Sher on Falak

mat sahl hameñ jaano phirtā hai falak barsoñ

tab ḳhaak ke parde se insān nikalte haiñ

mat sahl hamein jaano phirta hai falak barson

tab KHak ke parde se insan nikalte hain

gungunātī huī aatī haiñ falak se būñdeñ

koī badlī tirī pāzeb se Takrā.ī hai

gungunati hui aati hain falak se bunden

koi badli teri pazeb se Takrai hai

idhar falak ko hai zid bijliyāñ girāne kī

udhar hameñ bhī hai dhun āshiyāñ banāne kī

idhar falak ko hai zid bijliyan girane ki

udhar hamein bhi hai dhun aashiyan banane ki

vo chaar chāñd falak ko lagā chalā huuñ 'qamar'

ki mere ba.ad sitāre kaheñge afsāne

wo chaar chand falak ko laga chala hun 'qamar'

ki mere baad sitare kahenge afsane

falak par uḌte jaate bādaloñ ko dekhtā huuñ maiñ

havā kahtī hai mujh se ye tamāshā kaisā lagtā hai

falak par uDte jate baadalon ko dekhta hun main

hawa kahti hai mujh se ye tamasha kaisa lagta hai

daulat kā falak toḌ ke aalam kī jabīñ par

mazdūr kī qismat ke sitāre nikal aa.e

daulat ka falak toD ke aalam ki jabin par

mazdur ki qismat ke sitare nikal aae

ujāloñ meñ chhupī thī ek laḌkī

falak kā rañg-roġhan kar ga.ī hai

ujalon mein chhupi thi ek laDki

falak ka rang-roghan kar gai hai

aañsū falak kī aañkh se Tapke tamām raat

aur sub.h tak zamīn kā āñchal bhigo ga.e

aansu falak ki aankh se Tapke tamam raat

aur subh tak zamin ka aanchal bhigo gae

falak kī ḳhabar kab hai nā-shā.iroñ ko

yūñhī ghar meñ baiThe havā bāñdhte haiñ

falak ki KHabar kab hai na-shairon ko

yunhi ghar mein baiThe hawa bandhte hain