Sher on Mazi

yād-e-māzī 'azāb hai yā-rab

chhīn le mujh se hāfiza merā

yaad-e-mazi 'azab hai ya-rab

chhin le mujh se hafiza mera

māzī-e-marhūm kī nākāmiyoñ kā zikr chhoḌ

zindagī kī fursat-e-bāqī se koī kaam le

mazi-e-marhum ki nakaamiyon ka zikr chhoD

zindagi ki fursat-e-baqi se koi kaam le

yādoñ kī bauchhāroñ se jab palkeñ bhīgne lagtī haiñ

soñdhī soñdhī lagtī hai tab maazī kī rusvā.ī bhī

yaadon ki bauchhaaron se jab palken bhigne lagti hain

sondhi sondhi lagti hai tab mazi ki ruswai bhi

band kar de koī maazī kā darīcha mujh par

ab is ā.īne meñ sūrat nahīñ dekhī jaatī

band kar de koi mazi ka daricha mujh par

ab is aaine mein surat nahin dekhi jati

ishq kī har dāstāñ meñ ek hī nukta milā

ishq kā maazī huā kartā hai mustaqbil nahīñ

ishq ki har dastan mein ek hi nukta mila

ishq ka mazi hua karta hai mustaqbil nahin

vo maazī jo hai ik majmua ashkoñ aur aahoñ kā

na jaane mujh ko is maazī se kyuuñ itnī mohabbat hai

wo mazi jo hai ek majmua ashkon aur aahon ka

na jaane mujh ko is mazi se kyun itni mohabbat hai

kabhī mileñge jo rāste meñ to muñh phirā kar palaT paḌeñge

kahīñ suneñge jo naam terā to chup raheñge nazar jhukā ke

kabhi milenge jo raste mein to munh phira kar palaT paDenge

kahin sunenge jo nam tera to chup rahenge nazar jhuka ke

hañsī meñ kaTtī thiiñ rāteñ ḳhushī meñ din guzartā thā

'kañval' maazī kā afsāna na tum bhūle na ham bhūle

hansi mein kaTti thin raaten KHushi mein din guzarta tha

'kanwal' mazi ka afsana na tum bhule na hum bhule

kuredtā hai bahut raakh mere maazī kī

maiñ chuuk jā.ūñ to vo uñgliyāñ jalā legā

kuredta hai bahut rakh mere mazi ki

main chuk jaun to wo ungliyan jala lega

maazī se ubhrīñ vo zinda tasvīreñ

utar gayā sab nashsha na.e purāne kā

mazi se ubhrin wo zinda taswiren

utar gaya sab nashsha nae purane ka

tamīz-e-ḳhvāb-o-haqīqat hai shart-e-bedārī

ḳhayāl-e-azmat-e-māzī ko chhoḌ haal ko dekh

tamiz-e-KHwab-o-haqiqat hai shart-e-bedari

KHayal-e-azmat-e-mazi ko chhoD haal ko dekh

Tahnī pe ḳhamosh ik parinda

maazī ke ulaT rahā hai daftar

Tahni pe KHamosh ek parinda

mazi ke ulaT raha hai daftar

allāh-re be-ḳhudī ki chalā jā rahā huuñ maiñ

manzil ko dekhtā huā kuchh sochtā huā

allah-re be-KHudi ki chala ja raha hun main

manzil ko dekhta hua kuchh sochta hua

yād-e-māzī kī pur-asrār hasīñ galiyoñ meñ

mere hamrāh abhī ghuum rahā hai koī

yaad-e-mazi ki pur-asrar hasin galiyon mein

mere hamrah abhi ghum raha hai koi

ye jo maazī kī baat karte haiñ

sochte hoñge haal se aage

ye jo mazi ki baat karte hain

sochte honge haal se aage

ka.ī nā-āshnā chehre hijāboñ se nikal aa.e

na.e kirdār maazī kī kitāboñ se nikal aa.e

kai na-ashna chehre hijabon se nikal aae

nae kirdar mazi ki kitabon se nikal aae

hasrat-e-dil nā-mukammal hai kitāb-e-zindagī

joḌ de maazī ke sab aurāq mustaqbil ke saath

hasrat-e-dil na-mukammal hai kitab-e-zindagi

joD de mazi ke sab auraq mustaqbil ke sath

maazī ke reg-zār pe rakhnā sambhal ke paañv

bachchoñ kā is meñ koī gharauñdā banā na ho

mazi ke reg-zar pe rakhna sambhal ke panw

bachchon ka is mein koi gharaunda bana na ho