maiñ ronā chāhtā huuñ ḳhuub ronā chāhtā huuñ maiñ
phir us ke baad gahrī niind sonā chāhtā huuñ maiñ
main rona chahta hun KHub rona chahta hun main
phir us ke baad gahri nind sona chahta hun main
-
Tags : Aansooand 3 more
ai dost tujh ko rahm na aa.e to kyā karūñ
dushman bhī mere haal pe ab āb-dīda hai
ai dost tujh ko rahm na aae to kya karun
dushman bhi mere haal pe ab aab-dida hai
vaqt-e-ruḳhsat āb-dīda aap kyuuñ haiñ
jism se to jaañ hamārī jā rahī hai
waqt-e-ruKHsat aab-dida aap kyun hain
jism se to jaan hamari ja rahi hai
udāsī khīñch laa.ī hai yahāñ tak
maiñ aañsū thā samundar meñ paḌā huuñ
udasi khinch lai hai yahan tak
main aansu tha samundar mein paDa hun
tūfāñ uThā rahā hai mire dil meñ sail-e-ashk
vo din ḳhudā na laa.e jo maiñ āb-dīda huuñ
tufan uTha raha hai mere dil mein sail-e-ashk
wo din KHuda na lae jo main aab-dida hun
jhilmilāte rahe vo ḳhvāb jo puure na hue
dard bedār Tapaktā rahā aañsū aañsū
jhilmilate rahe wo KHwab jo pure na hue
dard bedar Tapakta raha aansu aansu
vahāñ ab ḳhvāb-gāheñ ban ga.ī haiñ
uThe the āb-dīda ham jahāñ se
wahan ab KHwab-gahen ban gai hain
uThe the aab-dida hum jahan se
kyuuñ khilaune TūTne par āb-dīda ho ga.e
ab tumheñ ham kyā batā.eñ kyā pareshānī huī
kyun khilaune TuTne par aab-dida ho gae
ab tumhein hum kya bataen kya pareshani hui
aisī kyā biit ga.ī mujh pe ki jis ke baa.is
āb-dīda haiñ mire hañsne hañsāne vaale
aisi kya bit gai mujh pe ki jis ke bais
aab-dida hain mere hansne hansane wale
ham terī tabī.at ko 'ḳhurshīd' nahīñ samjhe
patthar nazar aatā thā royā to bahut royā
hum teri tabiat ko 'KHurshid' nahin samjhe
patthar nazar aata tha roya to bahut roya
un kī yaad meñ bahte aañsū ḳhushk agar ho jā.eñge
saat samundar apnī ḳhālī ā.ankhoñ meñ bhar lā.ūñgā
un ki yaad mein bahte aansu KHushk agar ho jaenge
sat samundar apni KHali aaankhon mein bhar launga
vaañ sajda-e-niyāz kī miTTī ḳharāb hai
jab tak ki āb-e-dīda se taaza vazū na ho
wan sajda-e-niyaz ki miTTi KHarab hai
jab tak ki aab-e-dida se taza wazu na ho
āb-dīda huuñ maiñ ḳhud zaḳhm-e-jigar se apne
terī āñkhoñ meñ chhupā dard kahāñ se dekhūñ
aab-dida hun main KHud zaKHm-e-jigar se apne
teri aankhon mein chhupa dard kahan se dekhun
kapḌe gale ke mere na hoñ āb-dīda kyuuñ
mānind-e-abr dīda-e-tar ab to chhā gayā
kapDe gale ke mere na hon aab-dida kyun
manind-e-abr dida-e-tar ab to chha gaya
ye āb-dīda Thahar jaa.e jhiil kī sūrat
ki ek chāñd kā TukḌā nahānā chāhtā hai
ye aab-dida Thahar jae jhil ki surat
ki ek chand ka TukDa nahana chahta hai
tūfān-e-jahl ne mirā jauhar miTā diyā
maiñ ik kitāb ḳhuub huuñ par āb-dīda huuñ
tufan-e-jahl ne mera jauhar miTa diya
main ek kitab KHub hun par aab-dida hun
ham ishq tere haath se kyā kyā na dekhīñ hālateñ
dekh āb-dīda ḳhuuñ na ho ḳhūn-e-jigar paanī na kar
hum ishq tere hath se kya kya na dekhin haalaten
dekh aab-dida KHun na ho KHun-e-jigar pani na kar
kaun uTh gayā hai paas se mere jo 'mus.hafī'
rotā huuñ zaar zaar paḌā āb-dīda huuñ
kaun uTh gaya hai pas se mere jo 'mushafi'
rota hun zar zar paDa aab-dida hun
sailāb-e-chashm-e-tar se zamāna ḳharāb hai
shikve kahāñ kahāñ haiñ mire āb-dīda ke
sailab-e-chashm-e-tar se zamana KHarab hai
shikwe kahan kahan hain mere aab-dida ke
ronā hai agar yahī to 'qā.em'
ik ḳhalq ko ham Dubā rahe haiñ
rona hai agar yahi to 'qaem'
ek KHalq ko hum Duba rahe hain
ai sakinān-e-charḳh-e-muallā bacho bacho
tūfāñ huā buland mire āb-dīda kā
ai sakinan-e-charKH-e-mualla bacho bacho
tufan hua buland mere aab-dida ka
rone talak to kis ko hai fursat yahāñ sahāb
tūfāñ huā bhī jo Tuk ik āb-dīda huuñ
rone talak to kis ko hai fursat yahan sahab
tufan hua bhi jo Tuk ek aab-dida hun
