Sher on Parwana

sab ik charāġh ke parvāne honā chāhte haiñ

ajiib log haiñ dīvāne honā chāhte haiñ

sab ek charagh ke parwane hona chahte hain

ajib log hain diwane hona chahte hain

hotī kahāñ hai dil se judā dil kī aarzū

jaatā kahāñ hai sham.a ko parvāna chhoḌ kar

hoti kahan hai dil se juda dil ki aarzu

jata kahan hai shama ko parwana chhoD kar

tū kahīñ ho dil-e-dīvāna vahāñ pahuñchegā

sham.a hogī jahāñ parvāna vahāñ pahuñchegā

tu kahin ho dil-e-diwana wahan pahunchega

shama hogi jahan parwana wahan pahunchega

parvānoñ kā to hashr jo honā thā ho chukā

guzrī hai raat sham.a pe kyā dekhte chaleñ

parwanon ka to hashr jo hona tha ho chuka

guzri hai raat shama pe kya dekhte chalen

misl-e-parvāna fidā har ek kā dil ho gayā

yaar jis mahfil meñ baiThā sham-e-mahfil ho gayā

misl-e-parwana fida har ek ka dil ho gaya

yar jis mahfil mein baiTha sham-e-mahfil ho gaya

yuuñ to jal bujhne meñ donoñ haiñ barābar lekin

vo kahāñ sham.a meñ jo aag hai parvāne meñ

yun to jal bujhne mein donon hain barabar lekin

wo kahan shama mein jo aag hai parwane mein

ḳhud hī parvāne jal ga.e varna

sham.a jaltī hai raushnī ke liye

KHud hi parwane jal gae warna

shama jalti hai raushni ke liye

mat karo sham.a kuuñ badnām jalātī vo nahīñ

aap siiñ shauq patañgoñ ko hai jal jaane kā

mat karo shama kun badnam jalati wo nahin

aap sin shauq patangon ko hai jal jaane ka

jaane kyā mahfil-e-parvāna meñ dekhā us ne

phir zabāñ khul na sakī sham.a jo ḳhāmosh huī

jaane kya mahfil-e-parwana mein dekha us ne

phir zaban khul na saki shama jo KHamosh hui

parvāne aa hī jā.eñge khiñch kar ba-jabr-e-ishq

mahfil meñ sirf sham.a jalāne kī der hai

parwane aa hi jaenge khinch kar ba-jabr-e-ishq

mahfil mein sirf shama jalane ki der hai

sham.a par ḳhuun kā ilzām ho sābit kyūñ-kar

phūñk dī laash bhī kambaḳht ne parvāne kī

shama par KHun ka ilzam ho sabit kyun-kar

phunk di lash bhi kambaKHt ne parwane ki

ye apne dil kī lagī ko bujhāne aate haiñ

parā.ī aag meñ jalte nahīñ haiñ parvāne

ye apne dil ki lagi ko bujhane aate hain

parai aag mein jalte nahin hain parwane

ḳhud bhī jaltī hai agar us ko jalātī hai ye

kam kisī tarah nahīñ sham.a bhī parvāne se

KHud bhi jalti hai agar us ko jalati hai ye

kam kisi tarah nahin shama bhi parwane se

parvāne kī tapish ne ḳhudā jaane kaan meñ

kyā kah diyā ki sham.a ke sar se dhuāñ uThā

parwane ki tapish ne KHuda jaane kan mein

kya kah diya ki shama ke sar se dhuan uTha

ishq meñ nisbat nahīñ bulbul ko parvāne ke saath

vasl meñ vo jaan de ye hijr meñ jiitī rahe

ishq mein nisbat nahin bulbul ko parwane ke sath

wasl mein wo jaan de ye hijr mein jiti rahe

mūjid jo nuur kā hai vo merā charāġh hai

parvāna huuñ maiñ anjuman-e-kā.enāt kā

mujid jo nur ka hai wo mera charagh hai

parwana hun main anjuman-e-kaenat ka

sham.a bujh kar rah ga.ī parvāna jal kar rah gayā

yādgār-e-husn-o-ishq ik daaġh dil par rah gayā

shama bujh kar rah gai parwana jal kar rah gaya

yaadgar-e-husn-o-ishq ek dagh dil par rah gaya

tārīkī meñ hotā hai use vasl mayassar

parvāna kahāñ jaa.e shabistāñ se nikal kar

tariki mein hota hai use wasl mayassar

parwana kahan jae shabistan se nikal kar

ḳhaak kar deve jalā kar pahle phir Tisve bahā.e

sham.a majlis meñ baḌī dil-soz parvāne kī hai

KHak kar dewe jala kar pahle phir Tiswe bahae

shama majlis mein baDi dil-soz parwane ki hai