منزل پر اشعار

میں اکیلا ہی چلا تھا جانب منزل مگر

لوگ ساتھ آتے گئے اور کارواں بنتا گیا

کسی کو گھر سے نکلتے ہی مل گئی منزل

کوئی ہماری طرح عمر بھر سفر میں رہا

جس دن سے چلا ہوں مری منزل پہ نظر ہے

آنکھوں نے کبھی میل کا پتھر نہیں دیکھا

صرف اک قدم اٹھا تھا غلط راہ شوق میں

منزل تمام عمر مجھے ڈھونڈھتی رہی

عقابی روح جب بیدار ہوتی ہے جوانوں میں

نظر آتی ہے ان کو اپنی منزل آسمانوں میں

نہیں نگاہ میں منزل تو جستجو ہی سہی

نہیں وصال میسر تو آرزو ہی سہی

فیضؔ تھی راہ سر بسر منزل

ہم جہاں پہنچے کامیاب آئے

کوئی منزل کے قریب آ کے بھٹک جاتا ہے

کوئی منزل پہ پہنچتا ہے بھٹک جانے سے

اس نے منزل پہ لا کے چھوڑ دیا

عمر بھر جس کا راستا دیکھا

نہیں ہوتی ہے راہ عشق میں آسان منزل

سفر میں بھی تو صدیوں کی مسافت چاہئے ہے

وہ کیا منزل جہاں سے راستے آگے نکل جائیں

سو اب پھر اک سفر کا سلسلہ کرنا پڑے گا

اے جذبۂ دل گر میں چاہوں ہر چیز مقابل آ جائے

منزل کے لیے دو گام چلوں اور سامنے منزل آ جائے

سب کو پہنچا کے ان کی منزل پر

آپ رستے میں رہ گیا ہوں میں

مجھے آ گیا یقیں سا کہ یہی ہے میری منزل

سر راہ جب کسی نے مجھے دفعتاً پکارا

حسرت پہ اس مسافر بے کس کی روئیے

جو تھک گیا ہو بیٹھ کے منزل کے سامنے

میری تقدیر میں منزل نہیں ہے

غبار کارواں ہے اور میں ہوں

ایک منزل ہے مگر راہ کئی ہیں اظہرؔ

سوچنا یہ ہے کہ جاؤ گے کدھر سے پہلے

منزلیں گرد کے مانند اڑی جاتی ہیں

وہی انداز جہان گزراں ہے کہ جو تھا

کوئی منزل آخری منزل نہیں ہوتی فضیلؔ

زندگی بھی ہے مثال موج دریا راہ رو

منزل ملی مراد ملی مدعا ملا

سب کچھ مجھے ملا جو ترا نقش پا ملا

محبت آپ ہی منزل ہے اپنی

نہ جانے حسن کیوں اترا رہا ہے

منزل نہ ملی تو غم نہیں ہے

اپنے کو تو کھو کے پا گیا ہوں

راہ بر رہزن نہ بن جائے کہیں اس سوچ میں

چپ کھڑا ہوں بھول کر رستے میں منزل کا پتا

مجھ کو منزل بھی نہ پہچان سکی

میں کہ جب گرد سفر سے نکلا

کس منزل مراد کی جانب رواں ہیں ہم

اے رہروان خاک بسر پوچھتے چلو

چلا میں جانب منزل تو یہ ہوا معلوم

یقیں گمان میں گم ہے گماں ہے پوشیدہ

نہ تو رنج و غم سے ہی ربط ہے نہ ہی آشنائے خوشی ہوں میں

مری زندگی بھی عجیب ہے اسے منزلوں کا پتا نہیں

خود بخود راہ لئے جاتی ہے اس کی جانب

اب کہاں تک ہے رسائی مجھے معلوم نہیں

منزل پہ پہنچ سکتے نہیں ایسے مسافر

ہر گام پہ ہو خوف جنہیں آبلہ پا کا

پلٹ آتا ہوں میں مایوس ہو کر ان مقاموں سے

جہاں سے سلسلہ نزدیک تر ہوتا ہے منزل کا

چاند ہے تیرا ہم سفر کوئی نہیں ہے راہبر

آگے قدم بڑھا کے رکھ دور کی روشنی نہ دیکھ

فکر منزل ہے نہ ہوش جادۂ منزل مجھے

جا رہا ہوں جس طرف لے جا رہا ہے دل مجھے

پہلے تلاش کیجئے منزل کی رہ گزر

پھر سوچیے کہ راہ میں دیوار کون ہے

تم خود ہی چلے آؤ گے شاید سر منزل

اک راہ نکالی ہے مری در بدری نے

ہر راستے سے منزل ہستی ہے بہت دور

جائے گا مرے ساتھ غم یار کہاں تک

میں نے منزل کی دعا مانگی تھی

میری رفتار بڑھا دی گئی ہے

ہم سے ملتا ہے منزلوں کا پتہ

اور خود بے نشان ہیں ہم لوگ

تری نظروں سے گزری رہ گزر بھی

ہزاروں منزلوں کا راستہ ہے

رستوں کے پیچ و خم نے کہیں اور لا دیا

جانا ہمیں جہاں تھا یہ منزل نہیں ہے وہ

کون رہتا ہے سفر میں عمر بھر

مستقل کوئی ٹھکانا چاہیئے

میں سدرۃ المنتہیٰ پہ آ کے رکی ہوئی ہوں

اب آگے جو بھی کرے گا میرا خدا کرے گا