راز پر اشعار

دفن کر سکتا ہوں سینے میں تمہارے راز کو

اور تم چاہو تو افسانہ بنا سکتا ہوں میں

یہ میرے عشق کی مجبوریاں معاذ اللہ

تمہارا راز تمہیں سے چھپا رہا ہوں میں

جن کو اپنی خبر نہیں اب تک

وہ مرے دل کا راز کیا جانیں

ہر صدا پر لگے ہیں کان یہاں

دل سنبھالے رہو زباں کی طرح

کوئی سمجھے گا کیا راز گلشن

جب تک الجھے نہ کانٹوں سے دامن

تیرا ہر راز چھپائے ہوئے بیٹھا ہے کوئی

خود کو دیوانہ بنائے ہوئے بیٹھا ہے کوئی

غیروں پہ کھل نہ جائے کہیں راز دیکھنا

میری طرف بھی غمزۂ غماز دیکھنا

اپنا ہی حال تک نہ کھلا مجھ کو تابہ مرگ

میں کون ہوں کہاں سے چلا تھا کہاں گیا

کوئی کس طرح راز الفت چھپائے

نگاہیں ملیں اور قدم ڈگمگائے

ان سے سب حال دغاباز کہے دیتے ہیں

میرے ہم راز مرا راز کہے دیتے ہیں

دامن اشکوں سے تر کریں کیوں کر

راز کو مشتہر کریں کیوں کر

ہائے وہ راز غم کہ جو اب تک

تیرے دل میں مری نگاہ میں ہے

میں محبت نہ چھپاؤں تو عداوت نہ چھپا

نہ یہی راز میں اب ہے نہ وہی راز میں ہے

بہ پاس دل جسے اپنے لبوں سے بھی چھپایا تھا

مرا وہ راز تیرے ہجر نے پہنچا دیا سب تک

زبان و دہن سے جو کھلتے نہیں ہیں

وہ کھل جاتے ہیں راز اکثر نظر سے

کتنے ہی راز سب پر عیاں ہو گئے

اک ترا راز الفت چھپاتے ہوئے

وہ جو اک بات ہے جو تجھ کو بتائی نہ گئی

وہ جو اک راز ہے جو کھل نہ سکا وحشت ہے

ہم پہ یہ راز کھلا بھی تو بہت دیر کے بعد

اصل کردار کہانی میں کسی اور کا ہے

آنکھوں کے سب موتی دانے آئینے ہیں باطن کے

گھر کا بھیدی لنکا ڈھائے میں بھی سوچوں تو بھی سوچ

سکھیوں سے کب سکھیاں اپنے جی کے بھید چھپاتی ہیں

ہم سے نہیں تو اس سے کہہ دے کرتا کہاں کلام ہے چاند

کس پہ کھلتے ہیں رات کے اسرار

کون یاں شب گزار ہے ایسا

ضبط راز غم پہ سو جانیں بھی کر دیتے نثار

کیا بتائیں بس زباں پر ان کا نام آ ہی گیا