Sher on Khwab

ḳhafā dekhā hai us ko ḳhvāb meñ dil saḳht muztar hai

khilā de dekhiye kyā kyā gul-e-ta.abīr-e-ḳhvāb apnā

KHafa dekha hai us ko KHwab mein dil saKHt muztar hai

khila de dekhiye kya kya gul-e-tabir-e-KHwab apna

darvāza khaTkhaTā ke sitāre chale ga.e

ḳhvāboñ kī shaal oḌh ke maiñ ūñghtā rahā

darwaza khaTkhaTa ke sitare chale gae

KHwabon ki shaal oDh ke main unghta raha

ye zarūrī hai ki āñkhoñ kā bharam qaa.em rahe

niiñd rakkho yā na rakkho ḳhvāb meyārī rakho

ye zaruri hai ki aankhon ka bharam qaem rahe

nind rakkho ya na rakkho KHwab meyari rakho

aur to kyā thā bechne ke liye

apnī āñkhoñ ke ḳhvāb beche haiñ

aur to kya tha bechne ke liye

apni aankhon ke KHwab beche hain

haath lagāte hī miTTī kā Dher hue

kaise kaise rañg bhare the ḳhvāboñ meñ

hath lagate hi miTTi ka Dher hue

kaise kaise rang bhare the KHwabon mein

par katar paa.ī jab na ḳhvāboñ ke

bañd hī kar diiñ khiḌkiyāñ maiñ ne

par katar pai jab na KHwabon ke

band hi kar din khiDkiyan main ne

bin dekhe us ke jaave rañj o azaab kyuuñ kar

vo ḳhvāb meñ to aave par aave ḳhvāb kyuuñ kar

bin dekhe us ke jawe ranj o azab kyun kar

wo KHwab mein to aawe par aawe KHwab kyun kar

āvāz de rahā thā koī mujh ko ḳhvāb meñ

lekin ḳhabar nahīñ ki bulāyā kahāñ gayā

aawaz de raha tha koi mujh ko KHwab mein

lekin KHabar nahin ki bulaya kahan gaya

phir na.ī hijrat koī darpesh hai

ḳhvāb meñ ghar dekhnā achchhā nahīñ

phir nai hijrat koi darpesh hai

KHwab mein ghar dekhna achchha nahin

beTiyāñ baap kī āñkhoñ meñ chhupe ḳhvāb ko pahchāntī haiñ

aur koī dūsrā is ḳhvāb ko paḌh le to burā māntī haiñ

beTiyan bap ki aankhon mein chhupe KHwab ko pahchanti hain

aur koi dusra is KHwab ko paDh le to bura manti hain

āñkheñ kholo ḳhvāb sameTo jaago bhī

'alvī' pyāre dekho saalā din niklā

aankhen kholo KHwab sameTo jago bhi

'alwi' pyare dekho sala din nikla

hai bahut kuchh mirī ta.abīr kī duniyā tujh meñ

phir bhī kuchh hai ki jo ḳhvāboñ ke jahāñ se kam hai

hai bahut kuchh meri tabir ki duniya tujh mein

phir bhi kuchh hai ki jo KHwabon ke jahan se kam hai

ḳhvāb meñ naam tirā le ke pukār uThtā huuñ

be-ḳhudī meñ bhī mujhe yaad tirī yaad kī hai

KHwab mein nam tera le ke pukar uThta hun

be-KHudi mein bhi mujhe yaad teri yaad ki hai

mere ḳhvāboñ meñ bhī tū mere ḳhayāloñ meñ bhī tū

kaun sī chiiz tujhe tujh se judā pesh karūñ

mere KHwabon mein bhi tu mere KHayalon mein bhi tu

kaun si chiz tujhe tujh se juda pesh karun

āshiqī meñ 'mīr' jaise ḳhvāb mat dekhā karo

bāvle ho jāoge mahtāb mat dekhā karo

aashiqi mein 'mir' jaise KHwab mat dekha karo

bawle ho jaoge mahtab mat dekha karo

bharī rahe abhī āñkhoñ meñ us ke naam kī niind

vo ḳhvāb hai to yūñhī dekhne se guzregā

bhari rahe abhi aankhon mein us ke nam ki nind

wo KHwab hai to yunhi dekhne se guzrega

tū jis ke ḳhvāb meñ aayā ho vaqt-e-sub.h sanam

namāz-e-sub.h ko kis tarah vo qazā na kare

tu jis ke KHwab mein aaya ho waqt-e-subh sanam

namaz-e-subh ko kis tarah wo qaza na kare

sunā hai ḳhvāb mukammal kabhī nahīñ hote

sunā hai ishq ḳhatā hai so kar ke dekhte haiñ

suna hai KHwab mukammal kabhi nahin hote

suna hai ishq KHata hai so kar ke dekhte hain

ḳhvāb hī ḳhvāb kab talak dekhūñ

kaash tujh ko bhī ik jhalak dekhūñ

KHwab hi KHwab kab talak dekhun

kash tujh ko bhi ek jhalak dekhun

bārūd ke badle hāthoñ meñ aa jaa.e kitāb to achchhā ho

ai kaash hamārī āñkhoñ kā ikkīsvāñ ḳhvāb to achchhā ho

barud ke badle hathon mein aa jae kitab to achchha ho

ai kash hamari aankhon ka ikkiswan KHwab to achchha ho

yā rab hameñ to ḳhvāb meñ bhī mat dikhā.iyo

ye mahshar-e-ḳhayāl ki duniyā kaheñ jise

ya rab hamein to KHwab mein bhi mat dikhaiyo

ye mahshar-e-KHayal ki duniya kahen jise

bahtī huī āñkhoñ kī ravānī meñ mare haiñ

kuchh ḳhvāb mire ain-javānī meñ mare haiñ

bahti hui aankhon ki rawani mein mare hain

kuchh KHwab mere ain-jawani mein mare hain

apne jiine ke ham asbāb dikhāte haiñ tumheñ

dosto aao ki kuchh ḳhvāb dikhāte haiñ tumheñ

apne jine ke hum asbab dikhate hain tumhein

dosto aao ki kuchh KHwab dikhate hain tumhein

ḳhvāboñ ke ufuq par tirā chehra ho hamesha

aur maiñ usī chehre se na.e ḳhvāb sajā.ūñ

KHwabon ke ufuq par tera chehra ho hamesha

aur main usi chehre se nae KHwab sajaun

abhī vo aañkh bhī soī nahīñ hai

abhī vo ḳhvāb bhī jaagā huā hai

abhi wo aankh bhi soi nahin hai

abhi wo KHwab bhi jaga hua hai

ai shab-e-ḳhvāb ye hangām-e-tahayyur kyā hai

ḳhud ko gar niiñd se bedār kiyā hai maiñ ne

ai shab-e-KHwab ye hangam-e-tahayyur kya hai

KHud ko gar nind se bedar kiya hai main ne

ye jab hai ki ik ḳhvāb se rishta hai hamārā

din Dhalte hī dil Dūbne lagtā hai hamārā

ye jab hai ki ek KHwab se rishta hai hamara

din Dhalte hi dil Dubne lagta hai hamara

TūTtī rahtī hai kachche dhāge sī niiñd

āñkhoñ ko ThanDak ḳhvāboñ ko girānī de

TuTti rahti hai kachche dhage si nind

aankhon ko ThanDak KHwabon ko girani de

jī lagā rakkhā hai yuuñ ta.abīr ke auhām se

zindagī kyā hai miyāñ bas ek ghar ḳhvāboñ kā hai

ji laga rakkha hai yun tabir ke auham se

zindagi kya hai miyan bas ek ghar KHwabon ka hai

ziyārat hogī ka.abe kī yahī ta.abīr hai is kī

ka.ī shab se hamāre ḳhvāb meñ but-ḳhāna aatā hai

ziyarat hogi kabe ki yahi tabir hai is ki

kai shab se hamare KHwab mein but-KHana aata hai

ḳhvāb vaise to ik ināyat hai

aañkh khul jaa.e to musībat hai

KHwab waise to ek inayat hai

aankh khul jae to musibat hai

muddat se ḳhvāb meñ bhī nahīñ niiñd kā ḳhayāl

hairat meñ huuñ ye kis kā mujhe intizār hai

muddat se KHwab mein bhi nahin nind ka KHayal

hairat mein hun ye kis ka mujhe intizar hai

talab kareñ to ye āñkheñ bhī in ko de duuñ maiñ

magar ye log in āñkhoñ ke ḳhvāb māñgte haiñ

talab karen to ye aankhen bhi in ko de dun main

magar ye log in aankhon ke KHwab mangte hain

kabhī jo ḳhvāb thā vo pā liyā hai

magar jo kho ga.ī vo chiiz kyā thī

kabhi jo KHwab tha wo pa liya hai

magar jo kho gai wo chiz kya thi

ḳhudā kare ki khule ek din zamāne par

mirī kahānī meñ jo isti.āra ḳhvāb kā hai

KHuda kare ki khule ek din zamane par

meri kahani mein jo istiara KHwab ka hai

kuchal ke pheñk do āñkhoñ meñ ḳhvāb jitne haiñ

isī sabab se haiñ ham par azaab jitne haiñ

kuchal ke phenk do aankhon mein KHwab jitne hain

isi sabab se hain hum par azab jitne hain

vahī hai ḳhvāb jise mil ke sab ne dekhā thā

ab apne apne qabīloñ meñ baT ke dekhte haiñ

wahi hai KHwab jise mil ke sab ne dekha tha

ab apne apne qabilon mein baT ke dekhte hain

maiñ apnī añgusht kāTtā thā ki biich meñ niiñd aa na jaa.e

agarche sab ḳhvāb kā safar thā magar haqīqat meñ aa basā huuñ

main apni angusht kaTta tha ki bich mein nind aa na jae

agarche sab KHwab ka safar tha magar haqiqat mein aa basa hun

tumhāre ḳhvāb se har shab lipaT ke sote haiñ

sazā.eñ bhej do ham ne ḳhatā.eñ bhejī haiñ

tumhaare KHwab se har shab lipaT ke sote hain

sazaen bhej do hum ne KHataen bheji hain

ik ḳhvāb hī to thā jo farāmosh ho gayā

ik yaad hī to thī jo bhulā dī ga.ī to kyā

ek KHwab hi to tha jo faramosh ho gaya

ek yaad hi to thi jo bhula di gai to kya

rātoñ ko jāgte haiñ isī vāste ki ḳhvāb

dekhegā band āñkheñ to phir lauT jā.egā

raaton ko jagte hain isi waste ki KHwab

dekhega band aankhen to phir lauT jaega

ḳhvāb kā rishta haqīqat se na joḌā jaa.e

ā.īna hai ise patthar se na toḌā jaa.e

KHwab ka rishta haqiqat se na joDa jae

aaina hai ise patthar se na toDa jae

TuuT kar ruuh meñ shīshoñ kī tarah chubhte haiñ

phir bhī har aadmī ḳhvāboñ kā tamannā.ī hai

TuT kar ruh mein shishon ki tarah chubhte hain

phir bhi har aadmi KHwabon ka tamannai hai

ḳhvāboñ se na jaao ki abhī raat bahut hai

pahlū meñ tum aao ki abhī raat bahut hai

KHwabon se na jao ki abhi raat bahut hai

pahlu mein tum aao ki abhi raat bahut hai

hal kar liyā majāz haqīqat ke raaz ko

paa.ī hai maiñ ne ḳhvāb kī ta.abīr ḳhvāb meñ

hal kar liya majaz haqiqat ke raaz ko

pai hai main ne KHwab ki tabir KHwab mein

iltifāt-e-yār thā ik ḳhvāb-e-āġhāz-e-vafā

sach huā kartī haiñ in ḳhvāboñ kī ta.abīreñ kahīñ

iltifat-e-yar tha ek KHwab-e-aghaz-e-wafa

sach hua karti hain in KHwabon ki tabiren kahin

kisī ḳhayāl kā koī vajūd ho shāyad

badal rahā huuñ maiñ ḳhvāboñ ko tajraba kar ke

kisi KHayal ka koi wajud ho shayad

badal raha hun main KHwabon ko tajraba kar ke

ik muamma hai samajhne kā na samjhāne kā

zindagī kaahe ko hai ḳhvāb hai dīvāne kā

ek muamma hai samajhne ka na samjhane ka

zindagi kahe ko hai KHwab hai diwane ka

dil kabhī ḳhvāb ke pīchhe kabhī duniyā kī taraf

ek ne ajr diyā ek ne ujrat nahīñ dī

dil kabhi KHwab ke pichhe kabhi duniya ki taraf

ek ne ajr diya ek ne ujrat nahin di

ishq us kā aan kar yak-bārgī sab le gayā

jaan se ārām sar se hosh aur chashmoñ se ḳhvāb

ishq us ka aan kar yak-bargi sab le gaya

jaan se aaram sar se hosh aur chashmon se KHwab