Sher on Kiss

aatā hai jī meñ sāqi-e-mah-vash pe baar baar

lab chuum luuñ tirā lab-e-paimāna chhoḌ kar

aata hai ji mein saqi-e-mah-wash pe bar bar

lab chum lun tera lab-e-paimana chhoD kar

na ho barham jo bosa be-ijāzat le liyā maiñ ne

chalo jaane do betābī meñ aisā ho hī jaatā hai

na ho barham jo bosa be-ijazat le liya main ne

chalo jaane do betabi mein aisa ho hi jata hai

jī meñ hai itne bose liije ki aaj

mahr us ke vahāñ se uTh jaave

ji mein hai itne bose lije ki aaj

mahr us ke wahan se uTh jawe

bose apne āriz-e-gulfām ke

lā mujhe de de tire kis kaam ke

bose apne aariz-e-gulfam ke

la mujhe de de tere kis kaam ke

bose biivī ke hañsī bachchoñ kī āñkheñ maañ kī

qaid-ḳhāne meñ giraftār samajhiye ham ko

bose biwi ke hansi bachchon ki aankhen man ki

qaid-KHane mein giraftar samajhiye hum ko

bose meñ hoñT ulTā āshiq kā kaaT khāyā

terā dahan maze siiñ pur hai pe hai kaTorā

bose mein honT ulTa aashiq ka kaT khaya

tera dahan maze sin pur hai pe hai kaTora

sabhī in.aam nit paate haiñ ai shīrīñ-dahan tujh se

kabhū tū ek bose se hamārā muñh bhī mīThā kar

sabhi inam nit pate hain ai shirin-dahan tujh se

kabhu tu ek bose se hamara munh bhi miTha kar

bosa liyā jo us lab-e-shīrīñ kā mar ga.e

dī jaan ham ne chashma-e-āb-e-hayāt par

bosa liya jo us lab-e-shirin ka mar gae

di jaan hum ne chashma-e-ab-e-hayat par

bosa to us lab-e-shīrīñ se kahāñ miltā hai

gāliyāñ bhī milīñ ham ko to milīñ thoḌī sī

bosa to us lab-e-shirin se kahan milta hai

galiyan bhi milin hum ko to milin thoDi si

mohabbat ek pākīza amal hai is liye shāyad

simaT kar sharm saarī ek bose meñ chalī aa.ī

mohabbat ek pakiza amal hai is liye shayad

simaT kar sharm sari ek bose mein chali aai

bujhe laboñ pe hai bosoñ kī raakh bikhrī huī

maiñ is bahār meñ ye raakh bhī uḌā dūñgā

bujhe labon pe hai boson ki rakh bikhri hui

main is bahaar mein ye rakh bhi uDa dunga

lab-e-nāzuk ke bose luuñ to missī muñh banātī hai

kaf-e-pā ko agar chūmūñ to mehñdī rañg laatī hai

lab-e-nazuk ke bose lun to missi munh banati hai

kaf-e-pa ko agar chumun to mehndi rang lati hai

mil ga.e the ek baar us ke jo mere lab se lab

umr bhar hoñToñ pe apne maiñ zabāñ pherā kiye

mil gae the ek bar us ke jo mere lab se lab

umr bhar honTon pe apne main zaban phera kiye

ham ko gaalī ke liye bhī lab hilā sakte nahīñ

ġhair ko bosa diyā to muñh se dikhlā kar diyā

hum ko gali ke liye bhi lab hila sakte nahin

ghair ko bosa diya to munh se dikhla kar diya

us lab se mil hī jā.egā bosa kabhī to haañ

shauq-e-fuzūl o jur.at-e-rindāna chāhiye

us lab se mil hi jaega bosa kabhi to han

shauq-e-fuzul o jurat-e-rindana chahiye

guḌ siiñ mīThā hai bosa tujh lab kā

is jalebī meñ qand o shakkar hai

guD sin miTha hai bosa tujh lab ka

is jalebi mein qand o shakkar hai

us vaqt dil pe kyūñke kahūñ kyā guzar gayā

bosa lete liyā to sahī lek mar gayā

us waqt dil pe kyunke kahun kya guzar gaya

bosa lete liya to sahi lek mar gaya

bosa jo talab maiñ ne kiyā hañs ke vo bole

ye husn kī daulat hai luTā.ī nahīñ jaatī

bosa jo talab main ne kiya hans ke wo bole

ye husn ki daulat hai luTai nahin jati

kyā taab kyā majāl hamārī ki bosa leñ

lab ko tumhāre lab se milā kar kahe baġhair

kya tab kya majal hamari ki bosa len

lab ko tumhaare lab se mila kar kahe baghair

bosāñ labāñ siiñ dene kahā kah ke phir gayā

pyāla bharā sharāb kā afsos gir gayā

bosan laban sin dene kaha kah ke phir gaya

pyala bhara sharab ka afsos gir gaya

bole vo bosa-hā-e-paiham par

are kam-baḳht kuchh hisāb bhī hai

bole wo bosa-ha-e-paiham par

are kam-baKHt kuchh hisab bhi hai

mazā āb-e-baqā kā jān-e-jānāñ

tirā bosa liyā hove so jaane

maza aab-e-baqa ka jaan-e-jaanan

tera bosa liya howe so jaane

lab-e-jāñ-baḳhsh tak jā kar rahe mahrūm bosa se

ham is paanī ke pyāse the jo taḌpātā hai sāhil par

lab-e-jaan-baKHsh tak ja kar rahe mahrum bosa se

hum is pani ke pyase the jo taDpata hai sahil par

bosa hoñToñ kā mil gayā kis ko

dil meñ kuchh aaj dard mīThā hai

bosa honTon ka mil gaya kis ko

dil mein kuchh aaj dard miTha hai

dhamkā ke bose lūñgā ruḳh-e-rashk-e-māh kā

chandā vasūl hotā hai sāhab dabāv se

dhamka ke bose lunga ruKH-e-rashk-e-mah ka

chanda wasul hota hai sahab dabaw se

dikhā ke jumbish-e-lab hī tamām kar ham ko

na de jo bosa to muñh se kahīñ javāb to de

dikha ke jumbish-e-lab hi tamam kar hum ko

na de jo bosa to munh se kahin jawab to de

bosa-e-ruḳhsār par takrār rahne dījiye

lījiye yā dījiye inkār rahne dījiye

bosa-e-ruKHsar par takrar rahne dijiye

lijiye ya dijiye inkar rahne dijiye

ek bosa hoñT par phailā tabassum ban gayā

jo harārat thī mirī us ke badan meñ aa ga.ī

ek bosa honT par phaila tabassum ban gaya

jo hararat thi meri us ke badan mein aa gai

kyā qayāmat hai ki aariz un ke niile paḌ ga.e

ham ne to bosa liyā thā ḳhvāb meñ tasvīr kā

kya qayamat hai ki aariz un ke nile paD gae

hum ne to bosa liya tha KHwab mein taswir ka

bosa dete nahīñ aur dil pe hai har lahza nigāh

jī meñ kahte haiñ ki muft aa.e to maal achchhā hai

bosa dete nahin aur dil pe hai har lahza nigah

ji mein kahte hain ki muft aae to mal achchha hai

ek bose ke talabgār haiñ ham

aur māñgeñ to gunahgār haiñ ham

ek bose ke talabgar hain hum

aur mangen to gunahgar hain hum

jī uThūñ phir kar agar tū ek bosa de mujhe

chūsnā lab kā tire hai mujh ko juuñ āb-e-hayāt

ji uThun phir kar agar tu ek bosa de mujhe

chusna lab ka tere hai mujh ko jun aab-e-hayat

namkīñ goyā kabāb haiñ phīke sharāb ke

bosā hai tujh labāñ kā maze-dār chaTpaTā

namkin goya kabab hain phike sharab ke

bosa hai tujh laban ka maze-dar chaTpaTa

liyā maiñ bosa ba-zor us sipāhī-zāde kā

azīzo ab bhī mirī kuchh dilāvarī dekhī

liya main bosa ba-zor us sipahi-zade ka

azizo ab bhi meri kuchh dilawari dekhi

ek bosa māñgtā hai tum se 'hātim' sā gadā

jāniyo rāh-e-ḳhudā meñ ye bhī ik ḳhairāt kī

ek bosa mangta hai tum se 'hatim' sa gada

jaaniyo rah-e-KHuda mein ye bhi ek KHairaat ki

luTāte haiñ vo daulat husn kī bāvar nahīñ aatā

hameñ to ek bosa bhī baḌī mushkil se miltā hai

luTate hain wo daulat husn ki bawar nahin aata

hamein to ek bosa bhi baDi mushkil se milta hai

sādgī dekh ki bose kī tama.a rakhtā huuñ

jin laboñ se ki mayassar nahīñ dushnām mujhe

sadgi dekh ki bose ki tama rakhta hun

jin labon se ki mayassar nahin dushnam mujhe

lab-e-ḳhayāl se us lab kā jo liyā bosa

to muñh hī muñh meñ ajab tarah kā mazā aayā

lab-e-KHayal se us lab ka jo liya bosa

to munh hi munh mein ajab tarah ka maza aaya

maiñ aa rahā huuñ abhī chuum kar badan us kā

sunā thā aag pe bosa raqam nahīñ hotā

main aa raha hun abhi chum kar badan us ka

suna tha aag pe bosa raqam nahin hota

jaldī talab-e-bosa pe kiije to kahe vaah

aisā ise kyā samjhe ho tum muñh kā nivālā

jaldi talab-e-bosa pe kije to kahe wah

aisa ise kya samjhe ho tum munh ka niwala

ham to kyūñkar kaheñ ki bosa do

gar ināyat karo ināyat hai

hum to kyunkar kahen ki bosa do

gar inayat karo inayat hai

jo un ko lipTā ke gaal chūmā hayā se aane lagā pasīna

huī hai bosoñ kī garm bhaTTī khiñche na kyūñkar sharāb-e-āriz

jo un ko lipTa ke gal chuma haya se aane laga pasina

hui hai boson ki garm bhaTTi khinche na kyunkar sharab-e-ariz

kyā ḳhuub tum ne ġhair ko bosa nahīñ diyā

bas chup raho hamāre bhī muñh meñ zabān hai

kya KHub tum ne ghair ko bosa nahin diya

bas chup raho hamare bhi munh mein zaban hai

ruḳhsār par hai rañg-e-hayā kā faroġh aaj

bose kā naam maiñ ne liyā vo nikhar ga.e

ruKHsar par hai rang-e-haya ka farogh aaj

bose ka nam main ne liya wo nikhar gae

dil-lagī meñ hasrat-e-dil kuchh nikal jaatī to hai

bose le lete haiñ ham do-chār hañste bolte

dil-lagi mein hasrat-e-dil kuchh nikal jati to hai

bose le lete hain hum do-chaar hanste bolte

be-ḳhudī meñ le liyā bosa ḳhatā kiije muaaf

ye dil-e-betāb kī saarī ḳhatā thī maiñ na thā

be-KHudi mein le liya bosa KHata kije muaf

ye dil-e-betab ki sari KHata thi main na tha

lajā kar sharm khā kar muskurā kar

diyā bosa magar muñh ko banā kar

laja kar sharm kha kar muskura kar

diya bosa magar munh ko bana kar

bosa āñkhoñ kā jo māñgā to vo hañs kar bole

dekh lo duur se khāne ke ye bādām nahīñ

bosa aankhon ka jo manga to wo hans kar bole

dekh lo dur se khane ke ye baadam nahin

bosa jo ruḳh kā dete nahīñ lab kā dījiye

ye hai masal ki phuul nahīñ pañkhuḌī sahī

bosa jo ruKH ka dete nahin lab ka dijiye

ye hai masal ki phul nahin pankhuDi sahi

le lo bosa apnā vāpas kis liye takrār kī

kyā koī jāgīr ham ne chhīn lī sarkār kī

le lo bosa apna wapas kis liye takrar ki

kya koi jagir hum ne chhin li sarkar ki