Sher on Raaz

dafn kar saktā huuñ siine meñ tumhāre raaz ko

aur tum chāho to afsāna banā saktā huuñ maiñ

dafn kar sakta hun sine mein tumhaare raaz ko

aur tum chaho to afsana bana sakta hun main

ye mere ishq kī majbūriyāñ ma.āz-allāh

tumhārā raaz tumhīñ se chhupā rahā huuñ maiñ

ye mere ishq ki majburiyan maaz-allah

tumhaara raaz tumhin se chhupa raha hun main

jin ko apnī ḳhabar nahīñ ab tak

vo mire dil kā raaz kyā jāneñ

jin ko apni KHabar nahin ab tak

wo mere dil ka raaz kya jaanen

har sadā par lage haiñ kaan yahāñ

dil sambhāle raho zabāñ kī tarah

har sada par lage hain kan yahan

dil sambhaale raho zaban ki tarah

koī samjhegā kyā rāz-e-gulshan

jab tak uljhe na kāñToñ se dāman

koi samjhega kya raaz-e-gulshan

jab tak uljhe na kanTon se daman

terā har raaz chhupā.e hue baiThā hai koī

ḳhud ko dīvāna banā.e hue baiThā hai koī

tera har raaz chhupae hue baiTha hai koi

KHud ko diwana banae hue baiTha hai koi

ġhairoñ pe khul na jaa.e kahīñ raaz dekhnā

merī taraf bhī ġhamza-e-ġhammāz dekhnā

ghairon pe khul na jae kahin raaz dekhna

meri taraf bhi ghamza-e-ghammaz dekhna

apnā hī haal tak na khulā mujh ko ta-ba-marg

maiñ kaun huuñ kahāñ se chalā thā kahāñ gayā

apna hi haal tak na khula mujh ko ta-ba-marg

main kaun hun kahan se chala tha kahan gaya

koī kis tarah rāz-e-ulfat chhupā.e

nigāheñ milīñ aur qadam Dagmagā.e

koi kis tarah raaz-e-ulfat chhupae

nigahen milin aur qadam Dagmagae

un se sab haal daġhābāz kahe dete haiñ

mere hamrāz mirā raaz kahe dete haiñ

un se sab haal daghabaz kahe dete hain

mere hamraaz mera raaz kahe dete hain

dāman ashkoñ se tar kareñ kyūñ-kar

raaz ko mushtahar kareñ kyūñ-kar

daman ashkon se tar karen kyun-kar

raaz ko mushtahar karen kyun-kar

haa.e vo rāz-e-ġham ki jo ab tak

tere dil meñ mirī nigāh meñ hai

hae wo raaz-e-gham ki jo ab tak

tere dil mein meri nigah mein hai

maiñ mohabbat na chhupā.ūñ tū adāvat na chhupā

na yahī raaz meñ ab hai na vahī raaz meñ hai

main mohabbat na chhupaun tu adawat na chhupa

na yahi raaz mein ab hai na wahi raaz mein hai

ba-pās-e-dil jise apne laboñ se bhī chhupāyā thā

mirā vo raaz tere hijr ne pahuñchā diyā sab tak

ba-pas-e-dil jise apne labon se bhi chhupaya tha

mera wo raaz tere hijr ne pahuncha diya sab tak

zabān o dahan se jo khulte nahīñ haiñ

vo khul jaate haiñ raaz aksar nazar se

zaban o dahan se jo khulte nahin hain

wo khul jate hain raaz aksar nazar se

kitne hī raaz sab par 'ayāñ ho ga.e

ik tirā rāz-e-ulfat chhupāte hue

kitne hi raaz sab par 'ayan ho gae

ek tera raaz-e-ulfat chhupate hue

vo jo ik baat hai jo tujh ko batā.ī na ga.ī

vo jo ik raaz hai jo khul na sakā vahshat hai

wo jo ek baat hai jo tujh ko batai na gai

wo jo ek raaz hai jo khul na saka wahshat hai

ham pe ye raaz khulā bhī to bahut der ke baa'd

asl kirdār kahānī meñ kisī aur kā hai

hum pe ye raaz khula bhi to bahut der ke ba'd

asl kirdar kahani mein kisi aur ka hai

sakhiyoñ se kab sakhiyāñ apne jī ke bhed chhupātī haiñ

ham se nahīñ to us se kah de kartā kahāñ kalām hai chāñd

sakhiyon se kab sakhiyan apne ji ke bhed chhupati hain

hum se nahin to us se kah de karta kahan kalam hai chand

āñkhoñ ke sab motī daane ā.īne haiñ bātin ke

ghar kā bhedī lanka Dhaa.e maiñ bhī sochūñ tū bhī soch

aankhon ke sab moti dane aaine hain baatin ke

ghar ka bhedi lanka Dhae main bhi sochun tu bhi soch

'ishq aur mushk chhupā.e kahīñ chhupte haiñ 'amar'

laakh parda karo duniyā se ye pardā to nahīñ

'ishq aur mushk chhupae kahin chhupte hain 'amar'

lakh parda karo duniya se ye parda to nahin

kis pe khulte haiñ raat ke asrār

kaun yaañ shab-guzār hai aisā

kis pe khulte hain raat ke asrar

kaun yan shab-guzar hai aisa

ham apnī apnī mohabbat ko laakh bhuul chuke

magar ye baat hamāre hī darmiyān rahe

hum apni apni mohabbat ko lakh bhul chuke

magar ye baat hamare hi darmiyan rahe

raaz hai lekin phir bhī tum ko sachchī baat batāte haiñ

apne ghar ke diye se aksar haath mire jal jaate haiñ

raaz hai lekin phir bhi tum ko sachchi baat batate hain

apne ghar ke diye se aksar hath mere jal jate hain

bazm-e-ā.inda meñ kab kaun kahāñ baiThegā

raftagāñ sab ko ye asrār batāne se rahe

bazm-e-ainda mein kab kaun kahan baiThega

raftagan sab ko ye asrar batane se rahe

zabt-e-rāz-e-ġham pe sau jāneñ bhī kar dete nisār

kyā batā.eñ bas zabāñ par un kā naam aa hī gayā

zabt-e-raaz-e-gham pe sau jaanen bhi kar dete nisar

kya bataen bas zaban par un ka nam aa hi gaya

vahm hai ye ki mirī had meñ amaañ rahte haiñ

mujh meñ sau fitne ba-andāz-e-bayāñ rahte haiñ

wahm hai ye ki meri had mein aman rahte hain

mujh mein sau fitne ba-andaz-e-bayan rahte hain