آسمان پر اشعار

یوں جو تکتا ہے آسمان کو تو

کوئی رہتا ہے آسمان میں کیا

عقابی روح جب بیدار ہوتی ہے جوانوں میں

نظر آتی ہے ان کو اپنی منزل آسمانوں میں

کبھی تو آسماں سے چاند اترے جام ہو جائے

تمہارے نام کی اک خوبصورت شام ہو جائے

اے آسمان تیرے خدا کا نہیں ہے خوف

ڈرتے ہیں اے زمین ترے آدمی سے ہم

زمین جب بھی ہوئی کربلا ہمارے لیے

تو آسمان سے اترا خدا ہمارے لیے

ذرہ سمجھ کے یوں نہ ملا مجھ کو خاک میں

اے آسمان میں بھی کبھی آفتاب تھا

جتنی بٹنی تھی بٹ چکی یہ زمیں

اب تو بس آسمان باقی ہے

آسماں اپنے ارادوں میں مگن ہے لیکن

آدمی اپنے خیالات لیے پھرتا ہے

ہم کسی کو گواہ کیا کرتے

اس کھلے آسمان کے آگے

ڈرتا ہوں آسمان سے بجلی نہ گر پڑے

صیاد کی نگاہ سوئے آشیاں نہیں

رفاقتوں کا مری اس کو دھیان کتنا تھا

زمین لے لی مگر آسمان چھوڑ گیا

آسمان پر جا پہنچوں

اللہ تیرا نام لکھوں

آسماں ایک سلگتا ہوا صحرا ہے جہاں

ڈھونڈھتا پھرتا ہے خود اپنا ہی سایا سورج

وہ سو رہا ہے خدا دور آسمانوں میں

فرشتے لوریاں گاتے ہیں اس کے کانوں میں

زمین کی کوکھ ہی زخمی نہیں اندھیروں سے

ہے آسماں کے بھی سینے پہ آفتاب کا زخم

ظفرؔ زمیں زاد تھے زمیں سے ہی کام رکھا

جو آسمانی تھے آسمانوں میں رہ گئے ہیں

اگر ہے انسان کا مقدر خود اپنی مٹی کا رزق ہونا

تو پھر زمیں پر یہ آسماں کا وجود کس قہر کے لیے ہے

گرے گی کل بھی یہی دھوپ اور یہی شبنم

اس آسماں سے نہیں اور کچھ اترنے کا

بدلے ہوئے سے لگتے ہیں اب موسموں کے رنگ

پڑتا ہے آسمان کا سایا زمین پر

رت بدلی تو زمیں کے چہرے کا غازہ بھی بدلا

رنگ مگر خود آسمان نے بدلے کیسے کیسے

ہزار راستے بدلے ہزار سوانگ رچے

مگر ہے رقص میں سر پر اک آسمان وہی

ترس رہی تھیں یہ آنکھیں کسی کی صورت کو

سو ہم بھی دشت میں آب رواں اٹھا لائے

اٹھی ہیں میری خاک سے آفات سب کی سب

نازل ہوئی نہ کوئی بلا آسمان سے

مری زمین پہ پھیلا ہے آسمان عدم

ازل سے میرے زمانے پہ اک زمانہ ہے