بندگی پر اشعار

بندگی ہم نے چھوڑ دی ہے فرازؔ

کیا کریں لوگ جب خدا ہو جائیں

عاشقی سے ملے گا اے زاہد

بندگی سے خدا نہیں ملتا

دل ہے قدموں پر کسی کے سر جھکا ہو یا نہ ہو

بندگی تو اپنی فطرت ہے خدا ہو یا نہ ہو

کیا وہ نمرود کی خدائی تھی

بندگی میں مرا بھلا نہ ہوا

تو میرے سجدوں کی لاج رکھ لے شعور سجدہ نہیں ہے مجھ کو

یہ سر ترے آستاں سے پہلے کسی کے آگے جھکا نہیں ہے

رہنے دے اپنی بندگی زاہد

بے محبت خدا نہیں ملتا

بندگی میں بھی وہ آزادہ و خودبیں ہیں کہ ہم

الٹے پھر آئے در کعبہ اگر وا نہ ہوا

سلام ان پہ تہ تیغ بھی جنہوں نے کہا

جو تیرا حکم جو تیری رضا جو تو چاہے

یہی ہے زندگی اپنی یہی ہے بندگی اپنی

کہ ان کا نام آیا اور گردن جھک گئی اپنی

جواز کوئی اگر میری بندگی کا نہیں

میں پوچھتا ہوں تجھے کیا ملا خدا ہو کر

صدق و صفائے قلب سے محروم ہے حیات

کرتے ہیں بندگی بھی جہنم کے ڈر سے ہم

دوستی بندگی وفا و خلوص

ہم یہ شمع جلانا بھول گئے

قبول ہو کہ نہ ہو سجدہ و سلام اپنا

تمہارے بندے ہیں ہم بندگی ہے کام اپنا

بندگی کا مری انداز جدا ہوتا ہے

میرا کعبہ میرے سجدوں میں چھپا ہوتا ہے

شاہوں کی بندگی میں سر بھی نہیں جھکایا

تیرے لیے سراپا آداب ہو گئے ہم

اپنی خوئے وفا سے ڈرتا ہوں

عاشقی بندگی نہ ہو جائے

خلوص ہو تو کہیں بندگی کی قید نہیں

صنم کدے میں طواف حرم بھی ممکن ہے

کیسے کریں بندگی ظفرؔ واں

بندوں کی جہاں خدائیاں ہیں

مری انا نے سبق دے کے خود پرستی کا

چھڑا دیا ہے زمانے کی بندگی سے مجھے

اب آگے جو بھی ہو انجام دیکھا جائے گا

خدا تلاش لیا اور بندگی کر لی