Sher on Shohrat

kaun maslūb huā husn kā kirdār ki ham

shohrat-e-ishq meñ badnām huā yaar ki ham

kaun maslub hua husn ka kirdar ki hum

shohrat-e-ishq mein badnam hua yar ki hum

maiñ ise shohrat kahūñ yā apnī rusvā.ī kahūñ

mujh se pahle us galī meñ mere afsāne ga.e

main ise shohrat kahun ya apni ruswai kahun

mujh se pahle us gali mein mere afsane gae

'farhat' tire naġhmoñ kī vo shohrat hai jahāñ meñ

vallāh tirā rañg-e-suḳhan yaad rahegā

'farhat' tere naghmon ki wo shohrat hai jahan mein

wallah tera rang-e-suKHan yaad rahega

merī shohrat ke pīchhe hai

haath bahut rusvā.ī kā

meri shohrat ke pichhe hai

hath bahut ruswai ka

kyā pūchhte ho kaun hai ye kis kī hai shohrat

kyā tum ne kabhī 'dāġh' kā dīvāñ nahīñ dekhā

kya puchhte ho kaun hai ye kis ki hai shohrat

kya tum ne kabhi 'dagh' ka diwan nahin dekha

ishq mujh ko nahīñ vahshat hī sahī

merī vahshat tirī shohrat hī sahī

ishq mujh ko nahin wahshat hi sahi

meri wahshat teri shohrat hi sahi

biktā rahtā sar-e-bāzār ka.ī qistoñ meñ

shukr hai mere ḳhudā ne mujhe shohrat nahīñ dī

bikta rahta sar-e-bazar kai qiston mein

shukr hai mere KHuda ne mujhe shohrat nahin di

khulī na mujh pe bhī dīvāngī mirī barsoñ

mire junūn kī shohrat tire bayāñ se huī

khuli na mujh pe bhi diwangi meri barson

mere junun ki shohrat tere bayan se hui

miyāñ ye chādar-e-shohrat tum apne paas rakho

ki is se paañv jo Dhāñpeñ to sar nikaltā hai

miyan ye chadar-e-shohrat tum apne pas rakho

ki is se panw jo Dhanpen to sar nikalta hai

shohrat kī fazāoñ meñ itnā na uḌo 'sāġhar'

parvāz na kho jaa.e in ūñchī uḌānoñ meñ

shohrat ki fazaon mein itna na uDo 'saghar'

parwaz na kho jae in unchi uDanon mein

apne afsāne kī shohrat use manzūr na thī

us ne kirdār badal kar mirā qissa likhkhā

apne afsane ki shohrat use manzur na thi

us ne kirdar badal kar mera qissa likhkha

us ghar kī badaulat mire sheroñ ko hai shohrat

vo ghar ki jo is shahr meñ badnām bahut hai

us ghar ki badaulat mere sheron ko hai shohrat

wo ghar ki jo is shahr mein badnam bahut hai

shohrat kī bulandī bhī pal bhar kā tamāshā hai

jis Daal pe baiThe ho vo TuuT bhī saktī hai

shohrat ki bulandi bhi pal bhar ka tamasha hai

jis Dal pe baiThe ho wo TuT bhi sakti hai

ghar se us kā bhī nikalnā ho gayā āḳhir muhāl

merī rusvā.ī se shohrat kū-ba-kū us kī bhī thī

ghar se us ka bhi nikalna ho gaya aaKHir muhaal

meri ruswai se shohrat ku-ba-ku us ki bhi thi

vo junūñ ko baḌhā.e jā.eñge

un kī shohrat hai merī rusvā.ī

wo junun ko baDhae jaenge

un ki shohrat hai meri ruswai

jo āsmāñ kī bulandī ko chhūne vaalā thā

vahī mināra zamīñ par dhaḌām se aayā

jo aasman ki bulandi ko chhune wala tha

wahi minara zamin par dhaDam se aaya

kho diyā shohrat ne apnī sher-ḳhvānī kā mazā

daad mil jaatī hai 'nātiq' har ratab yābis ke ba.ad

kho diya shohrat ne apni sher-KHwani ka maza

dad mil jati hai 'natiq' har ratab yabis ke baad

ulajh rahe haiñ bahut log merī shohrat se

kisī ko yuuñ to koī mujh se iḳhtilāf na thā

ulajh rahe hain bahut log meri shohrat se

kisi ko yun to koi mujh se iKHtilaf na tha

ham tālib-e-shohrat haiñ hameñ nañg se kyā kaam

badnām agar hoñge to kyā naam na hogā

hum talib-e-shohrat hain hamein nang se kya kaam

badnam agar honge to kya nam na hoga

bulandī der tak kis shaḳhs ke hisse meñ rahtī hai

bahut ūñchī 'imārat har ghaḌī ḳhatre meñ rahtī hai

bulandi der tak kis shaKHs ke hisse mein rahti hai

bahut unchi 'imarat har ghaDi KHatre mein rahti hai

mujh se ye pūchh rahe haiñ mire ahbāb 'azīz'

kyā milā shahr-e-suḳhan meñ tumheñ shohrat ke sivā

mujh se ye puchh rahe hain mere ahbab 'aziz'

kya mila shahr-e-suKHan mein tumhein shohrat ke siwa

kisī ko be-sabab shohrat nahīñ miltī hai ai 'vāhid'

unhīñ ke naam haiñ duniyā meñ jin ke kaam achchhe haiñ

kisi ko be-sabab shohrat nahin milti hai ai 'wahid'

unhin ke nam hain duniya mein jin ke kaam achchhe hain

ab tū darvāze se apne naam kī taḳhtī utaar

lafz nañge ho ga.e shohrat bhī gaalī ho ga.ī

ab tu darwaze se apne nam ki taKHti utar

lafz nange ho gae shohrat bhi gali ho gai