Sher on Peace

dushmanī jam kar karo lekin ye gunjā.ish rahe

jab kabhī ham dost ho jaa.eñ to sharminda na hoñ

dushmani jam kar karo lekin ye gunjaish rahe

jab kabhi hum dost ho jaen to sharminda na hon

agar tumhārī anā hī kā hai savāl to phir

chalo maiñ haath baḌhātā huuñ dostī ke liye

agar tumhaari ana hi ka hai sawal to phir

chalo main hath baDhata hun dosti ke liye

un kā jo farz hai vo ahl-e-siyāsat jāneñ

merā paiġhām mohabbat hai jahāñ tak pahuñche

un ka jo farz hai wo ahl-e-siyasat jaanen

mera paigham mohabbat hai jahan tak pahunche

ham amn chāhte haiñ magar zulm ke ḳhilāf

gar jañg lāzmī hai to phir jañg hī sahī

hum amn chahte hain magar zulm ke KHilaf

gar jang lazmi hai to phir jang hi sahi

saat sandūqoñ meñ bhar kar dafn kar do nafrateñ

aaj insāñ ko mohabbat kī zarūrat hai bahut

sat sanduqon mein bhar kar dafn kar do nafraten

aaj insan ko mohabbat ki zarurat hai bahut

jañg to ḳhud hī ek mas.ala hai

jañg kyā mas.aloñ kā hal degī

jang to KHud hi ek masala hai

jang kya masalon ka hal degi

'hafīz' apnī bolī mohabbat kī bolī

na urdu na hindī na hindostānī

'hafiz' apni boli mohabbat ki boli

na urdu na hindi na hindostani

sab se pur-amn vāqi.a ye hai

aadmī aadmī ko bhuul gayā

sab se pur-amn waqia ye hai

aadmi aadmi ko bhul gaya

sabhī ke diip sundar haiñ hamāre kyā tumhāre kyā

ujālā har taraf hai is kināre us kināre kyā

sabhi ke dip sundar hain hamare kya tumhaare kya

ujala har taraf hai is kinare us kinare kya

ik shajar aisā mohabbat kā lagāyā jaa.e

jis kā ham-sā.e ke āñgan meñ bhī saayā jaa.e

ek shajar aisa mohabbat ka lagaya jae

jis ka ham-sae ke aangan mein bhi saya jae

mujh meñ thoḌī sī jagah bhī nahīñ nafrat ke liye

maiñ to har vaqt mohabbat se bharā rahtā huuñ

mujh mein thoDi si jagah bhi nahin nafrat ke liye

main to har waqt mohabbat se bhara rahta hun

ajiib dard kā rishta hai saarī duniyā meñ

kahīñ ho jaltā makāñ apnā ghar lage hai mujhe

ajib dard ka rishta hai sari duniya mein

kahin ho jalta makan apna ghar lage hai mujhe

ye duniyā nafratoñ ke āḳhrī stage pe hai

ilaaj is kā mohabbat ke sivā kuchh bhī nahīñ hai

ye duniya nafraton ke aaKHri stage pe hai

ilaj is ka mohabbat ke siwa kuchh bhi nahin hai

parvāz meñ thā amn kā ma.asūm parinda

sunte haiñ ki be-chāra shajar tak nahīñ pahuñchā

parwaz mein tha amn ka masum parinda

sunte hain ki be-chaara shajar tak nahin pahuncha

ek taḳhtī amn ke paiġhām kī

Taañg diije ūñche mīnāroñ ke beach

ek taKHti amn ke paigham ki

Tang dije unche minaron ke beach

amn thā pyaar thā mohabbat thā

rañg thā nuur thā navā thā firāq

amn tha pyar tha mohabbat tha

rang tha nur tha nawa tha firaq

jañg kā shor bhī kuchh der to tham saktā hai

phir se ik amn kī afvāh uḌā dī jaa.e

jang ka shor bhi kuchh der to tham sakta hai

phir se ek amn ki afwah uDa di jae

rahe tazkire amn ke āshtī ke

magar bastiyoñ par baraste rahe bam

rahe tazkire amn ke aashti ke

magar bastiyon par baraste rahe bam

sunā hai amn-parastoñ kā vo ilāqa hai

vahīñ shikār kabūtar huā to kaise huā

suna hai amn-paraston ka wo ilaqa hai

wahin shikar kabutar hua to kaise hua

amn har shaḳhs kī zarūrat hai

is liye amn se mohabbat hai

amn har shaKHs ki zarurat hai

is liye amn se mohabbat hai

fazā ye amn-o-amāñ kī sadā rakheñ qaa.em

suno ye farz tumhārā bhī hai hamārā bhī

faza ye amn-o-aman ki sada rakhen qaem

suno ye farz tumhaara bhi hai hamara bhi

kitnā pur-amn hai māhaul fasādāt ke ba.ad

shaam ke vaqt nikaltā nahīñ bāhar koī

kitna pur-amn hai mahaul fasadat ke baad

sham ke waqt nikalta nahin bahar koi

amn kā qatl ho gayā jab se

shahr ab bad-havās rahtā hai

amn ka qatl ho gaya jab se

shahr ab bad-hawas rahta hai

shahr meñ amn-o-amāñ ho ye zarūrī hai magar

hākim-e-vaqt ke māthe pe likhā hī kuchh hai

shahr mein amn-o-aman ho ye zaruri hai magar

hakim-e-waqt ke mathe pe likha hi kuchh hai

mil ke sab amn-o-chain se rahiye

la.anteñ bhejiye fasādoñ par

mil ke sab amn-o-chain se rahiye

lanten bhejiye fasadon par

ḳhudā-e-amn jo kahtā hai ḳhud ko

zamīñ par ḳhud hī maqtal likh rahā hai

KHuda-e-amn jo kahta hai KHud ko

zamin par KHud hi maqtal likh raha hai

amn 'kaifī' ho nahīñ saktā kabhī

jab talak zulm-o-sitam maujūd hai

amn 'kaifi' ho nahin sakta kabhi

jab talak zulm-o-sitam maujud hai

amn ke saare sapne jhūTe

sapnoñ kī ta.abīreñ jhūTī

amn ke sare sapne jhuTe

sapnon ki tabiren jhuTi

amn aur āshtī se us ko kyā

us kā maqsad to intishār meñ hai

amn aur aashti se us ko kya

us ka maqsad to intishaar mein hai

haañ dil-e-be-tāb chande intizār

amn-o-rāhat kā Thikāna aur hai

han dil-e-be-tab chande intizar

amn-o-rahat ka Thikana aur hai

amn-e-ālam kī ḳhātir

jañg yugoñ se jaarī hai

amn-e-alam ki KHatir

jang yugon se jari hai

apne desh meñ ghar ghar amn hai ki jhagḌe haiñ

dekho roz-nāmoñ kī surḳhiyāñ batā.eñgī

apne desh mein ghar ghar amn hai ki jhagDe hain

dekho roz-namon ki surKHiyan bataengi

ba-nām-e-amn-o-amāñ kaun maarā jā.egā

na jaane aaj yahāñ kaun maarā jā.egā

ba-nam-e-amn-o-aman kaun mara jaega

na jaane aaj yahan kaun mara jaega

chalo amn-o-amāñ hai mai-kade meñ

vahīñ kuchh pal Thahar kar dekhte haiñ

chalo amn-o-aman hai mai-kade mein

wahin kuchh pal Thahar kar dekhte hain

ma.asūm hai ma.asūm bahut amn kī devī

qabze meñ liye ḳhanjar-e-ḳhūñ-ḳhār abhī tak

masum hai masum bahut amn ki dewi

qabze mein liye KHanjar-e-KHun-KHar abhi tak

bādaloñ ne aaj barsāyā lahū

amn kā har fāḳhta rone lagā

baadalon ne aaj barsaya lahu

amn ka har faKHta rone laga

dhuup ke saa.e meñ chup sādhe hue

kar rahe ho amn kā elaan kyā

dhup ke sae mein chup sadhe hue

kar rahe ho amn ka elan kya

amn aur tere ahd meñ zālim

kis tarah ḳhāk-e-rahguzar baiThe

amn aur tere ahd mein zalim

kis tarah KHak-e-rahguzar baiThe

amn parchār talak Thiik sahī lekin amn

tum ko lagtā hai ki hogā nahīñ hone vaalā

amn parchaar talak Thik sahi lekin amn

tum ko lagta hai ki hoga nahin hone wala