صحرا پر اشعار

بہار آئے تو میرا سلام کہہ دینا

مجھے تو آج طلب کر لیا ہے صحرا نے

صحرا کو بہت ناز ہے ویرانی پہ اپنی

واقف نہیں شاید مرے اجڑے ہوئے گھر سے

دیکھنا ہے تجھے صحرا تو پریشاں کیوں ہے

کچھ دنوں کے لیے مجھ سے مری آنکھیں لے جا

رکھی ہوئی ہے دونوں کی بنیاد ریت پر

صحرائے بے کراں کو سمندر لکھیں گے ہم

وسعت صحرا بھی منہ اپنا چھپا کر نکلی

ساری دنیا مرے کمرے کے برابر نکلی

عشق نے منصب لکھے جس دن مری تقدیر میں

داغ کی نقدی ملی صحرا ملا جاگیر میں

ہو سکے کیا اپنی وحشت کا علاج

میرے کوچے میں بھی صحرا چاہئے

کس نے صحرا میں مرے واسطے رکھی ہے یہ چھاؤں

دھوپ روکے ہے مرا چاہنے والا کیسا

اب اس پہ چاند ستارے بھی رشک کرتے ہیں

وہ اک دیا جو کبھی دشت میں بجھایا گیا

میں تو رہتا ہوں دشت میں مصروف

قیس کرتا ہے کام کاج مرا

مجنوں سے یہ کہنا کہ مرے شہر میں آ جائے

وحشت کے لیے ایک بیابان ابھی ہے

نہ ہم وحشت میں اپنے گھر سے نکلے

نہ صحرا اپنی ویرانی سے نکلا

کیا خبر کب قید بام و در سے اکتا جائے دل

بستیوں کے درمیاں صحرا بھی ہونا چاہیئے

پہلے تمام شہر کو صحرا بنائیں گے

پھر وحشتوں کی ریت پہ سویا کریں گے ہم

وحشی رقص چمکتے خنجر سرخ الاؤ

جنگل جنگل کانٹے دار قبیلے پھول

میرے عناصر خاک نہ ہوں بس رنگ بنیں

اور جنگل صحرا دریا پر برسے رنگ