk-e-vatan tujh se shikāyat nahīñ karte

hum bhi tere beTe hain zara dekh hamein bhi

ai KHak-e-watan tujh se shikayat nahin karte

sarfaroshī kī tamannā ab hamāre dil meñ hai

dekhnā hai zor kitnā bāzu-e-qātil meñ hai

sarfaroshi ki tamanna ab hamare dil mein hai

dekhna hai zor kitna bazu-e-qatil mein hai

banānā hai hameñ ab apne hāthoñ apnī qismat ko

hameñ apne vatan kā aap beḌā paar karnā hai

banana hai hamein ab apne hathon apni qismat ko

hamein apne watan ka aap beDa par karna hai

dukh meñ sukh meñ har hālat meñ bhārat dil kā sahārā hai

bhārat pyārā desh hamārā sab deshoñ se pyārā hai

dukh mein sukh mein har haalat mein bhaarat dil ka sahaara hai

bhaarat pyara desh hamara sab deshon se pyara hai

zamīñ par ghar banāyā hai magar jannat meñ rahte haiñ

hamārī ḳhush-nasībī hai ki ham bhārat meñ rahte haiñ

zamin par ghar banaya hai magar jannat mein rahte hain

hamari KHush-nasibi hai ki hum bhaarat mein rahte hain

be-zār haiñ jo jazba-e-hubb-ul-vatanī se

vo log kisī se bhī mohabbat nahīñ karte

be-zar hain jo jazba-e-hubb-ul-watani se

wo log kisi se bhi mohabbat nahin karte

ham amn chāhte haiñ magar zulm ke ḳhilāf

gar jañg lāzmī hai to phir jañg hī sahī

hum amn chahte hain magar zulm ke KHilaf

gar jang lazmi hai to phir jang hi sahi

hai mohabbat is vatan se apnī miTTī se hameñ

is liye apnā kareñge jān-o-tan qurbān ham

hai mohabbat is watan se apni miTTi se hamein

is liye apna karenge jaan-o-tan qurban hum

vatan kī ḳhaak se mar kar bhī ham ko uns baaqī hai

mazā dāmān-e-mādar kā hai is miTTī ke dāman meñ

watan ki KHak se mar kar bhi hum ko uns baqi hai

maza daman-e-madar ka hai is miTTi ke daman mein

ye kah rahī hai ishāroñ meñ gardish-e-gardūñ

ki jald ham koī saḳht inqalāb dekheñge

ye kah rahi hai ishaaron mein gardish-e-gardun

ki jald hum koi saKHt inqalab dekhenge

lahū vatan ke shahīdoñ kā rañg laayā hai

uchhal rahā hai zamāne meñ nām-e-āzādī

lahu watan ke shahidon ka rang laya hai

uchhal raha hai zamane mein nam-e-azadi

saare jahāñ se achchhā hindostāñ hamārā

ham bulbuleñ haiñ is kī ye gulsitāñ hamārā

sare jahan se achchha hindostan hamara

hum bulbulen hain is ki ye gulsitan hamara

na hogā rā.egāñ ḳhūn-e-shahīdān-e-vatan hargiz

yahī surḳhī banegī ek din unvān-e-āzādī

na hoga raegan KHun-e-shahidan-e-watan hargiz

yahi surKHi banegi ek din unwan-e-azadi

sar-ba-kaf hind ke jāñ-bāz-e-vatan laḌte haiñ

teġh-e-nau le saf-e-dushman meñ ghuse paḌte haiñ

sar-ba-kaf hind ke jaan-baz-e-watan laDte hain

tegh-e-nau le saf-e-dushman mein ghuse paDte hain

bhārat ke ai sapūto himmat dikhā.e jaao

duniyā ke dil pe apnā sikka biThā.e jaao

bhaarat ke ai saputo himmat dikhae jao

duniya ke dil pe apna sikka biThae jao

kyā karishma hai mire jazba-e-āzādī kā

thī jo dīvār kabhī ab hai vo dar kī sūrat

kya karishma hai mere jazba-e-azadi ka

thi jo diwar kabhi ab hai wo dar ki surat

nāqūs se ġharaz hai na matlab azaañ se hai

mujh ko agar hai ishq to hindostāñ se hai

naqus se gharaz hai na matlab azan se hai

mujh ko agar hai ishq to hindostan se hai

us mulk kī sarhad ko koī chhū nahīñ saktā

jis mulk kī sarhad kī nigahbān haiñ āñkheñ

us mulk ki sarhad ko koi chhu nahin sakta

jis mulk ki sarhad ki nigahban hain aankhen

vo hindī naujavāñ ya.anī alam-bardār-e-āzādī

vatan kī pāsbāñ vo teġh-e-jauhar-dār-e-āzādī

wo hindi naujawan yani alam-bardar-e-azadi

watan ki pasban wo tegh-e-jauhar-dar-e-azadi

maiñ ne āñkhoñ meñ jalā rakhā hai āzādī kā tel

mat añdheroñ se Darā rakh ki maiñ jo huuñ so huuñ

main ne aankhon mein jala rakha hai aazadi ka tel

mat andheron se Dara rakh ki main jo hun so hun

vatan ke jāñ-nisār haiñ vatan ke kaam ā.eñge

ham is zamīñ ko ek roz āsmāñ banā.eñge

watan ke jaan-nisar hain watan ke kaam aaenge

hum is zamin ko ek roz aasman banaenge

ḳhudā ai kaash 'nāzish' jīte-jī vo vaqt bhī laa.e

ki jab hindostān kahlā.egā hindostān-e-āzādī

KHuda ai kash 'nazish' jite-ji wo waqt bhi lae

ki jab hindostan kahlaega hindostan-e-azadi