Dūbne vaalā thā din shaam thī hone vaalī

yuuñ lagā mirī koī chiiz thī khone vaalī

Dubne wala tha din sham thi hone wali

yun laga meri koi chiz thi khone wali

jam.a kartī hai mujhe raat bahut mushkil se

sub.h ko ghar se nikalte hī bikharne ke liye

jama karti hai mujhe raat bahut mushkil se

subh ko ghar se nikalte hi bikharne ke liye

ḳhud banā letā huuñ maiñ apnī udāsī kā sabab

DhūñD hī letī hai 'shāhīñ' mujh ko vīrānī mirī

KHud bana leta hun main apni udasi ka sabab

DhunD hi leti hai 'shahin' mujh ko virani meri

kuchh zamāne kī ravish ne saḳht mujh ko kar diyā

aur kuchh bedard maiñ us ko bhulāne se huā

kuchh zamane ki rawish ne saKHt mujh ko kar diya

aur kuchh bedard main us ko bhulane se hua

ajnabī būd-o-bāsh ke qurb-o-javār meñ milā

bichhḌā to vo mujhe kisī aur dayār meñ milā

ajnabi bud-o-bash ke qurb-o-jawar mein mila

bichhDa to wo mujhe kisi aur dayar mein mila

judā thī baam se dīvār dar akelā thā

makīñ the ḳhud meñ magan aur ghar akelā thā

juda thi baam se diwar dar akela tha

makin the KHud mein magan aur ghar akela tha

maza to jab hai udāsī kī shaam ho 'shāhīñ'

aur us ke biich se shām-e-tarab nikal aa.e

maza to jab hai udasi ki sham ho 'shahin'

aur us ke bich se sham-e-tarab nikal aae

ḳhatā kis kī hai tum hī vaqt se bāhar rahe 'shāhīñ'

tumheñ āvāz dene ek lamha duur tak aayā

KHata kis ki hai tum hi waqt se bahar rahe 'shahin'

tumhein aawaz dene ek lamha dur tak aaya

samajh rahā hai zamāna riyā ke pīchhe huuñ

maiñ ek aur tarah se ḳhudā ke pīchhe huuñ

samajh raha hai zamana riya ke pichhe hun

main ek aur tarah se KHuda ke pichhe hun

thoḌā sā kahīñ jam.a bhī rakh dard kā paanī

mausam hai koī ḳhushk sā barsāt se aage

thoDa sa kahin jama bhi rakh dard ka pani

mausam hai koi KHushk sa barsat se aage

hisāb-e-dostāñ karne hī se mālūm ye hogā

ḳhasāre meñ huuñ yā ab maiñ ḳhasāre se nikal aayā

hisab-e-dostan karne hi se malum ye hoga

KHasare mein hun ya ab main KHasare se nikal aaya

maiñ ne dekhā hai chaman se ruḳhsat-e-gul kā samāñ

sab se pahle rañg maddham ek kone se huā

main ne dekha hai chaman se ruKHsat-e-gul ka saman

sab se pahle rang maddham ek kone se hua

kahīñ sadā-e-jaras hai na gard-e-rāh-e-safar

Thahar gayā hai kahāñ qāfila tamannā kā

kahin sada-e-jaras hai na gard-e-rah-e-safar

Thahar gaya hai kahan qafila tamanna ka

kis tarah be-mauj aur ḳhālī ravānī se huā

be-ḳhabar dariyā kahāñ par apne paanī se huā

kis tarah be-mauj aur KHali rawani se hua

be-KHabar dariya kahan par apne pani se hua

zaḳhm khāne se yā koī dhoka khāne se huā

baat kyā thī maiñ ḳhafā jis par zamāne se huā

zaKHm khane se ya koi dhoka khane se hua

baat kya thi main KHafa jis par zamane se hua