achchhā ḳhāsā baiThe baiThe gum ho jaatā huuñ

ab maiñ aksar maiñ nahīñ rahtā tum ho jaatā huuñ

achchha KHasa baiThe baiThe gum ho jata hun

ab main aksar main nahin rahta tum ho jata hun

mohabbat rahī chaar din zindagī meñ

rahā chaar din kā asar zindagī bhar

mohabbat rahi chaar din zindagi mein

raha chaar din ka asar zindagi bhar

farishtoñ se bhī achchhā maiñ burā hone se pahle thā

vo mujh se intihā.ī ḳhush ḳhafā hone se pahle thā

farishton se bhi achchha main bura hone se pahle tha

wo mujh se intihai KHush KHafa hone se pahle tha

ittifāq apnī jagah ḳhush-qismatī apnī jagah

ḳhud banātā hai jahāñ meñ aadmī apnī jagah

ittifaq apni jagah KHush-qismati apni jagah

KHud banata hai jahan mein aadmi apni jagah

burā bure ke alāva bhalā bhī hotā hai

har aadmī meñ koī dūsrā bhī hotā hai

bura bure ke alawa bhala bhi hota hai

har aadmi mein koi dusra bhi hota hai

sirf us ke hoñT kāġhaz par banā detā huuñ maiñ

ḳhud banā letī hai hoñToñ par hañsī apnī jagah

sirf us ke honT kaghaz par bana deta hun main

KHud bana leti hai honTon par hansi apni jagah

is ta.alluq meñ nahīñ mumkin talāq

ye mohabbat hai koī shādī nahīñ

is talluq mein nahin mumkin talaq

ye mohabbat hai koi shadi nahin

janāb ke ruḳh-e-raushan kī diid ho jaatī

to ham siyāh-nasīboñ kī iid ho jaatī

janab ke ruKH-e-raushan ki did ho jati

to hum siyah-nasibon ki id ho jati

kah to saktā huuñ magar majbūr kar saktā nahīñ

iḳhtiyār apnī jagah hai bebasī apnī jagah

kah to sakta hun magar majbur kar sakta nahin

iKHtiyar apni jagah hai bebasi apni jagah

kiyā bādaloñ meñ safar zindagī bhar

zamīñ par banāyā na ghar zindagī bhar

kiya baadalon mein safar zindagi bhar

zamin par banaya na ghar zindagi bhar

sabhī zindagī ke maze lūTte haiñ

na aayā hameñ ye hunar zindagī bhar

sabhi zindagi ke maze luTte hain

na aaya hamein ye hunar zindagi bhar

kaafī nahīñ ḳhutūt kisī baat ke liye

tashrīf lā.iyegā mulāqāt ke liye

kafi nahin KHutut kisi baat ke liye

tashrif laiyega mulaqat ke liye

kis qadar bad-nāmiyāñ haiñ mere saath

kyā batā.ūñ kis qadar tanhā huuñ maiñ

kis qadar bad-namiyan hain mere sath

kya bataun kis qadar tanha hun main

muskurā.e baġhair bhī vo hoñT

nazar aate haiñ muskurā.e hue

muskurae baghair bhi wo honT

nazar aate hain muskurae hue

mere ghar ke tamām darvāze

tum se karte haiñ pyaar aa jaao

mere ghar ke tamam darwaze

tum se karte hain pyar aa jao

lagī rahtī hai ashkoñ kī jhaḌī garmī ho sardī ho

nahīñ ruktī kabhī barsāt jab se tum nahīñ aa.e

lagi rahti hai ashkon ki jhaDi garmi ho sardi ho

nahin rukti kabhi barsat jab se tum nahin aae

hamesha hāthoñ meñ hote haiñ phuul un ke liye

kisī ko bhej ke mañgvāne thoḌī hote haiñ

hamesha hathon mein hote hain phul un ke liye

kisi ko bhej ke mangwane thoDi hote hain

zindagī kī zarūratoñ kā yahāñ

hasratoñ meñ shumār hotā hai

zindagi ki zaruraton ka yahan

hasraton mein shumar hota hai

thā va.ada shaam kā magar aa.e vo raat ko

maiñ bhī kivāḌ kholne fauran nahīñ gayā

tha wada sham ka magar aae wo raat ko

main bhi kiwaD kholne fauran nahin gaya

muskurā kar dekh lete ho mujhe

is tarah kyā haq adā ho jā.egā

muskura kar dekh lete ho mujhe

is tarah kya haq ada ho jaega

'shu.ūr' sirf irāde se kuchh nahīñ hotā

amal hai shart irāde sabhī ke hote haiñ

'shuur' sirf irade se kuchh nahin hota

amal hai shart irade sabhi ke hote hain

ishq to har shaḳhs kartā hai 'shu.ūr'

tum ne apnā haal ye kyā kar liyā

ishq to har shaKHs karta hai 'shuur'

tum ne apna haal ye kya kar liya

haiñ pattharoñ kī zad pe tumhārī galī meñ ham

kyā aa.e the yahāñ isī barsāt ke liye

hain pattharon ki zad pe tumhaari gali mein hum

kya aae the yahan isi barsat ke liye

kisī ġharīb ko zaḳhmī kareñ ki qatl kareñ

nigāh-e-nāz pe jurmāne thoḌī hote haiñ

kisi gharib ko zaKHmi karen ki qatl karen

nigah-e-naz pe jurmane thoDi hote hain

log sadmoñ se mar nahīñ jaate

sāmne kī misāl hai merī

log sadmon se mar nahin jate

samne ki misal hai meri

chale aayā karo merī taraf bhii!

mohabbat karne vaalā aadmī huuñ

chale aaya karo meri taraf bhi!

mohabbat karne wala aadmi hun

kabhī rotā thā us ko yaad kar ke

ab aksar be-sabab rone lagā huuñ

kabhi rota tha us ko yaad kar ke

ab aksar be-sabab rone laga hun

sach hai umr bhar kis kā kaun saath detā hai

ġham bhī ho gayā ruḳhsat dil ko chhoḌ kar tanhā

sach hai umr bhar kis ka kaun sath deta hai

gham bhi ho gaya ruKHsat dil ko chhoD kar tanha

achchhoñ ko to sab hī chāhte haiñ

hai koī ki maiñ bahut burā huuñ

achchhon ko to sab hi chahte hain

hai koi ki main bahut bura hun

ho ga.e din jinheñ bhulā.e hue

aaj kal haiñ vo yaad aa.e hue

ho gae din jinhen bhulae hue

aaj kal hain wo yaad aae hue

dost kahtā huuñ tumheñ shā.er nahīñ kahtā 'shu.ūr'

dostī apnī jagah hai shā.erī apnī jagah

dost kahta hun tumhein shaer nahin kahta 'shuur'

dosti apni jagah hai shaeri apni jagah

aadmī ke liye ronā hai baḌī baat 'shu.ūr'

hañs to sakte haiñ sab insān hañsī meñ kyā hai

aadmi ke liye rona hai baDi baat 'shuur'

hans to sakte hain sab insan hansi mein kya hai

bahut irāda kiyā koī kaam karne kā

magar amal na huā uljhaneñ hī aisī thiiñ

bahut irada kiya koi kaam karne ka

magar amal na hua uljhanen hi aisi thin

vo mujh se ruuTh na jaatī to aur kyā kartī

mirī ḳhatā.eñ mirī laġhzisheñ hī aisī thiiñ

wo mujh se ruTh na jati to aur kya karti

meri KHataen meri laghzishen hi aisi thin

zamāne ke jhameloñ se mujhe kyā

mirī jaañ! maiñ tumhārā aadmī huuñ

zamane ke jhamelon se mujhe kya

meri jaan! main tumhaara aadmi hun

sāmne aa kar vo kyā rahne lagā

ghar kā darvāza khulā rahne lagā

samne aa kar wo kya rahne laga

ghar ka darwaza khula rahne laga

'shu.ūr' ḳhud ko zahīn aadmī samajhte haiñ

ye sādgī hai to vallāh intihā kī hai

'shuur' KHud ko zahin aadmi samajhte hain

ye sadgi hai to wallah intiha ki hai

mirī hayāt hai bas raat ke añdhere tak

mujhe havā se bachā.e rakho savere tak

meri hayat hai bas raat ke andhere tak

mujhe hawa se bachae rakho sawere tak

marne vaalā ḳhud rūThā thā

yā nārāz hayāt huī thī

marne wala KHud ruTha tha

ya naraaz hayat hui thi

ham bulāte vo tashrīf laate rahe

ḳhvāb meñ ye karāmāt hotī rahī

hum bulate wo tashrif late rahe

KHwab mein ye karamat hoti rahi

vo rañg rañg ke chhīñTe paḌe ki us ke ba.ad

kabhī na phir na.e kapḌe pahan ke niklā maiñ

wo rang rang ke chhinTe paDe ki us ke baad

kabhi na phir nae kapDe pahan ke nikla main

go kaThin hai tai karnā umr kā safar tanhā

lauT kar na dekhūñgā chal paḌā agar tanhā

go kaThin hai tai karna umr ka safar tanha

lauT kar na dekhunga chal paDa agar tanha

'shu.ūr' tum ne ḳhudā jaane kyā kiyā hogā

zarā sī baat ke afsāne thoḌī hote haiñ

'shuur' tum ne KHuda jaane kya kiya hoga

zara si baat ke afsane thoDi hote hain

go mujhe ehsās-e-tanhā.ī rahā shiddat ke saath

kaaT dī aadhī sadī ek ajnabī aurat ke saath

go mujhe ehsas-e-tanhai raha shiddat ke sath

kaT di aadhi sadi ek ajnabi aurat ke sath

rahe tazkire amn ke āshtī ke

magar bastiyoñ par baraste rahe bam

rahe tazkire amn ke aashti ke

magar bastiyon par baraste rahe bam

nizām-e-zar meñ kisī aur kaam kā kyā ho

bas aadmī hai kamāne kā aur khāne kā

nizam-e-zar mein kisi aur kaam ka kya ho

bas aadmi hai kamane ka aur khane ka

bahrūp nahīñ bharā hai maiñ ne

jaisā bhī huuñ sāmne khaḌā huuñ

bahrup nahin bhara hai main ne

jaisa bhi hun samne khaDa hun

terī aas pe jiitā thā maiñ vo bhī ḳhatm huī

ab duniyā meñ kaun hai merā koī nahīñ merā

teri aas pe jita tha main wo bhi KHatm hui

ab duniya mein kaun hai mera koi nahin mera

koī zanjīr nahīñ tār-e-nazar se mazbūt

ham ne is chāñd pe Daalī hai kamand āñkhoñ se

koi zanjir nahin tar-e-nazar se mazbut

hum ne is chand pe Dali hai kamand aankhon se

kaḌā hai din baḌī hai raat jab se tum nahīñ aa.e

digar-gūñ haiñ mire hālāt jab se tum nahīñ aa.e

kaDa hai din baDi hai raat jab se tum nahin aae

digar-gun hain mere haalat jab se tum nahin aae